ރާއްޖޭގައި ހިންގާ ދީނީ ޖަމާއަތެއް ކަމަށްވާ މަކްތަބާ ސަލަފިއްޔާއިން ޑރ. މުހައްމަދު އިޔާޒުއާ ގުޅުވައިގެން ދެއްކި ވާހަކަތަކަށް އޭނާ ރައްދުދީފިއެވެ.
މަކްތަބާ ސަލަފިއްޔާ އިން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި ވަނީ ދީނީ އިލްމުވެރިޔާ މުހައްމަދު ހަަސަން ވިދާޅުވީ، ޑރ. އިޔާޒަކީ އަލްގައިދާގެ ލީޑަރު އުސާމާ ބިން ލާދިންގެ ފިކުރުތަކަށް ތާއިދުކުރާ މޭރުމުން ވާހަކަ ދައްކަވާ ބޭފުޅެއް ކަމަށެވެ.
އެ ޖަމްއިއްޔާގެ ވާހަކަތަކަށް ރައްދު ދެއްވަމުން އިޔާޒު ވަނީ ޓްވީޓަކަށް ފަހު ޓްވީޓެއް ކޮށްފައެވެ. އެގޮތުން ކުރި ޓްވީޓެއްގައި އޭނާ ވިދާޅުވީ، މީސްތަކުން ''ކެޓަގަރައިޒް''ކޮށް ތިމަންނަމެންގެ ފިކުރާއި ދިމާނުވާ ބަޔަކާއި ހަތަރު ކަޅިހަމަނުކޮށް، ސަލާމް ގޮވިޔަސް ބަލައިނުގަނެ މޫނު އަނބުރާލާ މަކްތަބާ ސަލަފިއްޔާގެ ބޭފުޅުންގެ އަމަލުތަކަކީ އެއްވެސް ގޮތަކުން އިސްލާމީ އުސޫލަށް ފެތޭ ކަމެއް ނޫން ކަމަށެވެ.
އިތުރު ޓްވީޓެއްގައި އިޔާޒު ވިދާޅުވީ، އެއް މުސްލިމަކާއި ބައްދަލުވާހިނދު ސަލާމް ކޮށްލައިފިނަމަ އެކަމުން ވަރަށް މަތިވެރި ދަރުމަ ލިބޭ ކަމަށެވެ. މޫނުމަތީގައި ހިނިތުންވުމަކީ ސަދާގަތަކަށް ވިޔަސް ''ކުނި މޫނު'' ދައްކައިގެން މީސްތަކުން މަންހަޖުން ބޭރުކޮށް ދީނީ ދައުވަތު ފުނޑާލަން ފުރުސަތު ދެވިގެން ނުވާނެ ކަމަށެވެ.
ޓްވީޓް ނިންމަވާލައްވަމުން އިޔާޒު ވަނީ، ފިތުނަ ފަސާދަ އުފައްދަން ނޫޅެ އިސްލާހުގެ މަގު އިހްތިޔާރު ކުރުމަށް މަކްތަބީ ސަލަފިއްޔާ އަށް ނަސޭހަތްތެރިވެފައެވެ.
