މަޢުލޫމާތު ހާމަކުރުމުގެ "ރަން ވަނަ އެވޯޑް"ގަ ނޫސްވެރިކަމުގެ ދާއިރާ ހިމަނައިފި
26 ޑިސެމްބަރު 2019 | ބުރާސްފަތި 12:30އެންމެ ފާހަގަކޮށްލެވޭ ނޫސްވެރިޔާ، އަދި ނޫސް އެޖެންސީ ހޮވުމަށް ނިންމާފައިވޭ
އިންފޮމޭޝަން ކޮމިޝަނަރުގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން-
އިންފޮމޭޝަން ކޮމިޝަނަރުގެ އޮފީހުން ކޮންމެ އަހަރަކު ދެމުން އަންނަ "ރަން ވަނަ އެވޯޑް" ނޫސްވެރިންނަށާއި ނޫސް އެޖެންސީތަކަށް ވެސް ލިބޭ ގޮތަށް ހަމަޖައްސަައިފި އެވެ.
އިންފޮމޭޝަން ކޮމިޝަނަރު އޮފީހުގައި ބުރާސްފަތި ދުވަހު ބޭއްވި ބައްދަލުވުމުގައި އިންފޮމޭޝަން ކޮމިޝަނަރު ހުސައިން ފިޔާޒު މޫސާ ވިދާޅުވީ، މަޢުލޫމާތު ހޯދާ ލިބިގަތުމުގެ ޙައްޤުގެ ޤާނޫނުގެ ދަށުން އެ އޮފީހުން ދެމުން އަންނަ އެވޯޑަށް މަޢުލޫމާތު ހޯދާ، އަދި އެމަޢުލޫމާތު ހާމަކުރުމުގައި އެންމެ ރަނގަޅަށް މަސައްކަތްކުރި ނޫސްވެރިޔާ އާއި ނޫސް އެޖެންސީތަކުގެ ތެރެއިން އެންމެ ރަނގަޅަށް މަސައްކަތްކުރި ނޫސް އެޖެންސީ ވެސް ހޮވާނެ ކަމަށެވެ. އަދި ނޫސް އެޖެންސީތަކުގެ ތެރޭގައި، ނޫސްތަކާއި ނޫސް ވެބްސައިޓުތަކާއި ޓީވީ އަދި ރޭޑީއޯ ވެސް ހިމެނޭނެ ކަމަށެވެ.
މީގެއިތުރުން، އަމިއްލަ ޖަމްޢިއްޔާ ޖަމާޢަތްތަކުގެ ތެރެއިން، އެންމެ ފާހަގަކޮށްލެވޭ ޖަމްޢިއްޔާ ނުވަތަ ޖަމާޢަތާއި އަދި އެންމެ ރަނގަޅު އިންފޮމޭޝަން އޮފިޝަނަރު ހޮވުމަށް ނިންމާފައިވާ ކަމަށެވެ. މި ހަތަރު ކެޓަގަރީއަކީ މުޅިން އަލަށް ދެވޭ އެވޯޑްތަކެއް ކަމަށް ވެސް އިންފޮމޭޝަން ކޮމިޝަނަރު ވިދާޅުވި އެވެ.
އިންފޮމޭޝަން ކޮމިޝަނަރުގެ އޮފީހުން ދޭ ރަން ވަނަ އެވޯޑް މީގެ ކުރިން ދެމުން އަންނަނީ ދައުލަތުގެ އިދާރާތަކުގެ ތެރެއިން ކޮންމެ އަހަރަކު ވެސް އެންމެ ރަނގަޅަށް މަޢުލޫމާތު ހާމަކުރާ އިދާރާއަކަށެވެ.
ފިޔާޒު ވިދާޅުވީ، މަޢުލޫމާތު ހޯދުމުގެ ރަން ވަނައިގެ އެވޯޑް، އަންނަ އަހަރު ތަފާތު 10 ކެޓަގަރީއަކުން ދޭނެ އެވެ. އެގޮތުން، އަލަށް ތަޢާރަފު ކުރެެވޭ ހަތަރު އެވޯޑާއެކު، ރައީސް އޮފީހާއި ސަރުކާރުގެ ވުޒާރާތައް ހިމެނެނީ ވަކި ކެޓަގަރީއެއްގަ ކަމަށެވެ. ރައްޔިތުންގެ މަޖިލީހާއި މިނިވަން މުއައްސަސާތައް ހިމެނެނީ ވަކި ކެޓަގަރީއެއްގަ، އަދި ޝަރުޢީ ދާއިރާއަށް ވެސް ވަކި ކެޓަގަރީއެއް ޚާއްޞަކޮށްފައިވާ ކަމަށެވެ.
އޭގެ އިތުރުން، ސިޓީ ކައުންސިލްތަކާއި، އަތޮޅު ކައުންސިލްތަކާއި، ރަށު ކައުންސިލްތަކަށް ޚާއްޞަ ކެޓަގަރީއަކާއި. ޔުނީފޯމް އެޅި އިދާރާތަކަށް ވެސް ވަކި ކެޓަގަރީއެއްގެ އެވޯޑު ދޭއިރު، ސަރުކާރުގެ ކުންފުނިތަކުގެ ތެރެއިން އެންމެ ފާހަގަ ކޮށްލެވޭ ކުންފުނި ވެސް ހޮވާނެ ކަމަށް އިންފޮމޭޝަން ކޮމިޝަނަރު ވިދާޅުވި އެވެ.
