ހަރުކަށި ފިކުރު ފަތުރާ ކަމުގެ ބޮޑެތި ތުހުމަތުތަކެއް ޑރ އިޔާޒާއި ސަލަފަށް!
21 ޑިސެމްބަރު 2019 | ހޮނިހިރު 14:03އުސާމާ ބިން ލާދިންއަކީ ހެޔޮ މީހެއްގެ ގޮތުގައި ޑރ އިޔާޒް ދެއްކެވިކަމަށް ބުނި
ހޮނިހިރު ދުވަހު މަކްތަބާ ސަލަފިއްޔާއިން ބޭއްވި ނޫސްވެރިންގެ ބައްދަލުވުން
ރާއްޖޭގައި ހަރުކަށި ފިކުރު ފަތުރާކަމުގެ ބޮޑެތި ތުހުމަތުތަކެއް ދީނީ އިލްމުވެރިޔާ ޑރ. މުޙައްމަދު އިޔާޒުގެ އިތުރުން ޖަމިއްޔަތުއް ސަލަފްގެ ގިނަ އިލްމުވެރިންތަކެއްގެ މައްޗަށް ކޮށްފިއެވެ.
ހޮނިހިރު ދުވަހު މަކްތަބާ ސަލަފިއްޔާއިން ބޭއްވި ނޫސްވެރިންގެ ބައްދަލުވުމެއްގައި މި ތުޙުމަތުތައް ޑރ. އިޔާޒާއި ސަލަފް ޖަމިއްޔާއަށް ނިސްބަތްވާ ދީނީ އިލްމުވެރިންތަކެއްގެ މައްޗަށް ކޮށްފައިވާއިރު، ސަލަފް ޖަމިއްޔާ އަބަދުވެސް ހައްދުފަހަނަ އެޅުމާއި ހަރުކަށި ފިކުރާ ދެކޮޅުވާނެކަމަށް އެ ޖަމިއްޔާއިން މީގެ ކުރިން ބުނެފައިވެއެވެ.
ނަމަވެސް މި ބައްދަލުވުމުގައި ވާހަކަ ދައްކަވަމުން މަކްތަބާ ސަލަފިއްޔާގެ އިލްމުވެރިއެއް ކަމަށްވާ ޝެއިޙް މުހައްމަދު ހަސަން ވިދާޅުވީ، އުސާމާ ބިން ލާދިންއަކީ ޖިހާދު ކުރި މީހެއްގެ ގޮތުގައި ހަދައި، އުއްމަތަށް އެއީ ހެޔޮ މީހެއް ކަމުގައި ދޭހަކޮށްދޭ މޭރުމަކުން ޑރ. އިޔާޒް ވާހަކަ ދައްކަވާފައިވާ ކަމަށެވެ.
އެގޮތުން އުސާމާ ބިން ލާދިން އަކީ ދުނިޔޭގެ އުފަލާއި އަރާމު ދޫކޮށް، ﷲ ގެ މަގުގައި ޖިހާދު ކޮށްފައިވާ މުޖާހިދެއްގެ ގޮތުގައި މޭރުންވާގޮތަށް ޑރ. އިޔާޒް 5 މޭ 2011 ގައި ވާހަކަދައްކަވާފައިވާ ކަމަށް އޭނާ ވިދާޅުވިއެވެ.
އެގޮތުން ޖަމިއްޔަތުއް ސަލަފްގެ ރައީސް ޝެއިޙް އަބްދުﷲ ބިން މުހައްމަދު އިބްރާހިމް (ބިން ޖަނާބް) އާއި ގުޅޭގޮތުން މަކްތަބާ ސަލަފިއްޔާއިން ބުނީ، ކީރިތި ރަސޫލާގެ ކާޓޫނު ކުރެހި މީހުންނާ ދެކޮޅަށް ހަމަލާދިން ޚަވާރިޖު ޑޮޓް ފިކުރު މީހުންގެ ކިބައިން ނަމޫނާ ލިބިގަންނަން ބުނެ ޓެރަރިޒަމްގެ އަމަލުތަކަށް ހިތްވަރުދީ ބިން ޖަނާބް ވާހަކަ ދައްކަވާފައިވާ ކަމަށެވެ.
