ނިލަންދޫއިން ވަރުގަދަ ގްރީން ސްޓްރީޓްސް ބަލިކޮށްފި

ދިރާގު ދިވެހި ޕްރިމިއާ ލީގުގައި ނިލަންދޫ ސްޕޯޓްސް ކްލަބުން ވަރުގަދަ ގްރީން ސްޓްރީޓްސް ބަލިކޮށްފިއެވެ.

ގަލޮޅު ރަސްމީ ބޯޅަ ދަނޑުގައި ކުޅުނު މި މެޗު ނިލަންދޫއިން ކާމިޔާބުކުރީ 4-2 ގެ ނަތީޖާއަކުންނެވެ.

މެޗު ފަށައިގެން ނިލަންދޫއިން އިން ގްރީން ކޮޅަށް ނުރައްކާ ކުރަމުންދިޔައިރު މެޗުގެ 18 ވަނަ މިނެޓުގައި ނިލަންދޫއިން ވަނީ ލަނޑުޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ބިދޭސީ ކުޅުންތެރިޔާ ޓޮޝީކީ އޮކޮމޯޓޯއެވެ.

ނިލަންދޫގެ ލަނޑާއިއެކު ގްރީންއިން އެޓީމުގެކުޅުން ރަނގަޅުކުރިއިރު އެޓީމުން ވަނީ ފުލުފުލުގައި ނިލަންދޫގެ ގޯލަށް ނުރައްކާކޮށްފައެވެ. އެގޮތުން މެޗުގެ 32 ވަނަ މިނެޓުގައި ގްރީންއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ އަހުމަދު ރަޝީދު (އައްމަޑޭ) އެވެ. މި ލަނޑަށްފަހުވެސް ގްރީންއިން ވަނީ ނިލަންދޫގެ ގޯލަށް ނުރައްކާކޮށްފައެވެ. ނަމަވެސް ގްރީން އިން ފޮނުވާލި ގިނަ ހަމަލާތައް ނިލަންދޫގެ ކީޕަރު ވަނީ ހުށިޔާރުކަމާއިއެކު ދިފާއުކޮށްފައެވެ. މެޗުގެ 35 ވަނަ މިނެޓުގައި ނިލަންދޫގެ ބިދޭސީ ފޯވާޑް ލޫކަސްވަނީ ލަނޑުޖަހައި އަލުން އެޓީމަށް ލީޑު ނަގައިދީފައެވެ. އަދި މެޗުގެ ފުރަތަމަ ހާފު ނިމުމުގެކުރިން އޭނާ ވަނީ އިތުރު ލަނޑެއްޖަހާ ލީޑު ފުޅާ ކޮށްފައެވެ.

މެޗުގެ ދެވަނަ ހާފު ފަށައިގެން ގްރީން އިން ބޯޅަ ކޮންޓްރޯލްކޮށް ރަނގަޅަށް ކުޅުނުއިރު މެޗުގެ 51 ވަނަ މިނެޓުގައި ގްރީންއިން ވަނީ ލަނޑު ޖަހާ ފަރަގު ކުޑަކޮށްފައެވެ. މި ލަނޑު ލިބުނު ހިލޭ ޖެހުމަކުން އެޓީމަށް ކާމިޔާބުކޮށްދިނީ ކެޕްޓަން މުހައްމަދު އާރިފް (ބަކާ) އެވެ. މި ލަނޑަށްފަހު ވެސް ގްރީންއަށް ލަނޑު ޖަހަން ވަނީ ފުރުސަތު ލިބި ބޭކާރުވެފައެވެ. ނިލަންދޫގެ ފަހު ލަނޑު މެޗުގެ 77 ވަނަ މިނެޓުގައި އެޓީމަށް ކާމިޔާބު ކޮށްދިނީ ޓޮޝީކީ އެވެ. މިއީ ގްރީންގެ ޑިފެންޑަރުންނަށް ހެދުނު ގޯހެއްގެ ފައިދާނަގާ އޭނާ ކާމިޔާބުކުރި ލަނޑެކެވެ.

މެޗަށްފަހު ވާހަކަދައްކަމުން ގްރީންގެ ކޯޗު އަލީ ސުޒެއިން ބުނީ މެޗުގައި ނިލަންދޫއިން ހޯދި ކާމިޔާބަށް މަރުހަބާ ކިޔާ ކަމަށާއި އެޓީމުން މުޅި މެޗުގައި ވެސް ރަނގަޅަށް ކުޅުނު ކަމަށެވެ.