އިސް ފަނޑިޔާރު ޝުޖާއުއަށް މަރުގެ އިންޒާރުދިނީ އެމްޑީޕީގެ މެމްބަރެއް!

ހައިކޯޓުގެ އިސް ފަނޑިޔާރު ޝުޖާއު އުސްމާންއަށް މަރުގެ އިންޒާރުދިނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އަށް ނިސްބަތްވާ މެމްބަރެއްކަން ރާއްޖެއެމްވީއަށް އިނގިއްޖެއެވެ.

އިސް ފަނޑިޔާރު އުސްމާނަށް އިންޒާރުދިން މައްސަލައިގައި ހައްޔަރުކޮށްފައިވަނީ، ކ. މާފުށި، ވައިޓްފިޝް، އަލީ މުރުތަޟާ ނަމަކަށް ކިޔާ 50 އަހަރުގެ މީހެކެވެ. ފުލުހުން ތަހުގީގު ކުރަމުންދާ އެމައްސަލާގައި ހައްޔަރު ކުރުމުގެ އަމުރަކަށް އެދުމުން އެ އަމުރު ނެރެދީފައިވަނީ މާލެ އަތޮޅު ކާށިދޫ މެޖިސްޓްރޭޓް ކޯޓުން ނެވެ.

އެއަމުރުގައި ވާގޮތުން، އޭނާ ހައްޔަރު ކުރުމުގެ އަމުރަކަށް ފުލުހުން އެެދިފައިވަނީ، މިމަހުގެ 20 ވަނަ ދުވަހުގެ ހަވީރު 17:15 ހާއިރު، ހައިކޯޓުގެ އިސް ފަނޑިޔާރު ޝުޖާއު އުސްމާންގެ ގައިގައި ޖަހާ، މާރާމާރީ ހިންގާނެ ކަމަށާއި، މަރާލާނެ ކަމަށްބުނެ، އަލީ މުރުތަޟާ އިންޒާރުދީފައިވާ ކަމަށް ތުހުމަތު ކުރެވޭ މައްސަލާގައި މުޖުތަމައުގެ ސަލާމަތާއި ރައްކާތެރިކަމަށްޓަކާ ކަމަށެވެ.

އެއަމުރާ ގުޅިގެން އޭނާ ހައްޔަރު ކޮށްފައިވާ ކަމަށް ފުލުހުން ވަނީ ކަށަވަރު ކޮށްދީފައެވެ. އިސް ފަނޑިޔާރަށް މަރުގެ އިންޒާރު ދިނުމާއި ގުޅިގެން އެކަން ހަރުކަށި އިބާރާތުން ކުށްވެރިކޮށް، އެ މައްސަލައިގައި ޝާމިލްވާ ބަޔަކަށް ހައްގު އަދަބު ދިނުމަށް ގޮވާލާ ހައި ކޯޓުން ވަނީ ބަޔާނެއްވެސް ނެރިފައެވެ.