ކުޅުދުއްފުށްޓަށް ސިޓީއެއްގެ ދަރަޖަ ދީފި
31 ޑިސެމްބަރު 2019 | އަންގާރަ 08:41މިކަން އިއުލާނުކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރެއްވި ޓްވީޓަކުން
ހދ. ކުޅުދުއްފުށި
އެކެއް ޖެނުއަރީން ފެށިގެން ހދ. ކުޅުދުއްފުށްޓަށް ސިޓީއެއްގެ ދަރަޖަ ދިނުމަށް ސަރުކާރުން ނިންމައިފިއެވެ.
މިކަން އިއުލާނުކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރެއްވި ޓްވީޓެއްގައެވެ.
ކުޅުދުއްފުށީގެ އާބާދީ 10،000 އަށް އަރާފައިވަނީ 2018 ވަނަ އަހަރުގެ ނޮވެމްބަރު މަހުގެ ތެރޭގައެވެ. އެގޮތުން އެރަށަށް ސިޓީއެއްގެ ދަރަޖަ ދިނުމަކީ ރައީސް ސޯލިޙުގެ ރިޔާސީ ވައުދުފުޅަކަށްވާއިރު، އާބާދީގައި 10،000 މީހުން ހަމަވެއްޖެނަމަ އެ ރަށަކަށް ސިޓީއެއްގެ ދަރަޖަ ދެވިގެންދާނެކަމަށް ޤާނޫނުގައި ބަޔާންކޮށްފައިވެއެވެ.
ކުޅުދުއްފުއްޓަށް ސިޓީއެއްގެ ދަރަޖަ ދިނުމަށް ނިންމަވާފައިވާއިރު، ލާމަރުކަޒީ ގާނޫނުގެ ދަށުން، ހދ. ކުޅުދުއްފުށީގައި ދެން އެންމެ އަވަހަކަށް ބޭއްވޭ އިންތިހާބު ވާންޖެހޭނީ ސިޓީ ކައުންސިލްގެ އިންތިހާބެއް ކަމަށް ދެކެވަޑައިގަންނަވާ ކަމަށް ކުޅުދުއްފުށި ކައުންސިލްގެ ރައީސްވެސް ވަނީ ވިދާޅުވެފައެވެ.
އިލެކްޝަންސް ކޮމިޝަނުން ސިޓީ ކައުންސިލްތަކުގެ ގޮނޑިތަކާއި ދާއިރާތައް އިއުލާން ކުރިއިރު، ކުޅުދުއްފުށި ރަށު ކައުންސިލްގެ ބަދަލު ސީޓީ ކައުންސިލެއް އިއުލާން ކޮށްފައިނުވާތީ ކުޅުދުއްފުށި ރައްޔިތުންނާއި ކައުންސިލުން ވަނީ ނުރުހުންފާޅުކޮށްފައެވެ. އެގޮތުން ސިޓީ ކައުންސިލަކަށް ވޯޓުލުން ނޫން އެހެން ގޮތެއް ކުޅުދުއްފުށި ރައްޔިތުން ބޭނުން ނުވާކަމަށް ކައުންސިލުން ބުނެފައިވެއެވެ.
