ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން މި ހިނގާ 2020 ވަނަ އަހަރު ފެށުމާއެކު ސިޓީއެއްގެ ދަރަޖަދީފައިވާ ހދ. ކުޅުދުއްފުށީގައި ސިޓީ ކައުންސިލްގައި މޭޔަރެއްގެ އިތުރުން 6 ކައުންސިލަރުން ތިއްބަވާގޮތަށް ދައިރާތައް ބަހާލައިފި އެވެ.

ކުޅުދުއްފުށިގައި ސިޓީ ކައުންސިލެއް އިންތިހާބު ކުރުމަށް އިލެކްޝަންސް ކޮމިޝަނުން މަސައްކަތް ކުރަމުންދާއިރު، މުޅި ކުޅުދުއްފުށި ވަނީ 6 ދާއިރާއަކަށް ބަހާލާފަ އެވެ. އެހެންކަމުން އެއިން ކޮންމެ ދާއިރާއަކުން ކައުންސިލަރެއް އިންތިހާބު ކުރެވޭއިރު، މުޅި ކުޅުދުއްފުށި ސިޓީން ސިޓީ މޭޔަރެއް އިންތިހާބު ކުރެވޭނެ އެވެ.

ކުޅުދުއްފުށި ސިޓީ ކައުންސިލްގެ 6 ކައުންސިލަރުގެ ތެރޭގައި 2 އަންހެން ކައުންސިލަރުން ހިމެނޭނެ އެވެ. އަންހެން ކައުންސިލަރުންނަށް ހާއްސަ ކުރާ ދާއިރާތަށް ގުރުއަތު ނެގުމަށް ހަމަޖެހިފައިވަނީ، އިލެކްޝަންސް ކޮމިޝަނުން އެހެން ސިޓީތަކުގައި އަމަލު ކޮށްފައިވާގޮތަށް، ދާއިރާތަކުގެ ތަރުތީބުން، ކޮންމެ ތިން ދާއިރާއަކުން އަންހެން ކައުންސިލަރެއް ގުރުއަތުލައި، 6 ދާއިރާއިން 2 ދާއިރާ އަންހެން ކައުންސިލަރުންނަށް ހާއްސަ ކުރުމަށެވެ.

ކުޅުދުއްފުށީގައި ސިޓީގައި ސިޓީ މޭޔަރުގެ އިތުރުން 6 ކައުންސިލަރުން ތިއްބާއިރު، މާލެ ސިޓީގައި ސިޓީ މޭޔަރުގެ އިތުރުން 18 ކައުންސިލަރުން ހިމެނެއެވެ. އަދި އައްޑޫ ސިޓީގައި ސިޓީ މޭޔަރުގެ އިތުރުން 12 ކައުންސިލަރުން ހިމެނޭއިރު، ފުވައްމުލަކު ސިޓީގައި ސިޓީ މޭޔަރުގެ އިތުރުން 6 ކައުންސިލަރުން ހިމެނެ އެވެ.

މީގެއިތުރުން މާލޭ ސިޓީ ކައުންސިލްގައި 6 ދާއިރާއެއް އަންހެނުންނަށް ހާއްސަކުރެވޭއިރު، އައްޑޫ ސިޓީ ކައުންސިލްގައި 4 ދާއިރާއެއް އަންހެނުންނަށް ހާއްސަ ކުރެވެ އެވެ. އަދި ފުވައްމުލަކާއި ކުޅުދުއްފުށި ސިޓީ ކައުންސިލްގައި ދެ ދާއިރާ އަންހެނުންނަށް ހާއްސަކުރެވެ އެވެ.

އަންނަ އެޕްރީލް މަހުގެ ހަތަރު ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބަކީ ދިވެހިރާއްޖެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ބޮޑެތި އިސްލާހުތަކެއް ގެނެސް، ރައްޔިތުން އިތުރަށް ބާރުވެރިކުމަށާއި، މާލީ ބާރުވެރިކަން ކައުންސިލްތަކަށް ދިނުމަށް ނިންމަވާ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރިޔާސީ ވައުދުފުޅާއެއްގޮތަށް ބޭއްވޭ ފުރަތަމަ އިންތިހާބެވެ.

ލާމަރުކަޒީ ގާނޫނު ވުޖޫދުވެ، އެ ގާނޫނުގެ ދަށުން އެންމެ ފުރަތަމަ ކައުންސިލްތަކުގެ އިންތިހާބު ބާއްވާފައިވަނީ 2011 ވަނަ އަހަރުގެ ފެބްރުއަރީ ފަސް ވަނަ ދުވަހު އެވެ. އެގާނޫނުގެ ދަށުން މިހާތަނަށް ލޯކަލް ކައުންސިލްތަކުގެ ތިން އިންތިހާބު ބާއްވާފައިވާއިރު، އަންނަ އޭޕްރީލް މަހު ބާއްވާ އިންތިހާބަކީ ހުރިހާ ގޮތަކުން ވެސް ތަފާތު އިންތިހާބެކެވެ.