މަސައްކަތް ކުރަނީ ކޮރަޕްޝަނުގެ އަމަލުތައް ނުހިނގާނެ ގޮތަކަށް މަސައްކަތް ބައްޓަން ކުރުމަށް: ޝާހިދު
ކުންފުނީގައި ކޮރަޕްޝަންގެ އަމަލުތައް ހިންގުމުގެ ފުރުސަތު ނުދިނުމަށްޓަކައި ގިނަ މަސައްކަތްތަކެއް ކުރެވެމުންދާކަން ފާހަގަ ކުރެއްވި
އެމްޕީއެލްގެ ސީއޯ ޝާހިދު އަލީ
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މަސައްކަތް ކުރަމުންދަނީ މި ސަރުކާރުގެ ސިޔާސަތު ތަކާއި އެއްގޮތަށް ކޮރަޕްޝަނުގެ ޢަމަލުތައް ނުހިނގާނެ ގޮތަކަށް މަސައްކަތް ބައްޓަން ކުރުމަށް ކަމަށް އެކުންފުނީގެ ސީއީއޯ ޝާހިދު އަލީ ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުޚީ" ޕްރޮގުރާމުގަ ވާހަކަ ދައްކަވަމުން ޝާހިދު ވިދާޅުވީ މަޤާމާއި ޙަވާލުވުމަށްފަހު ކުންފުނީގައި ކޮރަޕްޝަނުގެ ޢަމަލުތައް ހިންގުމުގެ ފުރުޞަތު ނުދިނުމަށްޓަކައި ގިނަ މަސައްކަތްތަކެއް ކުރެވެމުންދާ ކަމަށެވެ.
އެގޮތުން އެންމެ މުހިންމު މަސައްކަތެއްގެ ގޮތުގައި ކޮށްފައިވަނީ ތަކެއްޗާއި ޚިދުމަތް ހޯދުމުގައި ޚާއްސަކޮށް ތަކެތި ގަތުމުގަ ގެންގުޅޭ ޕްރޮސެސް ވީހާވެސް ހުޅުވާލެވިގެން، ދެފުށްފެންނަގޮތައް، ޖަވާބުދާރީވެވޭފަދަ އުޞޫލަކަށް ބަދަލު ކުރުން ކަމަށެވެ. އޭގެ ތެރޭގައި ވަކި ޢަދަދަކަށް ވުރެ ބޮޑު އެއްޗެއް ގަންނަ ކަމަށް ވަނީނަމަ ކުރިޔަށްގެންދަނީ ޓެންޑަރ އުޞޫލުން ކަމަށް ޝާހިދު ވިދާޅުވިއެވެ. އަދި އެ ޓެންޑަރތައް ޢާންމު އުޞޫ ލުން ކުންފުނީގެ ވެބްސައިޓުގައި އަދި ސަރުކާރުގެ ގެޒެޓުގައި ޢާންމު ކުރާނެ ކަމަށެވެ.
ޢާންމުކުރާ މަޢުލޫމާތުގެ ތެރޭގައި މަޢުލޫމާތު ދޭނެ ދުވަހާއި ބިޑު ހުށަހަޅަން ޖެހޭ ދުވަހުގެ އިތުރަށް ބިޑު ހުށައެޅުމުގެ ކަންކަން ކުރިޔަށްދާނެ ގޮތްސާފުވާނެ ގޮތައް ހިމަނާފައިވާނެކަމަށެވެ. އަދި ބިޑުގެ ކަންކަން ކުރިޔަށްގެންދާނެ އުޞޫލު ހަރުދަނާ ކުރިޔަށްވުރެ މިހާރު ހަރުދަނާ ކޮށްފައިވާނެ ކަމަށް އޭނާ ވިދާޅުވިއެވެ.
ޚާއްޞަ މަސައްކަތެއްގެ ގޮތުގައި އެމްޕީއެލްގެ މަސައްކަތުގެ ތެރެއިން ކޮރަޕްޝަނަށް ފުރުޞަތު ނުދިނުމަށް ޚާއްޞަ މަސައްކަތްތަކެއް ކުރާނެކަމަށް ޝާހިދު ވިދާޅުވިއެވެ. އެގޮތުން އެމްޕީއެލް ހިންގުމާއި، ގަވަރނެންސް ހަރުދާނާކޮށް، ކޯޕަރޭޓް ގަވަރނެންސް ކޯޑާއި އެއްގޮތައް އެމްޕީއެލްގެ މަސައްކަތްތައް ބައްޓަން ކުރަމުން އަންނަކަން ފާހަގަކުރެއްވިއެވެ. ހަމަ އެއާއެކު، ކުންފުނި އޮޑިޓްކުރުމުގެ ކަންކަން ހަރުދަނާކޮށް، ކުންފުނީގެ އިންޓަރނަލް ޑިޕާރޓްމަންޓަކީ މެނޭޖުމެންޓުން ބޭރުން ބޯޑަށް ރިޕޯޓުކުރަންޖެހޭ ޑިޕާރޓްމަންޓެގެއް ގޮތުގައި މިހާރު ކަނޑައަޅާފައިވާ ކަމަށް ވިދާޅުވިއެވެ.
