އިންޓަރނެޓް ކަނޑާލުމުން މުވާސަލާތީ ޚިދުމަތްދޭ ފަރާތްތަކަށް ބޮޑު ގެއްލުމެއް!
28 ޑިސެމްބަރު 2019 | ހޮނިހިރު 08:40އުއްތަރް ޕްރަދޭޝްގެ އެކި ހިސާބުތަކުން އިންޓަރނެޓް ކަނޑާލާފައިވޭ
އިންޑިއާގައި ކުރަމުންދާ މުޒާހަރާތަކުގެ ތެރެއިން
އިންޑިއާގެ ރަށްވެހިކަމުގެ ޤާނޫނަށް ގެނައި ބަދަލާއެކު ކުރަމުންދާ މުޒާހަރާތަކާއި ގުޅިގެން އެޤައުމުގެ އެކި ހިސާބުތަކުން އިންޓަރނެޓް ކަނޑާލުމުން މުވާސަލާތީ ޚިދުމަތް ދޭ ފަރާތްތަކަށް ބޮޑު ގެއްލުމެއް ލިބިއްޖެއެވެ.
ބުރާސްފަތި ދުވަހުގެ ރޭ އިންޑިއާގެ އުއްތަރް ޕްރަދޭޝްގެ އެކި ހިސާބުތަކުން އިންޓަރނެޓް ކަނޑާލާފައިވާއިރު، އުއްތަރްޕްރަދޭޝްއަކީ އިންޑިއާގައި ކުރަމުންދާ މުޒާހަރާތައް އެންމެ ހޫނުވެފައިވާ އެއް ތަނެވެ.
އެކަމުގެ ސަބަބުން އިންޑިއާގެ މުވާސަލާތީ ޚިދުމަތް ފޯރުކޮށްދޭ ފަރާތްތަކަށް ކޮންމެ ގަޑިއިރަކަށް 24.5 މިލިއަން ރުޕީސް (350،000 ޔޫއެސް ޑޮލަރު) ގެ ގެއްލުން ލިބެމުންދާކަމަށް އެ ޤައުމުގެ ނޫސްތަކުން ރިޕޯޓްކޮށްފައިވެއެވެ.
އޭގެ އިތުރުން، އިންޑިއާގެ ވެރިރަށް ނިއު ދިއްލީންވެސް ހޯމް ބްރޯޑްބޭންޑް ޚިދުމަތްތައް 24 ގަޑިއިރަށް މެދުކެނޑިދާނެ ކަމަށް ޚިދުމަތް ފޯރުކޮށްދޭ ފަރާތްތަކާއި ހަވާލާދީ ނޫސްތަކުން ރިޕޯޓް ކޮށްފައިވެއެވެ.
ތަފާސްހިސާބުތައް ދައްކާގޮތުން އިންޑިއާއަކީ މީސްމީޑިއާގެ އެޕްލިކޭޝަންތައް ކަމަށްވާ ފޭސްބުކާއި ވަޓްސްއެޕް އެންމެ ގިނައިން ބޭނުންކުރާ އެއް ޤައުމެވެ. އޭގެ އިތުރުން، އިންޑިއާ ރައްޔިތުން އެވްރެޖްކޮށް ކޮންމެ މަހަކު 9.8 ގިގަބައިޓްގެ ޑާޓާ ސްމާޓް ފޯނުތަކުން ބޭނުންކުރާކަމަށް ތަފާސްހިސާބުތަކުން ދައްކައެވެ.
މިހިނގާ ޑިސެމްބަރު މަހުގެ 11 ވަނަ ދުވަހު އިންޑިއާގެ ޤާނޫނު ހަދާ މަޖިލީހުން ރަށްވެހިކަމުގެ ޤާނޫނަށް ބަދަލު ގެނެސް ފާސްކޮށްފައިވާއިރު، ޕާކިސްތާން، ބަންގްލަދޭޝް އަދި އަފްޢާނިސްތާނުގެ މުސްލިމުންނަށް ރަށްވެހިކަން ނުލިބޭ ގޮތަށް ފާސްކުރި މި ބިލާއި ދެކޮޅަށް އަޑުއުފުލާ ފަރާތްތަކުން ބުނަމުންދަނީ މި ބިލަކީ އިންޑިއާގެ ޤާނޫނުގައި އެއްވެސް ދީނަކަށް ބެލުމެއް ނެތި، ހަމަހަމަކަމާއި އެކު އެންމެންނާ މެދު އަމަލުކުރަން ބުނެފައިވާ ބުނުމާއި ދެކޮޅަށް ފާސްކޮށްފައިވާ ބިލެއް ކަމަށެވެ.
މުސްލިމުން އިސްތިސްނާވި ނަމަވެސް މި ބިލު ގާނޫނަކަށް ވެގެން ދިޔުމުން 2015 ވަނަ އަހަރު ކުރިން އެ ތިން ގައުމުން އިންޑިއާ އަށް ހިޖުރަ ކޮށްފައިވާ ބުޑިސްޓުން، ކްރިސްޓިއަނުން، ހިންދޫން، ޖެއިން އަދި ޕާރިސީސްގެ އިތުރުން ސިކުންނަށް އިންޑިއާގެ ރައްޔިތުކަން ލިބޭނެއެވެ.
