އިންތިހާބާގުޅޭ ގައުމީ ލަފާދޭ ކޮމެޓީގެ މިއަދުގެ ބައްދަލުވުމަށް ކޯރަމް ހަމައެއް ނުވި!
ކޮމެޓީގައި ތިއްބަވަނީ 30 މެމްބަރުން، ކޯރަމަކީ 10 މެމްބަރުން އިލެކްޝަންސް ކޮމިޝަނުގެ މެމްބަރުންނާއި އޮފިޝަލުން ނުލާ
އިންތިހާބާބެހޭ ގައުމީ ލަފާދޭ ކޮމެޓީގެ ބައްދަލުވުމެއްގެ ތެރެއިން
އިލެކްޝަންސް ކޮމިޝަނުގައި އޮންނަ "ލޯކަލް ކައުންސިލްތަކުގެ އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބު 2020" ގައުމީ ލަފާދޭ ކޮމެޓީން ބުރާސްފަތި ދުވަހު ބާއްވަން އޮތް ކޮމެޓީގެ ބައްދަލުވުމުގެ ކޯރަމް ހަމަނުވެގެން ކެންސަލް ކޮށްފި އެވެ.
ގައުމީ ލަފާދޭ ކޮމެޓީގެ ބުރާސްފަތި ދުވަހުގެ ބައްދަލުވުމުގެ އެޖެންޑާގައި ހަމައެކަނި އޮތީ، ކުޅުދުއްފުށީގެ ދާއިރާތައް ބެހުމާއި އަންހެނުންނަށް ހާއްސަ ދާއިރާތަކަށް ގުރުނެގުމާއި ގުޅޭގޮތުން މަޝްވަރާ ކުރުމެވެ.
އިންތިހާބާބެހޭ ގައުމީ ލަފާދޭ ކޮމެޓީގައި ހިމެނެނީ:
1. ރަޖިސްޓަރީވެފައިވާ ސިޔާސީ ޕާޓީތައް.
2. ހިއުމަން ރައިޓްސް ކޮމިޝަން އޮފް ދަ މޯލްޑިވްސް.
3. ސިވިލް ސަރވިސް ކޮމިޝަން.
4. މޯލްޑިވްސް ޕޮލިސް ސަރވިސް.
5. ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން.
6. މޯލްޑިވްސް މީޑިއާ ކައުންސިލް.
7. މޯލްޑިވްސް ބްރޯޑްކާސްޓިންގ ކޮމިޝަން.
8. އެންޓި ކޮރަޕްޝަން ކޮމިޝަން.
9. ޕްރޮސިކިއުޓަރ ޖެނެރަލްގެ އޮފީސް.
10. އެޓަރނީ ޖެނެރަލްގެ އޮފީސް.
11. ލޯކަލް ގަވަރމަންޓް އޮތޯރިޓީ.
12. ހިލޭސާބަހަށް މަސައްކަތްކުރާ ޖަމްޢިއްޔާތަކުގެ ތެރެއިން އިލެކްޝަންސް ކޮމިޝަނުން ކަނޑައަޅާ ޖަމްޢިއްޔާތައް.
ޤައުމީ ލަފާދޭ ކޮމެޓީީގައި އިލެކްޝަންސް ކޮމިޝަނުގެ ފަސް މެމްބަރުންނާއި ސެކްރެޓަރީ ޖެނެރަލާއި އެކޮމިޝަނުގެ ޤާނޫނީ ވަކީލަކު ހިމެނެއެވެ. އަދި މަދަނީ ޖަމްޢިއްޔާ، ޖަމާޢަތްތަކުގެ ތެރެއިން ތިން ޖަމްޢިއްޔާއެއް ޤައުމީ ލަފާދޭ ކޮމެޓީގައި ތަމްސީލު ކުރާއިރު، ޤައުމީ ލަފާދޭ ކޮމެޓީގައި ޖުމުލަ 30 މެމްބަރުން ހިމެނެ އެވެ. އެ ކޮމެޓީގެ ކޯރަމަކީ ސިލެކްޝަންސް ކޮމިޝަނުގެ މެމްބަރުންނާއި އެކޮމިޝަނުގެ އޮފިޝަލުން ނުހިމެނޭގޮތަށް 10 މެމްބަރުން ނެވެ.
