ދިރާގު އެޕްރެންޓިސްޝިޕް ޕްރޮގުރާމުގައި 200 ވުރެ ގިނަ މީހުން ބައިވެރިވި
މި ޕްރޮގްރާމް ހިންގާތާ މިއީ 11 ވަނަ އަހަރު
ދިރާގު އެޕްރެންޓިސްޝިޕް ޕްރޮގްރާމެއްގެ ތެރެއިން
ދިރާގުން ކުރިއަށް ގެންދިޔަ އެޕްރެންޓިސްޝިޕް ޕްރޮގުރާމުގެ ވޯކްއިން އިންޓަވިއުގައި 200 ވުރެ ގިނަ ކުދިން ބައިވެރިވި ކަމަށް ދިރާގުން ބުނެފިއެވެ.
ދިރާގުން ބުނީ އެ އިންޓަވިއުގައި 200 އަށްވުރެ ގިނަ ކުދިން ބައިވެރިވިއިރު މިހާރު ކުރިއަށްދަނީ ކުދިން ޝޯޓްލިސްޓް ކުރުމުގެ ކަންތައްތައް ކަމަށެވެ.
ވޯކްއިން އިންޓަވިއު ދިރާގުން ކުރިއަށް ގެންދިޔައީ، މި މަހުގެ 7 ވަނަ ދުވަހު މެންދުރު 14:00 އިން ހަވީރު 17:00 އާއި ދެމެދުގައި ދިރާގު މައި މަރުަކޒުގައްޔާއި، ރާއްޖޭގެ އެކި ކަންކޮޅުތަކުގައި ޤާއިމު ކޮށްފައިވާ ދިރާގުގެ ރީޖަނަލް އޮފީސްތަކުގައެވެ.
ދިރާގުން 2009 ގައި ތަޢާރަފުކުރި މި ޕްރޮގުރާމް ހިންގާތާ މިއީ 11 ވަނަ އަހަރެވެ. މަސައްކަތުގެ ޢަމަލީ އަދި ފަންނީ ތަފާތު ދާއިރާތަކުގައި މަސައްކަތްކުރުމުގެ ފުރުޞަތު ދިރާގު އެޕްރެންޓިސްޝިޕް ޕްރޮގުރާމުގެ ދަށުން ހޮވޭ ކުދިންނަށް ހުޅުވާލާފައި ވެއެވެ.
މި ޕްރޮގުރާމް ނިންމާ ގިނަ ކުދިންނަކީ ދިރާގުގެ އިތުރުން ރާއްޖޭގެ ތަފާތު ކުންފުނިތަކުގައި ޒިންމާދާރު ވަޒީފާތައް ކާމިޔާބުކަމާއެކު އަދާކުރަމުން އަންނަ ޒުވާނުން ކަމަށާއި، މިއީ ދިރާގު އެޕްރެންޓިސްޝިޕް ޕްރޮގުރާމުގެ ކާމިޔާބު ރަމްޒުކޮށްދޭ އެއް ހެކި ކަމަށް ދިރާގުން ބުންޏެވެ.
މި ޕްރޮގުރާމުގައި ދިރާގުގެ ވަރަށް ގިނަ ދާއިރާތަކުގައި މަސައްކަތް ކުރުމުގެ ފުރުޞަތު ލިބިގެންދާނެއެވެ. އޭގެ ތެރޭގައި ސޭލްސް، މާރކެޓިންގ، ޕްރޮކިއުމަންޓް އެންޑް ޕްރޮޕަޓީ މެނޭޖްމެންޓް، ހިރުމަން ރިސޯސަސް،ފައިނޭންސް، އިންފޮމޭޝަން ސިސްޓަމްސް، ނެޓްވޯރކްސް އަދި ކަސްޓަމަރ ސޮލިއުޝަންސް ޑިޕާޓްމަންޓް ހިމެނެއެވެ. އަދި ބައިވެރިވާ ކުދިންނަށް އެންމެ ފުރިހަމަ ގޮތުގައި އެހީތެރިވުމުގެ ގޮތުން ކޮންމެ ކުއްޖަކަށް ދިރާގުގެ ފަރާތުން މެންޓޯއެއް ކަނޑައެޅިފައިވާނެއެވެ.
މި ޕްރޮގުރާމުގެ ތެރޭގައި ހިމެނޭ ރަސްމީ ކޯސްތަކާއި ޓްރެއިނިން ތަކުގެ ތެރޭގައި ސޮފްޓް ސްކިލްސް ޑިވެލޮޕްމެންޓް ޓްރެއިނިންގް ވެސް ހިމެނެއެވެ.
ދިރާގުން ބުނީ، މިހާތަނަށް އެޕްރެންޓިސްޝިޕް ޕްރޮގުރާމުން 200 އަށްވުރެ ގިނަ ޒުވާނުން ދަސްވެނިވެފައިވާ ކަމަށެވެ.
