ހއ. ހޯރަފުށީ އެއަރޕޯޓުގައި އެއް ލައްކަ ގަސް އިންދުމުގެ ޕްރޮގުރާމު ފަށައިފި އެވެ.
ހޯރަފުށީގައި އަންގާރަ ދުވަހު ބޭއްވި ރަސްމިއްޔާތެއްގައި އެ ޕްރޮގުރާމް ފައްޓަވައި ދެއްވީ، އެ ރަށަށް ނިޞްބަތްވާ ޓްރާންސްޕޯޓް މިނިސްޓަރު ޢާއިޝަތު ނަހުލާ އެވެ. މި ރަސްމިއްޔާތުގައި އެ ދާއިރާގެ ރައްޔިތުންގެ މަޖިލިސް މެންބަރު އަޙްމަދު ސަލީމް ވެސް ބައިވެރިވެ ވަޑައިގަތެވެ.
ރާއްޖެއެމްވީއަށް މަޢުލޫމާތު ދެއްވަމުން ހޯރަފުށި ކައުންސިލްގެ ރައީސް އަޙްމަދު އިމްދާޙު ވިދާޅުވީ މި ޙަރަކާތަކީ ހޯރަފުށި ދާއިރާގެ މެންބަރު އަޙްމަދު ސަލީމާއި އެރަށު ކައުންސިލްގެ އިސްނެންގެވުމުގެ މަތިން ކުރިޔަށްގެންދަން ރާވާފައިވާ ޙަރަކާތެއް ކަމަށެވެ. މިކަމުގައި ހޯރަފުށީގެ އިދާރީ ހުރިހައި ކުންފުންޏެއް ވެސް ބައިވެރިވެއެވެ.
މީގެ އިތުރުން އިމްދާހު ވިދާޅުވީ ގަސް އިންދުމަށް ހަމަޖެހިފައިވަނީ އެއަރޕޯޓުގެ ހޭޅިފަށުގައި ކަމަށާއި ޢަމާޒަކީ އެއަޕޯޓުގެ ހުރިހާ ޞަރަޙައްދެއް ފެހި ކުރުން ކަމަށެވެ.
މިޙަރަކާތް ކުރިޔަށް ގެންދަނީ "ހޯރަފުށި އެއަރޕޯޓު ފެހި ކުރުން، އަހަރުމެން އެންމެންގެ ޒިންމާ" މި ޝިޢާރުގެ ދަށުންނެވެ.
މިއީ ހައިޑްސް، ފްރިގޭޓަރ، ޖޭއޭ މަނަފަރު ރިސޯޓުގެ އިތުރުން ރައްޔިތުންގެ ފުރިހަމަ ބައިވެރިވުމާއެކު ކުރިއަށް ގެންދާ ޙަރަކާތެކެވެ.
