ފަތުރުވެރިކަމުގެ ދާއިރާއިން، ލައިފްޓައިމް އެޗީވްމަންޓް އެވޯޑް ރައީސުލްޖުމްހޫރިއްޔާ އޮފީހުގެ މިނިސްޓަރ އަޙްމަދު ނަސީމަށް (ކެރަފާ ނަސީމް) ލިބިވަޑައިގެންފިއެވެ.

މޯލްޑްވިސް ޓްރެވަލް އެވޯޑުގެ ނަމުގައި ކޮންމެ އަހަރަކު ވެސް، ފަތުރުވެރިކަމުގެ ދައިރާގެ އެކިއެކި ގޮތްގޮތުން ފާހަގަ ކޮށްލެވޭ ފަރާތްތަކަށް އެވޯޑުތަކެއް ދެމުންދާއިރު، އެއީ ޖަޖު ކުރެވިގެން ވަރަށް ޕްރޮފެޝަލްކޮށް، މޯލްޑިސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސް (މަޓާޓޯ)އިން ދޭ އެވޯޑެކެވެ.

މޯލްޑިވްސް ޓްރެވަލް އެވޯޑްސް 2019ގެ ގާލާ ހަފުލާ ބާއްވާފައިވަނީ ބުރާސްފަތި ދުވަހުގެ ރޭ ކްރޮސްރޯޑް މޯލްޑިވްސްގަ އެވެ. މިއަހަރުގެ މޯލްޑިވްސް ޓްރެވެލް އެވޯޑްސް ގާލާގައި ފަތުރުވެރިކަމުގެ ދާއިރާގެ މުހިންމު އެވޯޑްތަކެއް ވަނީ ދީފައެވެ.

އެގޮތުން އެންމެ ޚާއްޞަ އެވޯޑަކަށް ދީފައިވަނީ ލައިފްޓައިމް އެޗީވްމަންޓް އެވޯޑެވެ. މި އެވޯޑް މިނިސްޓަރ ނަސީމަށް ލިބިވަޑައިގަތްއިރު އެމަނިކުފާނަކީ ރާއްޖެއަށް ފަތުރުވެރިކަން ތަޢާރަފުކުރުމުގައި އެންމެ އިސްދައުރެއް އަދާކުރެއްވި އެއް ފަރާތެވެ.

ދިވެހިރާއްޖޭގައި ސަރުކާރުން ޓޫރިޒަމް މިނިސްޓްރީއެއް ޤާއިމުކޮށް، އެމިނިސްޓްރީއަށް 31 އަހަރު ފުރުން ފާހަގަ ކުރުމަށް މިމަހުގެ 12 ވަނަ ދުވަހު ޓޫރިޒަމް މިނިސްޓްރީގައި ބޭއްވި ހަފުލާގައި ވާހަކަފުޅު ދައްކަވަމުން ދައުލަތަށް ގިނަ ޚިދުމަތްތަކެއް ކޮށްދެއްވި އަދި ކުރީގެ ޓޫރިޒަމް މިނިސްޓަރު އިބްރާހީމް ހުސައިން ޒަކީ ވެސް ވަނީ އެ ހަފުލާގައި، ރާއްޖޭގެ ޓޫރިޒަމް ތައާރަފު ކުރެއްވުމުގައި ކެރެފާ ނަސީމްގެ ދައުރު ވަރަށް ބޮޑުކަން ފާހަގަކުރައްވާފަ އެވެ.

ޒަކީ ވިދާޅުވެފައިވަނީ ނަސީމުގެ އިތުރުން، ޒަކީ އާއި ޔުނިވަރސަލް ވެރިޔާ މުޙައްމަދު މަނިކު އަދި ޗަމްޕާ ޙަސަން އަފީފަކީ ރާއްޖެއަށް ޓޫރިޒަމް ތަޢާރަފު ކުރުމުގައި ޢަމަލީ ގޮތުން އެންމެ ފުރަތަމަ އުޅުއްވި ބޭފުޅުން ކަމަށެވެ.

މަޓާޓޯގެ ޓްރެވަލް އެވޯޑްސްގެ ގާލާ ހަފުލާގައި، ފަތުރުވެރިކަމުގެ ދާއިރާއިން އެކިގޮތްގޮތުން ފާހަގަކޮށްލެވޭ ރިސޯޓުތަކާއި އެއަރލައިންތަކާއި ހޮޓާތަކުގެ އިތުރުން ކުންފުނިތަކަށްވެސް އެވޯޑު ދީފައިވެއެވެ.

މިއަހަރުގެ އެވޯޑް ހަފުލާގައި ދާއިރާގެ 200 އަށްވުރެ ގިނަ ފަރާތުން ވަނީ ބައިވެރިވެފައެވެ.

ރާއްޖެ އަންނަ ފަތުރުވެރިން އަހަރުން އަހަރަށް އިތުރުވެގެން އަންނައިރު މަޓާޓޯގެ މަޤްޞަދަކީ ފަތުރުވެރިކަމުގެ ދާއިރާ ކުރިއަރުވައި އިތުރަށް ތަރައްޤީ ކޮށްދިނުމުގައި އެހީތެރިވެ ދިނުންކަމަށް އެ އެސޯސިއޭޝަނުން ބުނެއެވެ. އެގޮތުން މި އެވޯޑުގެ ސަބަބުން ފަތުރުވެރިންނަށް ޚިދުމަތްދޭ ތަންތަން ގިންތި ކުރެވި، ދާއިރާ ކުރިއެރުމަށް އެހީތެރި ވެދޭނެކަމަށްވެސް އެ އެސޯސިއޭޝަނުން ބުނެއެވެ.