މިފެށޭ ހަފުތާއާއި ހަމައަށްވެސް މޫސުން ރަނގަޅުވާނެ ކަމަށް ލަފާ ނުކުރެވޭ ކަމަށް މޫސުމާ ބެހޭ ޤައުމީ އިދާރާ (މެޓް އޮފީސް) އިން ބުނެފިއެވެ.

ހުކުރު ދުވަހު "ރާއްޖެޓީވީ" އަށް ދެއްވި އިންޓަރވިއުއެއްގައި މެޓް އޮފީހުގެ އޮފިޝަލު ވިދާޅުވީ، ކުރިއަށްއޮތް 24 ގަޑިއިރަށް ބަލާއިރު ރާއްޖޭގެ ކަނޑުތައް އާދައިގެ ވަރަކަށް ގަދަވާނެ ކަމަށާއި، ވިލާގަނޑުގައި އިތުރަށް ކަނޑުތައް ގަދަވެގެންދާނެ ކަމަށެވެ. އަދި ހޮނިހިރު ދުވަހުން ފެށިގެން ގޮސް އާދިއްތަ ދުވަހާއި ހަމައަށްވެސް ރާއްޖޭގެ އެކި ހިސާބުތަކަށް ވާރޭ ވެހުމުގެ ފުރުޞަތު އެބަ އޮތް ކަމަށާއި، މޫސުން އަދި އެއްކޮށް އަލިނުވާނެ ކަމަށް އޭނާ ވިދާޅުވިއެވެ.

އޭގެ އިތުރުން ރާއްޖޭގެ ހުރިހާ ހިސާބަކަށްވެސް 8 މޭލާއި 18 މޭލާއި ދެމެދުގެ ބާރުމިނެއްގައި ވައިޖެހޭނެ ކަމަށާއި ވިލާގަނޑުގައި 40 މޭލަށް ވައިގަދަވާނެކަމަށް ލަފާ ކުރެވޭކަމަށް އޭނާ ވިދާޅުވިއެވެ.

އޭގެ އިތުރުން، ވޭތުވެ ދިޔަ 24 ގަޑިއިރަށް ބަލާއިރު، އެންމެ ގިނައިން ވާރޭ ވެހިފައިވަނީ ބ ތުޅާދުއަށް ކަމަށާއި، އެރަށަށް 104 މިލިމީޓަރަށް ވާރޭ ވެހިފައިވާ ކަމަށް އޭނާ ވިދާޅުވިއެވެ.

މޫސުމާބެހޭ ޤައުމީ އިދާރާއިން އެހެން ބުނެފައިވާއިރު، ހުކުރު ދުވަހުގެ މެންދުރު 11:00 ގެ ނިޔަލަށް ބ އަތޮޅުގެ ރަށްތަކަށް ޔެލޯ އެލަރޓެއްވެސް ނެރުނެވެ.

އޭގެ އިތުރުން، ކުރިއަށް އޮތް 24 ގަޑިއިރަށް ބަލާއިރު، އުތުރާއި މެދުތެރޭގެ އަތޮޅުތަކަށް ބޯކޮށް ވާރޭވެހޭނެ ކަމަށްވެސް މެޓް އޮފީހުން ލަފާކޮށްފައިވެއެވެ.