މާފުށި ކައިރީގައި ބަނދަރުކޮށްފައި ހުރި ސަފާރީތައް ނެގުމަށް އެންގި ނޯޓިސް ބާތިލްކޮށްފި
10 ޖެނުއަރީ 2020 | ހުކުރު 08:08ކައުންސިލުގެ އިހްތިޞާސް ކަނޑައެޅުމުގެ ބާރު ލިބިގެންވަނީ ރައީސްއަށް
ކ.މާފުށި | ޓްވިޓަރ
ކ.މާފުށި ރަށު ކައުންސިލްގެ އިހްތިޞާސް ހިނގާ ސަރަޙައްދުގައި ބަނދަރުކޮށްފައި ހުރި ސަފާރީތައް އިޚްތިޞާޞުން ބޭރަށް ގެންދިއުމަށް އެންގި ނޯޓިސް ލޯކަލް ގަވަރމަންޓް އޮޓޯރިޓީ (އެލްޖީއޭ) އިން ބާތިލްކޮށްފިއެވެ.
އެލްޖީއޭއިން ނެރުނު ބަޔާނުގައި ބުނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުނަށް ރިޢާޔަތްކޮށް، ކ. މާފުށީ ކައުންސިލުގެ އިޚްތިސާސް ހިނގާ ސަރަހައްދުގައި ބަނދަރުކޮށްފައި ހުރި އުޅަނދުތައް އެ ސަރަހައްދުން ބޭރަށް ގެންދިއުމަށާއި، ކަނޑައެޅިފައިވާ މުއްދަތުގެ ތެރޭގައި އެ ސަރަހައްދުން ނުގެންގޮސް ހުރި އުޅަނދުތައް ނަގައި އެތަކެތި ނައްތާލައި ނުވަތަ ނީލަމުގައި ވިއްކާލާނެކަން އާންމުކޮށް އަންގާ ނޯޓިސް ނެރިފައިވާ ކަމަށެވެ.
އެލްޖީއޭއިން ބުނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު ގެދަށުން، ރަށްރަށުގެ ކައުންސިލުގެ އިހްތިޞާސް ކަނޑައެޅުމުގެ ބާރު ލިބިގެންވަނީ ރައީސުލްޖުމްހޫރިއްޔާ އަށް ކަމަށާއި، ރައީސުލްޖުމްހޫރިއްޔާ އަށް ލިބިދީފައިވާ ބާރުގެ ދަށުން މިހާތަނަށް އެއްވެސް ކައުންސިލެއްގެ އިހްތިސާސް ކަނޑައަޅާފައިނުވާ ކަމަށެވެ.
މީގެ އިތުރުން އެލްޖީއޭއިން ބުނީ ގާނޫނުގައި ކަނޑައެޅި ބަޔާންކޮށްފައިވާ ގޮތެއްގެމަތިން، އަދި އެކަމަށް ކޯޓަކުން ކުރާ ހުކުމަކުން މެނުވީ އެއްވެސް މީހެއްގެ މުދަލެއް އެމީހެއްގެ ރުހުމެއްނެތި ދައުލަތަށް ނަގައިގެން ނުވާނެކަމަށް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 40 ވަނަ މާއްދާގެ (ހ) ގައި ބަޔާންކޮށްފައިވާއިރު، ކަނޑައެޅިފައިވާ ޤާނޫނާ އެއްގޮތަށް ޝަރުއީ މަރުހަލާމެދުވެރިކޮށް ނޫންގޮތަކަށް، އެއްވެސް މީހެއްގެ މުދަލެއް ނަގައި އެތަކެތި ނައްތާލައި ނުވަތަ ނީލަމުގައި ވިއްކާލުމަކީ ގާނޫނީ ގޮތުން ކުރެވޭނެ ކަމެއް ނޫންކަމަށެވެ.
އެހެންކަމުން މާފުށި ކައުންސިލްގެ އިޤްތިޞާސް ހިނގާ ސަރަޙައްދުގައި ބަދަރުކޮށްފައި ހުރި ސަފާރީތައް އިޚްތިޞާޞުން ބޭރަށް ގެންދިއުމަށް އަންގާ ނޯޓިސް ބާތިލުކޮށް، އެކަން ކައުންސިލްއަށް އަންގާފައިވާ ކަމަށެވެ.
