ރާއްޖޭގެ ރިސޯޓުތަކުގައި މަސައްކަތްކުރާ ދިވެހިންނަށް އެކަށީގެންވާ ސަރވިސް ޗާޖް ރިސޯޓުތަކުންދޭ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވުމުން ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަަކުގެ އިތުރުން އާއްމުންގެ ގިނަ ބައެއްގެ ފާޑުކިޔުން އަމާޒުވެއްޖެއެވެ.
ޓޫރިޒަމް މިނިސްޓްރީން ބުދަ ދުވަހު ބޭއްވި ޕްރެސްކޮންފަރެންސެއް ގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އަލީ ވަހީދު ވިދާޅުވީ، ގިނަ ރިސޯޓުތަކުން މުވައްޒަފުންނާ މެދު އަމަލު ކުރަމުން އަންނަނީ ރަނގަޅަށް ކަމަށެވެ. އަދި ވަކިން ހާއްސަކޮށް ދިވެހިން ހިންގަމުން އަންނަ ރިސޯޓުތަކުން ރަނގަޅު ސަރވިސް ޗާޖުތަކެއް ދެމުން އަންނަކަން ފާހަގަކުރެވިފައިވާ ކަމަށް ވިދާޅުވިއެވެ.
އަލީ ވަހީދުގެ އެވާހަކަތަކާއި އެކު ފަތުރުވެރިކަމުގެ ސިނާއަތުގައި މަސައްކަތްކުރާ ގިނަ މުވައްޒަފުންތަކެއް ވަނީ އެ މީހުންގެ ޝުއޫރުތައް ޝޯޝަލް މީޑިއާގައި ބަންޑުން ކޮށްލާފައެވެ.
އެކަމާއި ގުޅިގެން ރިސޯޓެއްގައި މަސައްކަތް ކުރާ މީހަކު ވަނީ ޓްވިޓާ މެދުވެރިކޮށް މިނިސްޓަރަށް ސުވާލެއް ކުރިމަތި ކޮށްފައެވެ. ''ރިސޯޓް އޯނަރސް އަތުން ކިހާވަރެއްތޯ ލިބެނީ''؟ އަދި އަލީ ވަހީދު ވިދާޅުވާ ހައްގު މިންވަރަށް ސަރވިސް ޗާޖު ލިބޭ ކަމަށް ބުނެ އޭނާ ވަނީ ސަމާސާ ރާގަކަށް ފާޑު ކިޔާފައެވެ.
މޫސާ މަޖީދު ކިޔާ މީހަކު ކުރި ޓްވީޓެއްގައި އޭނާ ވަނީ، ރިސޯޓް ރޫމް ބޯއި އެއްގެ މަގާމު އެންމެ މަސްދުވަހަށް ނަމަވެސް އަދާކޮށްލެއްވުމަށް އަލީ ވަހީދަށް ދައުވަތު ދެއްވާފައެވެ. އަދި އެއަށް ފަހު ސަރވިސް ޗާޖު ދެނީ ރަނގަޅު މިންވަރަށްތޯ އިންސާފު ކޮށްލަދެއްވުމަށް އޭނާ ވަނީ އެދިފައެވެ.
އެ މައުޟޫއަށް ރައްޔިތުންގެ މަޖިލީހުގެ ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއްލަތީފް ވިދާޅުވީ، ފަތުރުވެރިކަމުގެ ސިނާއަތު ރަނގަޅު ކުރަން އަލީ ވަހީދު ކުރައްވާ މަސައްކަތަށް ޝުކުރު އަދާކުރައްވާ ކަމަށާއި، އަދި ގިނަ ކާމިޔާބީތަކެއްވެސް ހޯދިފައިވާ ކަމަށެވެ. ބައެއް ރިސޯޓުތަކުން އެކަށީގެންވާ ވަރަށް ސަރވިސްޗާޖު ދޭ ކަމަށެވެ. އެކަމަކު ހދ. ގައި ހަމައެކަނި އޮންނަ ރަށް ހދ. ހޮނޑާފުށިގެ ހާލަތު ބެލުމަށް ޔާސިރު އެދި ވަޑައިގެންނެވިއެވެ.
''ހޮނޑާފުށީގައި މިދިޔަ މަހު ސަރވިސް ޗާޖް އަކަށް ދިނީ 63 ޑޮލަރު.'' އެތަނުގައި ދިވެހިންނަށް ލިބޭ ކެއުންވެސް ވަރަށް ދަށް ކަމަށް ޔާސިރުގެ ޓްވީޓްގައި ވިދާޅުވިއެވެ.
ބައެއް ފަރާތްތަކުން ބުނީ، ހުރިހާ ރިސޯޓުތަކުން ސަރވިސް ޗާޖަށް ދޭ މިންވަރު މިނިސްޓަރަށް އެނގިވަޑައިނުގަތުމުން ކަމަށް އެކަށީގެންވާ ކަމަށެވެ. އަދި އެވަރޭޖް ކޮށް ސާވިސް ޗާޖު ދިނަސް މައްސަލަ އަކީ ހައްގު މިންވަރު ނުދިނުން ކަމަށެވެ. ރިސޯޓު އޯނަރުންގެ ''އުނގު'' ތެރެއަށް ވެއްޓިގެން އަލީ ވަހީދު ''ހައްޕު'' ކިޔުއްވައިގެން ހުންނަވަނީ ކަމަށް މީހަކު ކުރި ޓްވީޓެއްގައި ވަނީ ބުނެފައެވެ.
ރިޒޯޓު މުވައްޒަފުންގެ ފާޑުކިޔުންތައް އަލީ ވަހީދަށް އަމާޒުވެފައިވާއިރު، ޕްރެސްގައި ދެއްކި ވާހަކައިގެ އަސްލު ގެއްލޭ ގޮތަށް ރައްޔިތުން މިސްލީޑު ކުރާތީ ހިތާމާ ކުރައްވާ ކަމަށް ވިދާޅުވެ ވަނީ ޓްވީޓެއްް ކުރައްވާފައެވެ.
ދިވެހި ވިޔަފާރިވެރިން ހިންގާ ގިނަ ރިސޯޓުތަކުގައި މަސައްކަތް ކުރާ ދިވެހިންނަށް އެކަށީގެންވާ މުސާރައާ ސަރވިސް ޗާޖް ނުދޭ މައްސަލައަކީ އަބަދުވެސް ރިޒޯޓް މުވައްޒަފުން ކުރާ ޝަކުވާއެކެވެ. ބައެއް ރިސޯޓުތަކުގައި ދިވެހި މުވައްޒަފުންނާއި ބޭރު މުވައްޒަފުންނާއި ދޭތެރޭ ފަރަގުތަކެއް ގެންގުޅޭ ވާހަކަވެސް ވަރަށް ގިނައިން ދައްކައި އުޅެއެވެ. އެކަންތައްތަކަށް އަދިވެސް އެކަށީގެންވާ ހައްްލެއް ލިބިފައެއް ނުވެއެވެ.
