އިސް ފަނޑިޔާރު ޝުޖާއު އުސްމާނަށް މަރުގެ އިންޒާރު ދިން މައްސަލައެއް ބަލަނީ
ފުލުހުން ދަނީ މައްސަލަ ބަލަމުން
ހައިކޯޓުގެ އިސްގާޒީ ޝުޖާއު އުސްމާން
ހައިކޯޓުގެ އިސް ގާޒީ ޝުޖާއު އުސްމާނަށް މަރުގެ އިންޒާރުދިން މައްސަލައެއް ފުލުހުން ބަލަން ފަށައިފިއެވެ.
ފުލުހުން މީޑިއާތަކަށް ފޮނުވާފައިވާ މެސެޖެއް ބުނީ، އިސް ގާޒީ ޝުޖާއު އުސްމާން އަށް މަރުގެ އިންޒާރު ދީފައިވާތީވެ އެ މައްސަލަ ބަލައިދިނުމަށް އެދި ހައިކޯޓުން ފޮނުވާފައިވާ ސިޓީއެއް ފުލުހުންނަށް ލިބިފައިވާ ކަމަށެެވެ. މި މައްސަލައިގެ އިތުރު ތަފްސީލެއް ފުލުހުން ހާމައެއް ނުކުރެއެވެ.
މައުލޫމާތު ލިބިފައިވާ ގޮތުން ހައިކޯޓުގެ އިސްގާޒީ އަށް މަރުގެ އިންޒާރު ދީފައިވަނީ ޗުއްޓީ ހޭދަކޮށްލެވުމަށް ކ.މާފުއްޓަށް ވަޑައިގެން އުޅުއްވަނިކޮށެވެ. 2015 ވަނަ އަހަރުން ފެށިގެން ހައި ކޯޓުގައި މަސައްކަތް ކުރައްވަމުން ގެންދަވާ ޝުޖާއު އުސްމާން އެ ކޯޓުގެ އިސް ފަނޑިޔާރުގެ މަގާމަށް އައްޔަން ކުރެއްވީ މިދިޔަ އަހަރުއެވެ. އޭގެ ކުރިން އޭނާ ހުންނެވީ ކްރިމިނަލް ކޯޓުގެ ފަނޑިޔާރު ކަމުގައެވެ.
