ކޯޓުތަކަށް ދައްކަންޖެހޭ ފައިސާ ކޮންމެ ކޯޓަކުންވެސް ބަލައިގަނެވޭނެ: ޑީޖޭއޭ
11 ޖެނުއަރީ 2020 | ހޮނިހިރު 02:04އެގޮތަށް އަމަލުކުރަން ފަށާނީ ޖެނުއަރީ 12 އިން ފެށިގެން
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)
އެކި ސަބަބުތަކާއި ގުޅިގެން ޝަރުއީ ކޯޓުތަކަށް ދައްކަންޖެހޭ ފައިސާ ރާއްޖޭގެ ކޮންމެ ކޯޓަކަށްވެސް ދެއްކޭގޮތަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ހަމަޖައްސައިފިއެވެ.
އެކަމާ ގުޅޭގޮތުން ޑީޖޭއޭއިން ނެރުނު ނޫސްބަޔާނެއްގައި ބުނީ، ކުރިން ފައިސާ ދައްކަން ޖެހެނީ ފައިސާ ލިބެންވީ ކޯޓް ނުވަތަ ބްރާންޗަށް ކަމަށްވިޔަސް މިހިނގާ ޖެނުއަރީ މަހުގެ 12 އިން ފެށިގެން ޑީޖޭއޭގެ އިތުރުން ރާއްޖޭގެ ކޮންމެ ކޯޓަކުންވެސް އެ ފައިސާ ބަލައިގަނެވޭ ގޮތަށް ހަމަޖެހިފައިވާ ކަމަށެވެ.
އެގޮތުން ޚިދުމަތް ހޯދާ ފަރާތްތަކުން ދައްކަންޖެހޭ ފީއާއި، ޑިޕޮސިޓްތަކުގެ އިތުރުން، ހުކުމްތަކާއި، އަމުރުތަކާއި ޗިޓްތަކާއި ގުޅިގެން ދައްކަންޖެހޭ ފައިސާ އެ އުސޫލުން މިހާރު ދެއްކޭނެ ކަމަށް ޑީޖޭއޭއިން ބުނެއެވެ.
އަދި އެގޮތަށް ދައްކާ ފައިސާ ލިބެންޖެހޭ ފަރާތްތަކަށް އެ ފައިސާ ހަވާލުކުރާނީވެސް އެ ކޯޓަކުން ކަމަށާއި، އެއަށްފަހު ފައިސާ ދެއްކުމަށް އަމުރުކުރި ކޯޓަކަށް އެކަން އަންގަންޖެހޭނެކަމަށްވެސް ބުނެފައިވެއެވެ.
ޑީޖޭއޭއިން އިތުރަށް ބުނީ، މި އުސޫލުގެ ދަށުން އެހެން ކޯޓަކުން ފައިސާއެއް ބަލައިގެންފި ނަމަ، އެ ފައިސާއެއް އަސްލު ލިބެންޖެހޭ ކޯޓަށް އެކަން އަންގަން ޖެހޭނެ ކަމަށެވެ.
