ކައުންސިލްތަކަށް ލިބޭ ޢާމްދަނީ އާއި އެކި ގޮތްގޮތުން ލިބޭ އެހީ އަށް ބަލައިގެން ތައްޔާރުކުރާ ބަޖެޓު ފާސްކުރުމަށްފަހު އަންނަ ޖެނުއަރީ މަހުގެ 15 ގެ ކުރިން ފިނޭންސް މިނިސްޓްރީއަށް ހުށަހެޅުމަށް އެމިނިސްޓްރީން ކައުންސިލްތަކަށް އަންގައިފި އެވެ.
ފިނޭންސް މިނިސްޓްރީން ހުރިހާ ކައުންސިލްތަކަށް ފޮނުވާފައިވާ ސަރކިއުލަރ އެއްގައި ބުނެފައިވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 79 ވަނަ މާއްދާގެ ހ ގައި ބަޔާންކޮށްފައިވާ ގޮތަށް، ފިނޭންސް މިނިސްޓްރީން ފިސްކަލް ފޯމިއުލާ ބޭނުންކޮށްގެން ރާއްޖޭގެ ހުރިހާ ކައުންސިލްތަކަކަށް ބެހިގެންދާ ގޮތަށް ހިލޭ އެހީގެ ގޮތުގައި ދައުލަތުން ފައިސާ ދޫކުރުމަށް އަންނަ އަހަރުގެ ބަޖެޓުގައި ހިމަނާފައިވާ ކަމަށެވެ. އެގޮތުގެ މަތިން އަންނަ އަހަރަށް ފާސްކުރި ދައުލަތުގެ ބަޖެޓުން ކައުންސިލްތަކަށް ސަރުކާރުން ދޭ ހިލޭ އެހީ ކައުންސިލްތަކަށް ބެހިގެންދާ ގޮތުގެ ތަފުޞީލު ފިނޭންސް މިނިސްޓްރީގެ ވެބްސައިޓް އަދި ބަޖެޓް ވެބްސައިޓުގައި ޝާޢިއުކުރެވިފައިވާނެ ކަމަށް ސަރކިޔުލާގައި ބުނެފައިވެއެވެ.
އެހެންކަމުން ކައުންސިލްތަކުން ބަޖެޓް ފާސްކުރުމަށްފަހު ލޯކަލް ގަވަންމަންޓް އޮތޯރިޓީގެ "ވިޔަ މޮޑިއުލް" މެދުވެރިކޮށް ހުށަހެޅުމަށް ކައުންސިލްތަކަށް ވަނީ އަންގާފަ އެވެ. އަދި ބަޖެޓު ތައްޔާރުކުރުމުގައި މިނިސްޓްރީން އެކުލަވާލާފައިވާ "ކައުންސިލްތަކަށްދޭ ހިލޭ އެހީ ކަނޑައެޅުމާއި، ކައުންސިލްތަކުގެ ބަޖެޓު ތައްޔާރުކުރުމާއި، ބަޖެޓު ތަންފީޒުކުރުމުގައި ޢަމަލުކުރާނެ ގޮތުގެ އުޞޫލު" އާ އެއްގޮތަށް ކައުންސިލުތަކުން ޢަމަލުކުރުމަށްވެސް މިނިސްޓްރީން ވަނީ އެދިފައެވެ.
މީގެއިތުރުން ސަރުކާރުން ކައުންސިލްތަކަށް ދިނުމަށް ހަމަޖެހިފައިވާ އެހީ ބޭނުންކުރުމުގައި އަދި ކައުންސިލްތަކުގެ ބަޖެޓު ތަންފީޒުކުރުމުގައި މި އުޞޫލާ އެއްގޮތަށް ކައުންސިލްތަކަށް ޢަމަލުކުރުމަށްވެސް މިނިސްޓްރީން ވަނީ އެދިފައެވެ.
ސަރުކާރުން ކައުންސިލްތަކަށް ދޭ ބްލޮކް ގްރާންޓްގެ ގޮތުގައި އަންނަ އަހަރަށް ފާސްކުރި ބަޖެޓުގައި 1.6 ބިލިއަން ރުފިޔާ ވަނީ ހިމަނާފައެވެ.