އެކޮމެޓީގެ ބައްދަލުވުން ބުރާސްފަތި ދުވަހު ބާއްވަން ނިންމިއިރު، އިލެކްޝަންސް ކޮމިޝަނުން ވަނީ، ކުޅުއްދުފުށި ސިޓީއަކަށް ބަދަލުވެފައިވާތީ، އެ ސިޓީގެ ސިޓީ ކައުންސިލްގެ ދާއިރާތަށް ކަނޑައެޅުމާއި ސިޓީ ކައުންސިލްގައި އަންހެނުންނަށް ހާއްސަ ކުރެވޭ ދާއިރާތަށް ކަނޑައެޅުމަށް ގުރުއަތުލުމަށްޓަކައި ބުރާސްފަތި ދުވަހު ކުޅުދުއްފުއްޓަށް ވަޑައިގަންނަވާގޮތަށް ހަމަޖައްސާފަ އެވެ.
ބުރާސްފަތި ދުވަހު ބާއްވަން އެޖެންޑާކުރި ގައުމީ ލަފާދެ ކޮމެޓީގެ ބައްދަލުވުން ކޯރަމް ހަމަނުވެގެން ކެންސަލް ކުރިނަމަވެސް އެކޮމެޓީއަށް ހާޒިރުވި މެމްބަރުންނަށް ކުޅުދުއްފުށި ސިޓީ ކައުންސިލްގެ ދާއިރާތައް، ކުޅުއްފުށީގެ މިހާރުގެ ކައުންސިލުން ބަހާފައިވާ ގޮތާއި، ކޮމިޝަނުން ބަހަން ނިންމާފައިވާ ގޮތުގެ ތަފްސީލީ ރިޕޯޓަކާއެކު ކުރެހުމެއް ވަނީ ފޯރުކޮށްދެއްވާފަ އެވެ.
އިލްކެޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވީ، ކުޅުދުއްފުށި ސިޓީ ކައުންސިލެއް އިންތިހާބު ކުރާއިރު، ދާއިރާތައް ބަހާލަން ބޭނުންވާގޮތް އެކައުންސިލުން ފޯރުކޮށްދީފައިވާ ކަމަށެވެ. ނަމަވެސް އިލެކްޝަންސް ކޮމިޝަނުން ވަނީ ކުޅުއްދުއްފުށި ކައުންސިލްގެ އެހުށަހެޅުމަށް ކޮންމެވެސް ވަރަކަށް ބަދަލުތަކެއް ގެންނަވާފަ އެވެ.
ކުޅުއްދުއްފުށި ސިޓީ ކައުންސިލްގައި ސިޓީ މޭޔަރެއްގެ އިތުރުން 6 ކައުންސިލަރުން އިންތިހާބު ކުރެވޭނެ ކަމަށް އިލެކްޝަންސް ކޮމިޝަނުން ބުނެއެވެ. އެހެންކަމުން ދާއިރާތަކުގެ ތަރުތީބުން ގުރުއަތު ލާއިރު، ކޮންމެ ތިން ދާއިރާއަކުން ގުރުއަތުން ހޮވޭ އެއް ދާއިރާ ކަނޑައަޅާނީ އަންހެނުންނަށް ހާއްސަ ދާއިރާއެއްގެ ގޮތުގަ އެވެ. އެހެންކަމުން، 6 ހައުންސިލަރުންގެ ތެރެއިން ނުވަތަ 6 ދާއިރާގެ ތެރެއިން އަންހެނުންނަށް 2 ދާއިރާ ހާއްސަ ކުރެވޭނެ އެވެ.
