ޚަޝޯގީގެ މަރުގެ މައްސަލައިގައި ޒިންމާވާ ފަރާތްތަކަށް ފިޔަވަޅު އެޅުމަށް މެކްރޮން ގޮވާލައްވައިފި
28 އޮކްޓޯބަރު 2018 | އާދީއްތަ 00:13ޚަޝޯގީ މަރާލާފައިވަނީ ކުރިން ރާވައިގެންކަމަށް ސައުދީންވެސްވަނީ ބުނެފައި
މެކްރޮންވަނީ ޒިންމާވާ ފަރާތްތަކުގެ މައްޗަށް އެޅެންވާނީ ވަރުގަދަ އަދި އެކަށީގެންވާ ފިޔަވަޅުތަކެއްކަމަށް
ސައުދީ އަރަބިއާގެ ނޫސްވެރިޔާ ޖަމާލް ޚަޝޯގީގެ މަރުގެ މައްސަލައިގައި ޒިންމާވާ ފަރާތްތަކާމެދު ދަތިކުރުމުގެ ފިޔަވަޅު އެޅުމަށް ފްރާންސްގެ ރައީސް އެމަނުއެލް މެކްރޮން ގޮވާލައްވައިފިއެވެ.
"ފުރަތަމަކަމަކަށް އަޅުގަނޑަށް ކަންކަން ވަރަށް ސާފު. ބައެއް ހަގީގަތްތައް ހުރީ ހާމަކޮށްފައި.މި ހަގީގަތްތަކުގެ އަސްލު ދެން ތަހުގީގުކުރަންވީ އަދި ޒިންމާވަނީ ކާކުކަން"ތުރުކީގެ އިސްތަންބޫލްގައި ކުރިޔަށްދާ ސީރިޔާ ސަމިޓްގެ ހަވާސާގައި ރިޕޯޓަރުންނާ ބައްދަލުކުރައްވައި މެކްރޮން ވިދާޅުވިއެވެ.
އިސްތަންބޫލްގައި ކުރިޔަށްދާ ސީރިޔާ ސަމިޓްގައި ތުރުކީ،ޖަރުމަނުވިލާތް، އަދި ރަޝިއާގެ ވެރިން ބައިވެރިވެ ވަޑައިގަންނަވައެވެ.
މެކްރޮން ވިދާޅުވީ ފިޔަވަޅު އަޅަންވީ އެ އަސާސްތަކުގެ މައްޗަށް ބިނާކޮށް ކަމަށާއި އެ ފިޔަވަޅު ވާންޖެހޭނޭ ގުޅިގެން ފުރިހަމައަށް އަދި އިންތިހާއަށް ވަރުގަދަ އަދި އެކަށީގެންވާ ފިޔަވަޅަކަށް ކަމަށެވެ.
ޖަރުމަނުގެ ޗާންސެލަރ އަންގެލާ މާކެލް ވިދާޅުވިގޮތުގައި ފަރަންސޭސި ރައީސްއާއި އެކަމަނާ ވަނީ ސައުދީ އަރަބިއާއަށް ހަތިޔާރު ވިއްކުމާމެދު ޔޫރަޕިއަން ޔޫނިއަންއިން އެއްގޮތަކަށް އަމަލުކުރުމަށް ގޮތްތަކެއް ހޯދުމަށް އެއްބަސްވެފައެވެ.
އިސްތަންބޫލްގައި ނޫސްވެރިންނާ ވާހަކަދައްކަވަމުން މާކެލް ވިދާޅުވީ މި މައްސަލައިގެ ފަހަތުގައި ވަނީ ކާކުކަން އެނގުމާއެކު ޔޫރަޕިއަން ޔޫނިއަންއިން ގުޅިގެން ހައްލެއް ނުވަތަ ހުރިހާ ގައުމަކުން އަޅާނެ ފިޔަވަޅަކަށް މަޝްވަރާ ކުރެވޭނެކަމަށެވެ.
ޗާންސެލަރ މާކެލްވަނީ ޚަޝޯގީގެ މަރުގެ މައްސަލަ ސާފުކޮށްދެން ދެން ސައުދީއަށް ޖަރުމަނުން ހަތިޔާރު ވިއްކުން ހުއްޓާލުމަށް ވައުދުވެ ވަޑައިގެންފައެވެ.
ޚަޝޯގީ ގެއްލިފައި ވަނީ އޮކްޓޯބަރ މަހުގެ 2 ވަނަ ދުވަހު ސައުދީގެ ކޮންސިއުލޭޓަށް ލިއުމެއް ބަލާ ދިއުމަށް ފަހުއެވެ. އޭގެ ފަހުން ކޮންސިއުލޭޓުން ނުކުމެފައި ނުވާއިރު އޭނާ މަރާލާފައިވާ ކަމަށް ތުރުކީގެ ތަހުގީގު ޓީމުން ތަކުރާރުކޮށް ބުނަމުންދިއައިރު ސައުދީން ވަނީ އޮކްޓޯބަރު މަހުގެ 20 ވަނަ ދުަވަހާ ޖެެހެންދެން ވެސް އެ ތުހުމަތުތައް ދޮގުކޮށްފައެވެ.
