އިންޑިއާއިން ރާއްޖެއަށް ވެދޭ އެހީގެ ބަދަލުގައި ރާއްޖެއިން ވަކި ކަންތައްތަކެއް ބޭނުން ނުވާ ކަމަށް އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު ސަންޖޭ ސުދީރު ވިދާޅުވެއްޖެއެވެ.

ރާއްޖެޓީވީއަށް ދެއްވި ޚާއްސަ އިންޓަވިއުއެއްގައި އެމްބެސަޑަރު ސުދީރު ވިދާޅުވީ 50 އަށް ވުރެ ގިނަ އަހަރު ރާއްޖެއާއި އިންޑިއާގެ ގުޅުން ދެގޮތެއް ނުވެ ދެމިއޮތީ ވަކި އެދުމެއްނެތި މިގުޅުން ދެޤައުމުން ދެމެހެއްޓުމުން ކަމަށެވެ. މިގުޅުމަކީ ދެޤައުމުގެ މެދުގައި އޮންނަ އެކުވެރިކަމާއި، އިތުބާރުގެ މައްޗަށް ބިނާވެފައިވާ ގުޅުމެއް ކަމަށް އެމްބެސަޑަރު ވިދާޅުވިއެވެ. އަދި ވިދާޅުވީ ދިމާވި އުނދަގޫ ޙާލަތްތަކުގައި ވެސް ދެޤައުމުގެ ގުޅުން ބަދަހިކޮށް އޮތީ އުފެދިފައިވާ އިތުބާރެއްގެ ސަބަބުން ކަމަށެވެ.

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ވެރިކަމަށް އަލިއަޅުއްވާލައްވާ އެމްބެސަޑަރު ސުދީރު ވިދާޅުވީ ރައީސް ޞާލިޙު ވެރިކަމުގެ ހުވާކުރައްވައި، އެމަނިކުފާނު އިންޑިއާއަށް ކުރެއްވި ދަތުރުފުޅަށްފަހު، ދެޤައުމުގެ ގުޅުން ވަރަށް ބޮޑަށް ބަދަހިވި ކަމަށެވެ. އެގޮތުން މިހާރު ގިނަ މަޝްރޫޢުތަކުގެ މަސައްކަތްތަކާއި، އެހެނިހެން ތަރައްޤީގެ މަޝްރޫއުތައް ދެޤައުމު ގުޅިގެން ބާރު ދުވެއްޔެއްގައި ކުރިއަށްދާ ކަމަށް އެމްބެސަޑަރު ސަންޖޭ ވިދާޅުވިއެވެ. އަދި އެކި ދާއިރާތަކުން 18 އެއްބަސްވުމެއްގައި ސޮއިކުރެވިފައިވާ ކަމަށެވެ.

ރާއްޖޭގެ ބަޖެޓުގެ ދަތިތަކަން އޮވެ އިޤަތިޞާދު އަޑިއަޅާފައި އޮތް ވަގުތެއްގައި އިންޑިއާއިން 1.4 މިލިއަން ޑޮލަރުގެ އެހީއެއްވެދީ، ބަޖެޓުގެ ތާށިކަމުން އަރައިގަތުމަށް އެހީތެރިކަން ފޯރުކޮށްދީފައިވާކަން އެމްބެސަޑަރު ފާހަގަކުރެއްވިއެވެ. އަދި ބަޖެޓްގެ ސަޕޯޓަށް 50 މިލިއަން ޑޮލަރު ލައިން އޮފް ކްރެޑިޓްގެ ގޮތުގައި 800 މިލިއަން ޑޮލަރުގެ އެހީގެ ސަބަބުން އިޤްތިޞާދު އަލުން ރަނގަޅު ކުރުމަށްހުރި ގޮންޖެހުންތަކަށް އަރައިގަނެވުނު ކަމަށް ވިދާޅުވިއެވެ.

އެމްބެސަޑަރު ސުދީރު ވިދާޅުވީ އިންޑިއާއިން ރާއްޖޭގެ ތަޢުލީމާއި، ޞިއްޙީ ދާއިރާ ކުރިއެރުވަށް މަސައްކަތް ކުރާނެ ކަމަށެވެ. އަދި 100 އެނދުގެ ކެންސަރު ހޮސްޕިޓަލެއް އިންޑިއާގެ އެހީގައިއަޅަން ނިންމާފައިވާއިރު، ސެނެހިޔާ އަދި އައިޖީއެމްއެޗަށް ޑޮކްޓަރުންގެ އެހީތެރިކަން ފޯރުކޮށްދެމުންދާ ކަމަށެވެ.

މީގެ އިތުރުން އެމްބެސަޑަރު ސަންޖޭ ވިދާޅުވީ ރައީސް ޞާލިޙާއި، އިންޑިއާގެ ބޮޑުވަޒީރު ނަރެންދުރަ މޯދީއާ އެއްއަހަރުގެ ތެރޭގައި، ރަސްމީ 04 ބައްދަލުވުން ބާއްވާފައިވާ ކަމަށާއި، އެއީ ވެސް ވަރަށް ބޮޑު ކުރިއެރުމެއް ކަމަށެވެ. އަދި މޯދީގެ ބޮޑުވަޒީރުގެ މަޤާމާ ހަވާލުވެވަޑައިގެން ފުރަމާނަ ދަތުރުފުޅެއް ފުރަތަމަ ކުރެއްވީ ރާއްޖެއަށްކަން އެމްބެސަޑަރު ފާހަގަކުރެއްވިއެވެ.

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު، މަޖިލިސް މެންބަރުންނާއެކު އިންޑިއާއަށް ކުރެއްވި ދަތުރުފަތުރަށް އަލިއަޅުއްވާލައްވާ އެމްބެސަޑަރު ސުދީރު ވިދާޅުވީ މިދަތުފުޅުތަކުގެ ސަބަބުން ވެސް ދެޤައުމުގެ ގުޅުން ވަރަށް ބޮޑަށް ބަދަހިވެފައިވާ ކަމަށެވެ.

އެމްބެސަޑަރު ސުދީރު ވިދާޅުވީ އިލެކްޝަންސް ކޮމިޝަނާއި، ފައިނޭންޝަލް އިންޓެލިޖެންސް ޔުނިޓާ ދެމެދު ވެފައިވާ އެއްބަސްވުމެއްގައި ސޮއިކޮށްފައިވާ ކަމަށާއި، މީގެ ދަށުން ރިކޯޑްތައް ޑިޖަޓަލައިޒް ކުރުމަށް އެހީވެދުނުމާއި، ފެންވަރު ރަނގަޅު ކުރުމަށް އެހީތެރިވުމަށް އެއްބަސްވެފައިވާ ކަމަށެވެ.

އިދިކޮޅު ފަރާތްތަކުން ތުހުމަތުކުރާ ކަންތައްތަކަށް އަލިއަޅުއްވާލައްވާ އެމްބެސަޑަރު ސަންޖޭ ވިދާޅުވީ އެއްވެސް ކަހަލަ ފޮރުވާފައިވާ އެޖެންޑާއެއް ނޯންނާނެ ކަމަށާއި، ރައީސް ޞާލިޙު އިންޑިއާގެ ސަރުކާރަށް ކުރާ އިތުބާރު ދަމަހައްޓަން މަސައްކަތް ކުރާނެ ކަމަށެވެ.