މަސްތުވާތަކެތީގެ ވިޔަފާރި ކުރާ ފަރާތްތަކަށް މަރުގެ އަދަބު ދިނުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވައިފި އެވެ.

މަސްތުވުމަށް ބޭނުންކުރާ ތަދުކަނޑުވާ ބޭހަށް ދެވިހިފުން އެމެރިކާގައި އާއްމުވެ، އެކަމުގެ ސަބަބުން ދިމާވަމުންދާ މައްސަލަތަކުން އަރައިގަތުމަށް އެކުލަވާލާފައިވާ ޕްލޭން އާ ބެހޭ ގޮތުން ނިއު ހެމްޕްޝަޔަރ ގައި ވާހަކަ ދައްކަވަމުން ޓްރަމްޕް ވިދާޅުވީ، އެކަމަށް ހައްލެއް ހޯދުމަށް މަސްތުވާތަކެތީގެ ވިޔަފާރި ކުރާ ފަރާތްތަކާއި ދެކޮޅަށް ހަރުކަށި ފިޔަވަޅު އަޅަންޖެހޭ ކަމަށެވެ. އަދި އެކަމަށް ހައްލެއް ހޯދޭނީ ކަމާއިގުޅޭ ގާނޫނުތައް އިސްލާހު ކޮށްގެން ކަމަށާއި ސަރުކާރުން އެމަސައްކަތް ކުރަމުންދާ ކަމަށް ޓްރަމްޕް ވިދާޅުވި އެވެ.

ނިއު ހެމްޕްޝަޔަރ އަކީ މަސްތުވުމަށް ބޭނުންކުރާ އޯޕިއޮއިޑްސްގެ ބާވަތްތަކަށް ދެވިހިފާ މީހުންގެ އަދަދު، ނިސްބަތުން ގިނަ ސްޓޭޓެކެވެ.

އެމެރިކާގެ އާބާދީގެ ތެރެއިން ގާތްގަނޑަކަށް 2.4 މިލިއަން މީހުންނަކީ މަސްތުވާތަކެއްޗަށް ދެވިހިފާފައިވާ މީހުން ކަމަށް އަންދާޒާކުރެވިފައިވެއެވެ. އަދި މަސްތުވާތަކެތީގެ ސަބަބުން 2016 ވަނަ އަހަރު އެކަނިވެސް އެމެރިކާގައި 63 ހާހަށްވުރެ ގިނަ މީހުން މަރުވެފައިވާ ކަމަށް އެމެރިކާގެ ސިއްހީ އޮފިޝަލުންގެ ތަފާސްހިސާބުތަކުން ދައްކައެވެ.

ނިއު ހެމްޕްޝަޔަރގެ މެންޗެސްޓަރގައި ހޯމަ ދުވަހު ބޭއްވި ހަފްލާއެއްގައި ވާހަކަ ދައްކަވަމުން ޓްރަމްޕް ވަނީ، މަސްތުވާތަކެތީގެ ވިޔަފާރި ކުރާ ފަރާތްތަކާއި ދެކޮޅަށް ހަރުކަށި ފިޔަވަޅު ނާޅައިފިނަމަ، އެއީ ވަގުތު ބޭކާރު ކުރުން ކަމަށާއި، ހަރުކަށި ފިޔަވަޅުތަކުގެ ތެރޭގައި މަރުގެ އަދަބު ހިމެނޭ ކަމަށް ވިދާޅުވެފައެވެ.

ޓްރަމްޕްގެ މި ވާހަކަތަކަށް އެބައްދަލުވުމުގައި ބައިވެރިވި ފަރާތްތަކުން ހޫނު ތަރުހީބެއް ދީފައިވެއެވެ.

މިދިޔަ ފެބްރުއަރީ މަހު ޕެންސިލްވޭނިއާގައި ބޭއްވި ބައްދަލުވުމެއްގައިވެސް ޓްރަމްޕް ވަނީ މަސްތުވާތަކެތީގެ ވިޔަފާރި ކުރާ ފަރާތްތަކަށް ހަރުކަށި އަދަބު ދިނުމާއި ގުޅޭ ގޮތުން ވާހަކަ ދައްކަވާފައެވެ.