ހުޅުމާލޭ ޖަލުގައި ހުކުމް ތަންފީޒު ކުރަމުން ދިޔަ މީހަކު މަރުވެއްޖެ އެވެ.

ޕްރިޒަންސްގެ މީޑިއާ އޮފިޝަލް އަހުމަދު ނަސީމް ރާއްޖެ.އެމްވީ އަށް މައުލޫމާތު ދެއްމުން ވިދާޅުވީ، މަރުވެފައިވަނީ ޅ. ނައިފަރަށް ނިސްބަތްވާ އުމުރުން 60 އަހަރުގެ މީހެއް ކަމަށެވެ.

އެ ފިރިހެން މީހާ މަރުވެފައިވަނީ ބުރާސްފަތި ދުވަހުގެ ފަތިހު 3:50 ހާއިރުއެވެ. މައުލޫމާތު ލިބިފައިވާ ގޮތުގައި އެ މީހާ ތަންފީޒު ކުރަމުން ދިޔައީ ކުޑަ ކުއްޖަކަށް ޖިންސީ ގޯނާ ކުރުމާއި ގުޅިގެން ކޮށްފައިވާ 20 އަހަރު ދުވަހުގެ ހުކުމެކެވެ.

ރާއްޖެ.އެމްވީ އަށް މައުލޫމާތު ދިން މީހަކު ބުނީ، އެ ފިރިހެން މީހާ ބަލިވެ އުޅޭތާ ދުވަސްތަކެއްވެއްޖެ ކަމަށާއި، އާއިލާއާ ހަވާލުކުރަން އުޅުމުން އެމީހާގެ އާއިލާއިން މީގެ ކުރުިން ހަވާލުވެފައިނުވާ ކަމަށެވެ. އޭނާ މަރުވެފައިވަނީ، އައިޖީއެމް ހޮސްޕިޓަލުގައި ފަރުވާދެމުން ދަނިކޮށެވެ.

އެމިހާ މަރުވިއިރު އޭނާ ގެންދިޔައީ ޑައިލެސިސް ހަދަމުންނެވެ. މިހާރު އޭނާގެ ހަށިގަނޑު ވަނީ ވަޅުލާފައެވެ.