ސައުދީގައި އާ އަހަރު ފާހަގަކުރަން ބާއްވަން އުޅުނު ޝޯ ހުއްޓުވައިފި
29 ޑިސެމްބަރު 2019 | އާދީއްތަ 04:24ޝޯ ބާއްވަން ނިންމާފައިވަނީ ވެރިރަށް ރިޔާދުގައި
ސައުދީ އަރަބިޔާ
ސައުދީއަރަބިޔާގައި އާ އަހަރު ފާހަގަކުރުމަށް ބާއްވަން އުޅުނު އިވެންޓް ހުއްޓުވައިފިއެވެ.
މީގެ ދުވަސްތަކެއް ކުރިން ސައުދީގެ މީޑިއާތަކުން ރިޕޯޓްކޮށްފައިވާގޮތުން ކުލަގަދަ ގޮތެއްގައި ވެރިރަށް ރިޔާދުގެ އުތުރުގައި އޮންނަ މެލްހަމް ސިޓީގައި އާ އަހަރު ފާހަގަކުރުމަށް ހަމަޖެހިފައިވެއެވެ. މީޑިއާތަކުން ރިޕޯޓްކޮށްފައިވާގޮތުން އާ އަހަރު ފާހަގަކުރަން ބާއްވާ ޝޯގައި ޑީޖޭގެ އިތުރުން ހަވާ އަރުވާނެއެވެ.
ސައުދީގައި މުނިފޫހިފިލުވުމުގެ އިވެންޓްތައް ބަލަހައްޓާ ޖެނެރަލް އެންޓަޓައިންމެންޓްގެ އޮތޯރިޓީން ބުނީ، މެލްހަމްގައި އާ އަހަރު ފާހަގަކުރުމަށް ލައިސެންސް ދޫކޮށްފައިނުވާ ކަމަށެވެ.
ރިޔާދުގެ ގަވަރުނަރުގެ އޮފީހުން އާ އަހަރު ފާހަގަކުރަން ބޭއްވި ޕާޓީ ހުއްޓުވާފައިވާއިރު، އެކަން އިންތިޒާމްކުރި މީހާއާ ދެކޮޅަށް ގާނޫނީ ފިޔަވަޅު އަޅައިދިނުމަށް ވަނީ އެދިފައެވެ.
ފާއިތުވި އަހަރުތަކުގައި ސައުދީން ވަނީ އެ ގައުމުގެ ސިޔާސާތުތަކަށް ބޮޑެތި ބަދަލުތަކެއް ގެނެސްފައެވެ. އެގޮތުން އަންހެނުންނަށް ކާރު ދުއްވުމުގެ ހުއްދައާއި ގިނަ ދުވަސްތަކެއް ބަންދުކޮށްފައިވާ ސިނަމާތަައްވެސް އާއްމުންނަށް ވަނީ ހުޅުވާލާފައެވެ.
