2019 ނިމުނުއިރު ގްރީން ފަންޑުގައި 468 މިލިއަން ރުފިޔާ
ނިމިދިޔަ އަހަރުގެ ތެރޭގައި ގްރީން ފަންޑަށް 831 މިލިއަން ރުފިޔާ ލިބިފައިވޭ
މި ފަންޑު ބޭނުންކުރެވެނީ އުމްރާނީ އެކި މަޝްރޫއުތަކަށް
ތަފާތު އެކިއެކި މަޝްރޫއުތައް ހިންގުމަށް ސަރުކާރުން އުފައްދާފައިވާ ގްރީން ފަންޑުގައި 468 މިލިއަން ރުފިޔާގެ ބެލެންސެއް ހުރިކަމަށް ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީން އެންމެފަހުން އާންމުކުރި ގްރީން ޓެކްސް ރިޕޯޓުގައިވާ ގޮތުންނަމަ، 2019 ވަނަ އަހަރުގެ ނޮވެމްބަރު މަހުގެ ނިޔަލަށް ގްރީން ފަންޑުގައި ހުރީ 468،778،365.24 މިލިއަން ރުފިޔާއެވެ. މިދިޔަ އަހަރުގެ ނޮވެމްބަރު މަހުގެ ތެރޭގައި އެ ފަންޑަށް ޖަމާކުރެވިފައިވަނީ 73،151،612.16 މިލިއަން ރުފިޔާއެވެ.
ނޮވެމްބަރު މަހު ގްރީން ޓެކްސްގެ ގޮތުގައި ލިބުނު އާމްދަނީގެ ތެރެއިން އެކިއެކި މަޝްރޫއުތައް ހިންގުމަށް ހަރަދުކޮށްފައިވަނީ 29،887،419.97 ރުފިޔާއެވެ. އޭގެ ތެރެއިން އެންމެ ބޮޑު ހަރަދެއް ކޮށްފައިވަނީ ރަށް ރަށުގެ ފެނާ ނަރުދަމާ ނިޒާމު ގާއިމްކުރުމަށެވެ.
މިދިޔަ އަހަރު ގްރީން ފަންޑަށް އެންމެ ގިނައިން ފައިސާ ޖަމާކުރެވިފައިވާ މަސްތަކަށް ބަލާއިރު، ނޮވެމްބަރު މަހުގެ އިތުރުން ދެން އެންމެ ގިނައިން ފައިސާ ލިބިފައިވަނީ، ޖެނުއަރީ އާއި މޭ މަހާ ދޭތެރޭގައެވެ. ނޮވެމްބަރު މަހުގެ ނިޔަލަށް 2019 ވަނަ އަހަރުގެ ތެރޭގައި ގްރީން ފަންޑަށް 831 މިލިއަނަށް ވުރެ ގިނަ ރުފިޔާ ޖަމާކުރެވިފައިވާއިރު، އޭގެ ތެރެއިން 362 މިލިއަން ރުފިޔާވަނީ ތަފާތު އެކިއެކު މަޝްރޫއުތައް ހިންގުމަށް ހަރަދުކޮށްފައެވެ.
ގްރީން ފަންޑަކީ ކުރީގެ ރައީސް ޑރ.ވަހީދުގެ ވެރިކަމުގައި ފެނާއި، ނަރުދަމާ އާއި، އިއާދަކުރަނިވި ހަކަތައާއި، ކުނި މެނޭޖް ކުރުމުގެ ދާއިރާއިން އެކިއެކި މަޝްރޫޢުތައް ހިންގުމަށާއި، މިދާއިރާއިން މީހުން ބިނާކުރުމަށް ބޭނުންވާ ފައިސާ ހޯދުމަށް ދަތިވެފައިވާތީ، މިކަންކަމަށް ބޭނުންވާ ފައިސާ ހޯދާނެ ހަރުދަނާ ނިޒާމެއް ޤާއިމް ކުރުމަށާއި، މިދާއިރާތަކަށް ބޭރުގެ ފަރާތްތަކުން ލިބޭ އެހީ އިތުރުކުރުމަށް އުފެއްދި ފަންޑެކެވެ. މި ފަންޑަށް ފައިސާ ޖަމާކުރަނީ ގްރީން ޓެކުހުގެ ގޮތުގައި ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުގެ އަތުން ކޮންމެ ފަތުރުވެރިއެއްގެ ބޮލަކަށް ނެގޭ 6 ޑޮލަރުންނެވެ.
