ކޯޓުން ބޭރުން ދަރިންގެ ކައިވެނި ކުރުވި މީހެއް މާޅޮހުން ހައްޔަރުކޮށްފި
މި މައްސަލައިގައި ހައްޔަރުކޮށްފައިވަނީ އުމުރުން 45 އަހަރުގެ މީހެއް
އއ މާޅޮސް
ދީނީ ހަރުކަށި ފިކުރަށް ތާއީދުކޮށް، ޝަރުއީ ކޯޓުން ބޭރުން ދަރިންގެ ކައިވެނި ކުރުވި މީހެއް އއ. މާޅޮހުން ހައްޔަރުކޮށްފިއެވެ.
އެކަމާގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ، މި މައްސަލައިގައި ހައްޔަރުކޮށްފައިވަނީ އުމުރުން 45 އަހަރުގެ ދިވެހި ފިރިހެނެއް ކަމަށާއި، އޭނާ ހައްޔަރުކޮށްފައިވަނީ ހޮނިހިރު ދުވަހު މެންދުރު 11:44 ހާއިރު ކަމަށެވެ.
އޭގެ އިތުރުން، އޭނާއަކީ ހަރުކަށި ފިކުރަށް ތާއީދުކޮށް، އެ ފިކުރު ފަތުރާކަމަށް ތުހުމަތު ކުރެވޭ މީހެއް ކަމަށާއި، އޭނާ ދަރިން ބެލުމުގައި އިހުމާލުވެފައިވާކަމަށް ތުހުމަތު ކުރެވޭ ކަމަށް ފުލުހުން ބުނެފައިވެއެވެ.
އެގޮތުން ދަރިންނަށް ލިބެންޖެހޭ އަސާސީ ޙައްޤުތަކުން މަޙުރޫމުކޮށް، ބައެއް ދަރިން 18 އަހަރު ނުވަނިސް ކޯޓުން ބޭރުގައި ކައިވެނި ކުރުވާފައިވާކަމުގެ ތުހުމަތުތައްވެސް އޭނާގެ މައްޗަށް ވަނީ ކުރެވިފައެވެ.
ހަރުކަށި ފިކުރުތައް ފަތުރާކަމުގެ ތުހުމަތުގައި ފުލުހުންގެ ބެލުމުގެ ދަށަށް ބައެއް މީހުން ގެންގޮސް، ފުލުހުންގެ އޮޕަރޭޝަންތައް ވަރުގަދަކުރަމުންދާއިރު، އެފިކުރު ފަތުރަން ގިނަގުނަ ރޭވުންތައް ރާވާ، އެކަން ފެތުރުމަށްޓަކައި ބަޔަކު މަސައްކަތް ކުރަމުންދާ ކަމަށް ނޭޝަނަލް ކައުންޓަރ ޓެރަރިޒަމް ސެންޓަރ (އެންސީޓީސީ) އިންވެސް ވަނީ ބުނެފައެވެ.
އެގޮތުން އެފަދަ ނުރައްކާތަކާއި މެދު ސަމާލުވެ، ހަރުކަށި ފިކުރު ފަތުރާ ފަރާތްތަކާއި ބެހޭ މައުލޫމާތު ސަލާމަތީ ޚިދުމަތްތަކަށް ފޯރުކޮށްދެއްވަމުން ގެންދެވުމަށް އެ ސެންޓަރުންވަނީ އިލްތިމާސްކޮށްފައެވެ.
