ކައުންސިލް އިންތިޚާބުގައި ސިޓީތަކުގައި އަންހެން މެންބަރުން އިންތިޚާބުކުރާނެ ދާއިރާތަކުގެ ގުރުއަތުނެގުން މާދަމާ
ސިޓީ ކައުންސިލް ތަކަށް އިންތިޚާބު ކުރެވެނީ ޖުމްލަ 12 އަންހެން ކައުންސިލަރުން
އިންތިހާބުގެ ވޯޓުލުން ކުރިޔަށްދަނީ
އަންނަ އަހަރުގެ އެޕްރީލް މަހު ބާއްވާ ލޯކަލް ކައުންސިލް އިންތިޚާބުގައި ސިޓީތަކުގައި އަންހެން މެންބަރުން އިންތިޚާބު ކުރާނެ ދާއިރާތައް ކަނޑައެޅުމަށް ބާއްވާ ގުރުއަތުނެގުން ބުދަ ދުވަހު ބާއްވާ ގޮތަށް ހަމަޖައްސައިފިއެވެ.
އިލެކްޝަންސް ކޮމިޝަނުން ކޮށްފައިވާ ޓްވީޓެއްގައި ބުނެފައިވަނީ ލޯކަލް ކައުންސިލް އިންތިޚާބުގެ ސިޓީތަކުގެ ތެރެއިން އަންހެން މެންބަރުން އިންތިޚާބު ކުރާނެ ދާއިރާތައް ކަނޑައެޅުމަށްޓަކައި ބާއްވާ ގުރުއަތު ނެގުން މިހިނގާ ޑިސެމްބަރު މަހުގެ 25 ގައި ބޭއްވުމަށް އިލެކްޝަންސް ކޮމިޝަނުން ނިންމާފައިވާ ކަމަށެވެ.
ލޯކަލް ކައުންސިލް އިންތިޚާބުގައި ރަށު ކައުންސިލުތަކަށް އިންތިޚާބުކުރާ ޖުމުލަ ކައުންސިލަރުންގެ ޢަދަދަކީ 925 އެވެ. އެއީ ރަށު ކައުންސިލްތަކުން އިންތިޚާބުކުރާ އަންހެން 373 ކައުންސިލަރުންނާއި، އަންހެން، ފިރިހެން ހިމެނޭގޮތަށް އިންތިޚާކުރެވޭ 373 ކައުންސިލަރުންނެވެ. އަދި ރަށު ކައުންސިލްތަކުގެ ރައީސުންނަށް އިންތިޚާބުކުރެވޭ 179 ކައުންސިލަރުންނެވެ.
އަތޮޅު ކައުންސިލަރުންގެ ޢަދަދަކީ 18 އެވެ. ކޮންމެ ރަށެއްގެ ރަށު ކައުންސިލްގެ ރައީސުން ހިމެނޭ ގޮތަށް ޖުމުލަ 197 ކައުންސިލަރުން އަތޮޅު ކައުންސިލުގައި ތިއްބަވާނެ އެވެ.
ސިޓީތަކަށް އިންތިޚާބުކުރާ ޖުމުލަ ކައުންސިލަރުންގެ ޢަދަދަކީ 39 އެވެ. އެއީ ސިޓީ ކައުންސިލަށް އިންތިޚާބުކުރެވޭ 12 އަންހެން ކައުންސިލަރުންނާއި، އަންހެން، ފިރިހެން ހިމެނޭގޮތަށް އިންތިޚާބުކުރެވޭ 24 ކައުންސިލަރުންނެވެ. ސިޓީ ކައުންސިލް މޭޔަރުންގެ ޢަދަދަކީ 3 އެވެ.
ލޯކަލް ކައުންސިލްތަކުގެ އިންތިޚާބު 2020 އަށް ޖުމްލަ އިންތިޚާބުކުރަންޖެހޭ ޢަދަދަކީ 982 އެވެ.
މީގެއިތުރުން ރަށް ރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް އިންތިޚާބުކުރާ މެންބަރުންގެ ޢަދަދަކީ 895 އެވެ. ސިޓީތަކުން އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް އިންތިޚާބުކުރާ މެންބަރުންގެ ޢަދަދކީ 34 އެވެ.
ޖުމުލަ އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށް އިންތިޚާބު ކުރަންޖެހޭ މެންބަރުންގެ ޢަދަދަކީ 929 އެވެ.
