އިއްޒުއްދީން ސްކޫލްގައި 240 ކުދިން ކިޔަވާނެ
ސްކޫލްގައި ކިޔަވައިދޭނީ ގްރޭޑް ހަޔަކާއި ހަމައަށް
އިއްޒުއްދީން ސްކޫލް
އާދީއްތަ ދުވަހުގެ 10:00 ރަސްމީކޮށް ހުޅުވަން ހަމަޖެހިފައިވާ އިއްޒުއްދީން ސްކޫލްގައި 240 ކުދިންނަށް ކިޔަވައިދިނުމަށް ހަމަޖެހިފައިވާ ކަމަށް އެޑިއުކޭޝަން މިނިސްޓްރީން ބުނެފިއެވެ.
"ރާއްޖެއެމްވީ"އަށް އެޑިއުކޭޝަން މިނިސްޓްރީން ބުނީ ކުރިން މާލޭ އިންގްލިޝް ސްކޫލު (އެމްއީއެސް) ހިންގި ޢިމާރާތުގައި ސަރުކާރުން ހިންގަން ނިންމާފައިވާ އާ ސްކޫލް ކަމަށްވާ އިއްޒުއްދީން ސްކޫލްގަ 240 ކުދިންނަށް ކިޔަވާ ދިނުމަށް ހަމަޖެހިފައިވާ ކަމަށާއި ޖުމްލަ 26 ޓީޗަރުން އެ ކުދިންނަށް ކިޔަވާދިނުމުގައި ޙަރަކާތްތެރިވާނެ ކަމަށެވެ.
މި ސްކޫލް އާދީއްތަ ދުވަހު ރަސްމީކޮށް ހުޅުވުމަށް ހަމަޖެހިފައިވާއިރު މި ސްކޫލް ހުޅުއްވައިދެއްވުމަށް ހަމަޖެހިފައިވަނީ ރައިސުލްޖުމްހޫރިއްޔާ އިބްރާހިމް މުޙައްމަދު ޞާލިޙެވެ.
މި ސްކޫލްގައި ގްރޭޑް ދިހަ އަކާއި ހަމަޔަށް ކިޔަވައިދޭން ނިންމާފައިވީ ނަމަވެސް މި އަހަރު އެ ސްކޫލްގައި ކިޔަވައިދިނުމަށް ހަމަޖެހިފައިވަނީ ގްރޭޑް ހަޔަކާއި ހަމައަށެވެ. އެއީ ގްރޭޑް އެކަކުން ހަތަރަކަށް ކޮންމެ ގްރޭޑެއްގައި ތިން ކްލާސް އަދި ގްރޭޑް ފަހެއް އަދި ހައެއްގެ ކޮންމެ ގްރޭޑް އެއްގެ ދެ ކުލާހެވެ. ކުލާހެއްގައި 25 ކުދިންގެ ޖާގަ ހުންނައިރު 2021 ވަނަ އަހަރު ގްރޭޑް ހަތަކުން ފެށިގެން ދިހަ އަކަށް ކިޔަވައިދޭން ފަށާނެކަމަށް އެޑިއުކޭޝަން މިނިސްޓްރީން ވަނީ ބުނެފައެވެ. މިއީ، 500 ދަރިވަރުންނަށް ޖާގަ ދިނުމަށް ޢަމާޒުކޮށް ހުޅުވާ ސްކޫލެކެވެ.
