ޗައިނާއިން ހުޅުމާލޭގައި އެޅި ބައެއް ފްލެޓްތަކުގެ އިންސްޕެކްޝަން ފަށައިފި
ފްލެޓްތައް އެޅީ ޗައިނާ މެޝިނަރީ އިންޖިނިއަރިންގ ކޯޕަރޭޝަންއިން
ހުޅުމާލޭގައި އަޅާފައިވާ 704 ފެލްޓުގެ ތެރެއިން މަރާމާތު ކުރަންޖެހޭ ފްލެޓުތަކުގެ އިންސްޕެކްޝަން ހަދަނީ
ޗައިނާ މެޝިނަރީ އިންޖިނިއަރިންގ ކޯޕަރޭޝަން (ސީއެމްއީސީ) އާއި ޙަވާލުކޮށްގެން، ހުޅުމާލޭގައި ތަރައްޤީކޮށްފައިވާ 704 ފެލްޓުގެ ތެރެއިން، މަރާމާތު ކުރަންޖެހޭ ފްލެޓުތަކުގެ އިންސްޕެކްޝަން ފަށައިފިއެވެ.
އެކަމާ ގުޅޭގޮތުން މިނިސްޓްރީ އޮފް ހައުސިންގ އެންޑް އަރބަން ޑިވޮލޮޕްމަންޓުން ބުނީ، ހުޅުމާލެއިން އެންމެ ފަހުން ދޫކުރި 704 ފްލެޓުގެ ތެރެއިން މަރާމާތުކުރަން ބޭނުންވާ ފްލެޓްތަކުގެ އިންސްޕެކްޝަން ފަށައިގެން ކުރިޔަށްދާކަމަށާއި، އިންސްޕެކްޝަން ބުރާސްފަތި ދުވަހުގެ ނިޔަލަށް ކުރިއަށްދާނެ ކަމަށެވެ.
މި ފްލެޓުތަކުގައި އެއްވެސް މައްސަލައެއް ވާނަމަ މިހިނގާ ޖެނުއަރީ މަހުގެ 16 ވަނަ ދުވަހުގެ ކުރިން މިނިސްޓްރީއަށް ފޯމް ހުށައެޅުމަށް މިނިސްޓްރީން ވަނީ އެދިފައެވެ.
މި މަޝްރޫޢަކީ އޭރުގެ ސަރުކާރުގެ ގެދޮރުވެރިކުރުމުގެ ސިޔާސަތުގެ ދަށުން 1500 ހައުސިންގ ޔުނިޓް އިމާރާތް ކުރުމަށް ޗައިނާ މެޝިނަރީ އިންޖިނިއަރިންގ ކޯޕަރޭޝަން (ސީއެމްއީސީ) އާއި ޙަވާލުކޮށްގެން ހިންގި މަޝްރޫޢެކެވެ.
ނަމަވެސް މި ފްލެޓުތަކުގައި ފެން ލީކުވުމާއި، އެކި ކަހަލަ މައްސަލަތައް ހުރިކަމަށް ބުނެ ގިނަ ބަޔަކު ދަނީ ޝަކުވާ ކުރަމުންނެވެ.
