ފުރަތަމަ މަރުހަލާއަކީ މައްސަލައެއް އުޅޭ ކަން ގަބޫލު ކުރުން ކަމަށް ވިދާޅުވި
ރައީސް އޮފީހުގެ ތަރުޖަމާން އިބްރާހިމް ހޫދު
ސަރުކާރުން މާ ފާޅުކަންބޮޑު ގޮތެއްގައި ޤައުމި ސަލާމަތާއި ގުޅޭ ކަންކަން ހާމަކުރަމުންދިއުމާއި ގުޅިގެން ރާއްޖޭގެ ފަތުރުވެރިކަމަށާއި އިޤްތިޞާދަށް ބުރުއަރާ ކަމަށް ބުނެ ސަރުކާރަށް ފާޑުވިދާޅުވާ ފަރާތްތަކަށް ރައީސް އޮފީހުގެ ތަރުޖަމާނު އިބްރާހިމް ހޫދު ރައްދުދެއްވައިފިއެވެ.
އަންގާރަ ދުވަހު ރައީސްއޮފީހުން ބޭއްވި ނޫސްވެރިންގެ ބައްދަލުވުމުގައި ނޫސްވެރިއެއްގެ ސުވާލަށް ޖަވާބުދެއްވަމުން ހޫދު ވިދާޅުވީ މައްސަލައެއް ޙައްލު ކުރުމުގެ އެންމެ ފުރަތަމަ މަރުޙަލާއަކީ މައްސަލައެއް އުޅޭ ކަން ޤަބޫލު ކުރުން ކަމަށެވެ. މިސާލެއް ނަންގަވަމުން ހޫދު ވިދާޅުވީ ސީރިއާ ނޫނީ އެހެންވެސް ބޭރުގެ ތަންތަނަށް ހަނގުރާމައަށް ގޮސް ތިބި ދިވެހިންގެ ޢަދަދު ކޮންމެވެސް ވަރަކަށް އަންދާޒާކުރެވޭ ވަރަށް އެނގިފައިވާ ކަމަށެވެ.
ހޫދު ވިދާޅުވީ މައްސަލައެއް އުޅޭ ކަމަށް ޤަބޫލު ނުކުރާ ކަމުގައި ވާނަމަ، މައްސަލައެއް ޙައްލެއް ނުކުރެވޭނެކަމަށެވެ. މި ދުވަސްވަރަކީ ފަތުރުވެރިކަމުގެ "ޕީކް" ސީޒަން ކަމަށް ވާއިރު، ޤައުމީ ދިފާޢީ ބާރުން އެލަރޓް ޔެލޯ 2 ސްޓޭޓަސް ނެރުމާއި ގުޅިގެން ގިނަ ބަޔަކު ކަންބޮޑުވުންފާޅުކޮށްފައިވެއެވެ. އެގޮތުން ހޫދު ވިދާޅުވީ އެ އެލަރޓު ނެރެފައިވަނީ ފަތުރުވެރިން ރާއްޖެއަށް ޒިޔާރަތް ކުރާ މިންވަރު ގިނަ ވުމުގެ ސަބަބުން ސަލާމަތީ ކަންކަން ވަރުގަދަކުރުމުގެ ގޮތުން ކަމަށެވެ.
