މިފަދަ ގަވާއިދަކަށް ޚިޔާލުހުށަހެޅުމަކީ ވަރަށް ބޮޑު ކަމެއް ކަމަށް ވިދާޅުވި
މީރާ
އާމްދަނީން ޓެކްސް ނެގުމުގެ ޤަވާއިދަށް އުއްމީދު ކުރިވަރަށް އާއްމުންގެ ޚިޔާލު ލިބިފައި ނުވާކަމަށް މޯލްޑިވްސް އިންލެންޑް ރިވެނިއު އޮތޯރިޓީ (މީރާ) އިން ބުނެފިއެވެ.
ރާއްޖެޓީވީގެ ފަލަ ސުރުހީ ޕްރޮގްރާމުގައި މިކަމާއި ގުޅިގެން ވާހަކަދައްކަވަމުން މީރާގެ ޑިރެކްޓަރ ޖެނެރަލް، ކޯޕަރޭޓް ބިޒްނަސް މޫސާ ހަލީމް ވިދާޅުވީ އެ ގަވާއިދުގެ ޑްރާފްޓެއް އެކުލަވާލާ އާއްމުންގެ ޚިޔާލަށް ހުށަހަޅާފައިރު މިހާތަނަށް އެންމެ އުއްމީދު ކުރިވަރަށް ޚިޔާލު ލިބިފައިނުވާ ކަމަށެވެ.
މޫސާ ހަލީމް ވިދާޅުވީ އެ ގާނޫނަކީ 100 ސަފްހާއަށް ވުރެ ގިނަ ސަފްހާގެ މައްޗަށް އެކުލެވިފައިވާ ގާނޫނަކަށް ވާއިރު އެ ގަވާއިދުވެސް އެކުލެވިފައިވަނީ 30 ސަފްހާގެ މައްޗަށް ކަމަށެވެ. އެހެންކަމުން މިފަދަ ގަވާއިދަކަށް ޚިޔާލުހުށަހެޅުމަކީ ވަރަށް މުހިންމު ކަމެއްކަން އޭނާ ފާހަގަކުރެއްވިއެވެ.
މި މަހުގެ 19 ވަނަ ދުވަހުން ފެށިގެން 24 ވަނަ ދުވަހަށް ޚިޔާލު ހުށަހެޅުމުގެ ފުރުސަތު ހުޅުވާލެވުނު އިރު މޫސާ ހަލީމް ވިދާޅުވީ ޚިޔާލު ހުށަހެޅުމަށް ދިގު މުއްދަތެއް ދެވެން ނެތް ކަމަށެވެ. އޭނާ ވިދާޅުވީ ޓެކްސް ނެގުމުގެ ކުރިން ގަވާއިދު ހަދަންޖެހޭ ކަމަށާއި އަންނަ ޖެނުއަރީގެ ކުރިން ގަވައިދު ގެޒެޓުގައި ޝާއިއު ކުރަންޖެހޭ ކަމަށެވެ.
