ފެންބޮޑުވުމުގެ ސަބަބުން އިންނަމާދޫ ގެއަކުން މީހުން ބަދަލުކޮށްފި
20 ޑިސެމްބަރު 2019 | ހުކުރު 13:21ވިއްސާރަ ގައި ފެންބޮޑުވި ގެތަކަށް އެހީތެރިކަން ފޯރުކޮށްދިނުމުގެ މަސައްކަތް ދަނީ ކުރަމުން
ރަށެއްގައި ބޮޑުވެފައިވާ ފެންގަނޑު ބަޔަކު ހިއްކަނީ
ރާއްޖޭގެ އެކި ހިސާބުތަކަށް މި ދުވަސްވަރު ކުރަމުންދާ ވިއްސާރައިގެ ސަބަބުން ރ.އިންނަމާދޫގައި ފެންބޮޑުވެ އެ ރަށު އެއް ގޭގެ މީހުން އެހެން ތަނަކަށް ބަދަލުކުރެވިފައިވާ ކަމަށް ނޭޝަނަލް ޑިޒާސްޓަރ މެނޭޖްމެންޓު އޮތޯރިޓީ (އެންޑީއެމްއޭ) އިން ބުނެފިއެވެ.
ހުކުރު ދުވަހު ޑިޒާސްޓަރ އިން ކޮށްފައިވާ ޓްވީޓެއްގައި ބުނީ، ވިއްސާރައިގައި ބ. ކަމަދޫ، ބ. ހިތަދޫ، ބ. ގޮއިދޫ އަދި ރ. އިންނަމާދޫ ގައި ވަނީ ފެންބޮޑުވެފައިވާ ކަމަށެވެ.
އެ ރަށްތަކުގައި ފެން ހިންދުމުގެ މަސައްކަތް ފުލުހުންނާއި އެމްއެންޑީއެފްއާ ގުޅިގެން ދަނީ ކުރަމުންނެވެ. ފެންބޮޑުވުމުގެ ސަބަބުން ރ.އިންނަމާދޫ އެއް ގޭގެ މީހުން އެހެން ގެއަކަށް ބަދަލުކުރެވިފައި ކަމަށް އެންޑީއެމްއޭ އިން ބުންޏެވެ. އެންޑީއެމުން ދަނީ އެރަށްތަކަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް ކައުންސިލުތަކާއި ގުޅިގެން މޮނީޓަރ ކުރަމުންނެވެ.
ކުރިއަށް ގަޑިތަކުގައި މޫސުން ލަފާކުރާގޮތުން މެދު ރާއްޖޭގެ އަތޮޅުތަކަށް ހުކުރު ދުވަހު ހަވީރުން ފެށިގެން ވިއްސާރަކުރާނެ އެވެ. ފެންބޮޑުވުމުގެ ކުރިން ދުރާލާ ރައްކާތެރިވުމުގެ ފިޔަވަޅު އެޅުމަށް ޑިޒާސްޓަރ މެނޭޖްމެންޓުން ވަނީ އިލްތިމާސްކޮށްފައެވެ.
