އިތުރު ހަ ރަށެއްގަ ބެޑްމިންޓަން ހޯލް ގާއިމުކުރަނީ
މި ސަރުކާރުން އަންނަނީ ބެޑްމިންޓަން ކުރިއެރުވުމަށް ގިނަ މަސައްކަތްތަކެއް ކުރަމުން
އައްޑޫ ސިޓީ ބެޑްމިންޓަން ހޯލު
ހަ ރަށެއްގައި އިންޓަނޭޝަނަލް ފެންވަރުގެ އިންޑޯ ބެޑްމިންޓަން ހޯލު ޤާއިމު ކޮށްދޭނެ ފަރާތްތައް ހޯދުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްއިން އިޢުލާނުކޮށްފިއެވެ.
އެގޮތުން އެ މިނިސްޓްރީން ވަނީ ހދ. ކުޅުދުއްފުށި، ލ. ގަން، ދ. ކުޑަހުވަދޫ، ޅ. ނައިފަރު އަދި ގދ. ތިނަދޫގެ އިތުރުން ފުވައްމުލައް ސިޓީގައި އިންޑޯ ބެޑްމިންޓަން ހޯލު ޤާއިމުކޮށްދޭނެ ފަރާތްތައް ހޯދުމަށް އިޢުލާނުކޮށްފައެވެ.
މިކަމާ ގުޅޭގޮތުން ކުޅިވަރާ ބެހޭ ވަޒީރު އަޙްމަދު މަޚުލޫފް ވިދާޅުވީ މިއީ ރައީސް އިބްރާހިމް މުޙައްމަދު ޞާލިޙުގެ ސަރުކާރުން ބެޑްމިންޓަން ކުރިއެރުވުމަށް ކުރައްވާ މަސައްކަތެއް ކަމަށާއި، އެގޮތުން މި ރަށްތަކުގައި ވެސް ތަރައްޤީކުރާނީ އައްޑޫސިޓީގައި ދާދިފަހުން ޤާއިމު ކުރި ފެންވަރުގެ ބައިނަލްއާޤުވާމީ ފެންވަރުގެ ބެޑްމިންޓަން ހޯލުތައް ކަމަށެވެ.
އައްޑޫ ސިޓީ ހިތަދޫގައި ޤާއިމު ކޮށްފައިވާ ބެޑްމިންޓަން ކޮމްޕްލެކްސްގައި މިއަހަރު ވަނީ ސާރކުގެ މެންބަރު ޤައުމުތަކުގެ 21 އަހަރުން ދަށުގެ ބެޑްމިންޓަން މުބާރާތް ބާއްވާފައެވެ. ހަމަ އެހެންމެ ރާއްޖޭގެ އެކި ކަންކޮޅުތަކުގައި ބެޑްމިންޓަނަކީ ވަރަށް ފޯރިއާއެކު ކުޅެމުންދާ ކުޅިވަރެއްކަން ފާހަގަކޮށްލެވެއެވެ. މީގެ އިތުރުން ބެޑްމިންޓަން ކުޅުންތެރިން އަންނަނީ ބައިނަލްއަޤުވާމީ މުބާރާތްތަކުން މެޑަލް ހޯދަމުންނެވެ.
