އެމްބާޕޭ އޮލިމްޕިކްސް ކުޅުމުގެ އުންމީދުގައި

ފްރާންސްގެ ޕެރިސް ސެއިންޓް (ޕީއެސްޖީ) ޖާމަންއަށް ކުޅެމުން އަންނަ އެގައުމުގެ ޒުވާން ކުޅުންތެރިޔާ ކީލިއަން އެމްބާޕޭ އޮލިމްޕިކްސް ކުޅެން ބޭނުންވާކަމަށް އޭނާ ބުނެފިއެވެ.

އެމްބާޕޭ ބުނީ އޭނާ އަންނަ އަހަރު ޖަޕާނުގައި އޮންނަ އޮލިމްޕިކްސް ކުޅެން ބޭނުންވާ ކަމަށާއި ނަމަވެސް އޭގެ ކޮންޓްރޯލް އޮތީ އޭނާގެ އަތުގައި ނޫންކަމަށާއި އޭނާ ކުޅެމުން އަންނަ ކްލަބް ޕީއެސްޖީއިން އެކަމަށް ބޭނުންނުވާނަމަ އޭގައި އޭނާ ކުރާނެކަމެއް ނެތްކަމަށެވެ.

އުމުރުން 21 އަހަރުގެ އެމްބާޕޭ އިތުރަށް ބުނީ އޭނާ އޮލިމްޕިކްސްގައި ކުޅޭނެކަން ނިންމާނީ ކޯޗުންނާއި މަޝްވަރާކުރުމަށްފަހުގައި ކަމަށާއި އަންނަ އަހަރުގެ އޮލިމްޕިކްސްގައި ނުކުޅެވުނެއްކަމަކު 2024 ވަނަ އަހަރުގެ އޮލިމްޕިކްސް އާއި އަދި އޭގެ ފަހުން އޮންނަ އޮލިމްޕިކްސް މުބާރާތްތައް ކުޅުމުގެ ފުރުސަތު އޭނާއަށް އެބައޮތް ކަމަށެވެ.

ޕްރާންސްގެ ގައުމީ ޓީމާއިއެކު، 2018 ވަނަ އަހަރު ރަޝިޔާގައި ބޭއްވި ފީފާ ވޯލްޑްކަޕް ފްރާންސްއާއިއެކު ކާމިޔާބުކުރި އެމްބާޕޭއަކީ މުހިންމު ދައުރެއްއަދާކުރި ކުޅުންތެރިއެކެވެ. އެމުރުގެ ގޮތުން އެމްބާޕޭއަކީ އޮލިމްޕިކްސް ކުޅުމުގެ ފުރުސަތު އޮތް ކުޅުންތެރިއެކެވެ. އޮލިމްޕިކްސްގައި ކުޅޭނީ 23 އަހަރުންދަށުގެ ކުޅުންތެރިންނެވެ. ނަމަވެސް ކޮންމެ ގައުމަކުންވެސް 23 އަހަރުން މަތީ ތިން ކުޅުންތެރިން ސްކޮޑްގައި ޖެހުމުގެ ފުރުސަތު އޮވެއެވެ.

އެމްބާޕޭ އަންނަނީ ޕީއެސްޖީއާއި އެކުމޮޅު ކުޅުމެއް ދައްކަމުންނެވެ. އެގޮތުން ޕީއެސްޖީއަށް މިހާތަނަށް ކުޅުނު 106 މެޗުން 78 ލަނޑު އޭނާ ވަނީ ކާމިޔާބު ކޮށްދީފައެވެ. ފްރާންސްގެ ގައުމީ ޓީމަށް ކުޅެދިން 34 މެޗުން އެމްބާޕޭ ވަނީ 13 ލަނޑު ޖަހައިފައެވެ. ޕީއެސްޖީއާއި އެކު ފްރެންޗް ލީގު ދެ ފަހަރު ކާމިޔާބުކުރި އިރު އޭނާ ވަނީ ފްރާންސްއާއިއެކު ވޯލްޑްކަޕް ކާމިޔާބުކުރުމުގެ އިތުރުން އެމުބާރާތުގެ އެންމެ މޮޅު ޒުވާން ކުޅުންތެރިޔާގެ މަގާމު ހޯދައިފައެވެ.