އޭގެ އިތުރުން، ރާއްޖެއިން ބޭރުގައި ހަނގުރާމައަށް ގޮސް ތިބި ފަރާތްތަކަށް އެހީވާން ބޭނުންވާ ކަމަށްބުނެ އައިސިސް އަދި ޖަބްޙަތުއްނުބްރާއާއެކު ކުރިން ކޯލިޝަނެއްގައި އޮތް ޖަމާއަތެއްގެ ލީޑަރު ކަމަށްވާ އުވައިހާންއަށް 2013 ވަނަ އަހަރު ބިން ޖަނާބް ކުރެއްވި ޓްވީޓު ތަކެއްވެސް މަކްތަބާ ސަލަފިއްޔާއިން ވަނީ ހިއްސާކޮށްފައެވެ.
އޭގެ އިތުރުން، ސަލަފަށް ނިސްބަތްވާ އިލްމުވެރިއެއް ކަމަށްވާ އައްޝައިޙް އާދަމް ނިޝާން ބިން އަލީ އާދަމްވެސް ހަރުކަށި ފިކުރު ފެތުރުމަށް ބާރުއަޅާގޮތަށް ވާހަކަދައްކަވާފައިވާ ކަމަށާއި، ޖާނުން ފިދާވެ ދޭ ހަމަލާތައް ހުއްދަވާގޮތަށް ޝެއިޙް އާދަމް 2014 ވަނަ އަހަރު ދެއްކެވި ބައެއް ވާހަކަތައް މަކްތަބާ ސަލަފިއްޔާއިން ވަނީ މީޑިއާއާއި ހިއްސާކުރައްވާފައެވެ.
އޭގެ އިތުރުން، ސަލަފްގެ އިލްމުވެރިއެއް ކަމަށްވާ ޝެއިޙް އާދަމް ޝަމީމްވެސް ޖާނުން ފިދާ ވުމުގެ ހަމަލާ ހުއްދަކޮށް ވާހަކަ ދައްކާފައިވާކަމަށް މަކްތަބާ ސަލަފިއްޔާއިން ބުނެއެވެ. އެގޮތުން "ފިދާއީ ހަމަލާއަކީ އެންމެންނަށްވެސް ބޭނުންޖެހިދާނެ އެއްޗެއް" ކަމަށް ދޭހަވާގޮތަށް ޝެއިޙް އާދަމް 2009 ވަނަ އަހަރު ދެއްކެވި ބައެއް ވާހަކަތައް މީޑިއާއާއި ހިއްސާ ކޮށްފައިވެއެވެ.
ސަލަފް ޖަމިއްޔާއަށް ނިސްބަތްކޮށް ބޮޑެތި ތުޙުމަތުތަކެއް ކުރެވިފައިވާއިރު، އަނިޔާވެރި ގޮތަކަށް މަރާލާފައިވާ އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީގެ މަރުގެ މައްސަލައާއި ގުޅޭ ގޮތުން މަަރު ކޮމިޝަނުން ނެރުއްވާފައިވާ ރިޕޯޓް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީން ސަބް ކޮމެޓީއެއް އެކުލަވާލާލުމަށް ފަހު ވަނީ ރިޕޯޓެއް ތައްޔާރުކޮށްފައެވެ. ސަބް ކޮމެޓީގެ ރިޕޯޓުގައި ސަލަފު ޖަމިއްޔާއަކީ ޓެރަރިޒަމްއަށް ވާގިދޭ ޖަމާއަތެއްގެ ގޮތުގައި ފާހަގަކޮށްފައިވާކަމަށް މަޖިލީހުގެ ރައީސް، ރައީސް ނަޝީދު ވިދާޅުވެފައިވެއެވެ.
އޭގެ އިތުރުން، މަކްތަބާ ސަލަފިއްޔާއިން ޖަމިއްޔަތުއް ސަލަފްގެ އިލްމުވެރިންނަށްވެސް ހަރުކަށި ފިކުރު ފަތުރާކަމުގެ ތުހުމަތުތަކެއް ކޮށްފައިވާއިރު، ޖަމިއްޔަތުއް ސަލަފް އުވާލުމަށް ރައީސް ނަޝީދު މަސަތްކަތް ކުރައްވަން ފެއްޓެވި ހިސާބުން ޑރ. އިޔާޒްވެސް ވަނީ ބަހުގެ ހޫނު ހަމަލާތަކެއް އެމަނިކުފާނަށް ރައްދު ކުރައްވާފައެވެ.
