މަސްތުވެވޭ ހޮޓަލެއްގެ ވާހަކަ އަޑުއެހީމުތަ؟

މަސްތުވާތަކެއްޗާއި ދެކޮޅަށް ކުރާ މަސައްކަތުގެ ތެރެއިން ބުރާސްފަތި ދުވަހުގެރޭ ފުލުހުން ވަނީ މާލޭގެ މާފަންނު ލޮނުމިދިލިގެ ބަލާ ފާސްކޮށްފައެވެ. އެގެއިން އެއްޗެހިތަކެއް ފުލުހުން ގެންގޮސް މީހުންތަކެއް ހައްޔަރު ކުރިއެވެ. މަސްތުވާތަކެތި ބޭނުންކުރާ "އައްޑާތައް" ބަލާ ފާސްކުރިއިރު، ފުލުހުން ވަނީ މީޑިއާތަކަށް މިތަންތަނުގައި ހިނގާކަންކަން ގާތުން ބަލާލުމުގެ ފުރުސަތު ދީފައެވެ. އެ ގޭގައި ހިންގި އޮޕަރޭޝަން ދެއްކުމަށް ފުލުހުންގެ މީޑިއާ އޮފިސަރުގެ އިރުޝާދުގެ ދަށުން ހުރިހާ ނޫސްވެރިން އެރުވީ އޭ ގޭގެ ދެވަނަ ފްލޯއަށެވެ.

ހަނި ހަނި ސިޑިއަކުން އަރައިގެން ދިޔައިރު ފާރުގައި އެކި ތަންތަނުގައި އެކި ކަހަލަ ކުރެހުންތަކާއި އެކި ''ގޭންގު" ތަކުގެ ނިޝާންތައް ހުއްޓެވެ. ސިޑިން މައްޗަށް އަރައިގެން ގޮސް އޮފިސަރު ދެއްކީ ކުޑަ ދެ ކޮޓަރިއެކެވެ. ވަކަރުން ހުރި ދޮރުހުޅުވާލިއިރު އެތާ ތެރެއިން ފެނިގެން ދިޔަ މަންޒަރުން އަހަރެން ހުރީ ހަމަ ހައިރާން ވެފައެވެ. އެއީ އާދައިގެ ކޮޓަރިއެއް ނޫނެވެ. އެއީ ސީދާ މަސްތުވުމަށް ބޭނުންކުރާ ތަކެތީގެ ހިދުމަތްދޭ ކުޑަ ހޮޓަލެކެވެ.

އެތަނުގެ ތެރޭގައި ހުރި މޭޒެއްގައި ހުރީ މަސްތުވުމަށް ބޭނުންކުރާ އެކި ކަހަލަ އާލަތްތަކެވެ. ފޮއިލުން ފެށިގެން ގޮސް ''ޕައިޕާއީ'' މަސްތުވުމަށް ބޭނުންކުރާ އެކި ކަހަލަ އާލަތްތަކެވެ. އެ ކޮޓަރި ތެރެއަށް ބަލާލީމަ އެނގެނީ އެތަން މަސްތުވާތަކެތީގެ އައްޑާއެއްގެ ގޮތުގައި ބޭނުންކުރާތަނާ ދުވަސްތަކެއް ވެއްޖެ ކަމެވެ.

އެ ކޮޓަރީގެ ފާރުތަކުގައި އެތަނަށް އަންނަ މީހުންނަށް ތަނުގެ ތެރޭގައި ކަންތައް ކުރާނެ ގޮތާއި، އެތަނުގައި އަމަލުތައް ބަހައްޓާނެ ގޮތުގެ އިރުޝާދުގެ މެސެޖުތައް ފާރުގައި ލިޔެވިފައި ހުއްޓެވެ. އަދި އެބަޔަކު ކުރާ ކަމެއްކޮށް ނިމުމުން، އެތަން ދޫކޮށް ދިޔުމަށްވެސް ވެއެވެ. އިންތިޒާމުތައް އެހާވެސް "ފުރިހަމަ" އެވެ.

''ކޮންމެ މީހަކުވެސް ބޮއެ ނިމުނުހާ އަވަހަށް ތަން ދޫކޮށްފައި ދިޔުމަކީ އަހަރުމެންގެ ވަރަށް ބޮޑު އެދުމެއް'' މިއީ އެތަނުގައި ލިޔެފައިވާ އެއް މެސެޖެވެ. އެތަނަށް އެމީހުން ކިޔަނީ ''ލޮނު ސީޓީ'' އެވެ. އެ ކޮޓަރިއާއި ޖެހިގެން ހުރިި ކޮޓަރިއަކީވެސް ހަމަ ސީދާ އެކަމަށް ހަދާފައި ހުރި ތަނެކެވެ.

އެތަނަށް އަންނަ ''މެހެމާނުންނަށް'' އިށީންދެގެން ތިބެން ގޮނޑިއާއި އެނދުތައް ޖަހާފައި ހުއްޓެވެ. މިތަން ފެނިފައި، މީގެ ކިތައް "ލޮނު ސިޓީ" މާލޭގައި ހުންނާނެބާއޭ ހިތަށް އަަރައެެވެ. އަދި މިއީ ކޮން އިރަކުން ފެށިގެން ލިބޭ "ހިދުމަތެއް" ކަމާއިމެދުވެސް ހިތުގައި ސުވާލު އުފެދުނެވެ.

މިއީ ރާއްޖޭގައި މިފަދަ ތަނެއް ފެނުނު ފުރަތަމަ ފަހަރަށް ކަމުގައިވިޔަސް ބޭރުގައުމުތަކުގައި މިފަދަ ތަންތަނަށް ކިޔާ އުޅެނީ ''ކްރެކް ހައުސް'' އެވެ. ކްރެކް ހައުސްތަކަކީ މަސްތުވާތަކެތި ބޭނުންކުރަން ހަދާފައި ހުންނަ ތަންތަނެވެ. އެންމެ ފަހުން ރާއްޖޭގައިވެސް މިތަންތަން އާންމުވާން ފެށީއެވެ.

މިގެ އެކަނި ބަލާލުމުގެ ފުރުސަތު ލިބުނަސް، ފުލުހުން ބުނާ ގޮތުންނަމަ، އަދި މީގެ އެތައް ހާއްޔެއް އެބަހުއްޓެވެ. މި ޑިސެމްބަރު މަހުގެ ތެރޭގައި އެކަނިވެސް މީގެ އިތުރު ހަތަރު ތަނެއް ބަލާފާސްކޮށް، ފުލުހުން ވަނީ 29 މީހަކު ހައްޔަރުކޮށްފައެވެ.