ކަޒަކިސްތާނުގެ ފްލައިޓެއް ވެއްޓި މަރުވި މީހުންގެ އަދަދު 9އަށް!

ފަސިންޖަރުން ގޮވައިގެން ދަތުރުކުރި ފްލައިޓެއް ކަޒަކިސްތާނަށް ވެއްޓި، މަރުވި މީހުންގެ އަދަދު 9 އަށް އަރައިފިއެވެ.

ހުކުރު ދުވަހު ހިނގި މި ހާދިސާގައި މިހާތަނަށް 9 މީހަކު މަރުވެފައިވާކަން ރިޕޯޓްތަކުން ކަށަވަރުކޮށްދީފައިވާއިރު، މި އަދަދު އިތުރުވާނެ ކަމަށް ބެލެވޭ ކަމަށް ކަމާއިބެހޭ ފަރާތްތަކުން ބުނެއެވެ. 100 ފަސިންޖަރުންނާއެކު ދަތުރުކުރި މި ފްލައިޓް ވެއްޓިފައިވަނީ ކަޒަކިސްތާނުގެ އެންމެ ބޮޑު ސިޓީ ކަމަށްވާ އަލްމަޓީއަށެވެ.

ރިޕޯޓްތައް ބުނާގޮތުން މިހާދިސާގައި 9 މީހަކު މަރުވެ، 9 މީހަކަށް ވަނީ އެކިވަރުގެ އަނިޔާތައް ލިބިފައެވެ. އަދި އޭގެ ތެރޭގައި ކުޑަކުދިންވެސް ހިމެނޭކަމަށް ކަމާއިބެހޭ ފަރާތްތަކުން މައުލޫމާތުދެއެވެ. އެގޮތުން މި ފްލައިޓް އަލްމަޓީ އިން ކަޒަކިސްތާނުގެ ވެރިރަށް ނޫރް ސުލްތާންއަށް ދަތުރު ކުރަނިކޮށް ވަކި ހިސާބަކުން ރާޑަރުން ގެއްލުނު ކަމަށް ރިޕޯރޓްތައް ބުނެއެވެ.

ކަޒަކިސްތާނުގެ ބެކް އެއާލައިނަށް ނިސްބަތްވާ މި ބޯޓު ވެއްޓުނު ސަރަޙައްދުގައި އޮފިޝަލުން ހަރަކާތްތެރިވަމުންދާއިރު، ފްލައިޓު ވެއްޓުނު ސަރަޙައްދުގައި އަލިފާނުގެ އަސަރެއް ނެތް ކަމަށް އެ ޤައުމުގެ ނޫސްތަކުން ރިޕޯޓް ކޮށްފައިވެއެވެ.