ރާއްޖޭގެ އާބާދީއަށްވުރެ، ގިނަ މީހުން ބެލި ކްލެސިކޯ މެޗު އެއްވަރު ވެގެން ނިމިއްޖެ

ސްޕެނިޝް ލަލީގާގައި ރެއާލް މެޑްރިޑް އަދި ބާސެލޯނާގެ ކުރިމަތިލުން އެއްވަރުވެގެން ނިމިއްޖެއެވެ.

ކްލެސިކޯގެ ނަމުން މަޝްހޫރުވެފައިވާ މި މެޗު ނިމިގެންދިޔައީ 0-0 ގެ ނަތީޖާ އަކުންނެވެ.

ބާސެލޯނާގެ ދަނޑުގައި ކުޅުނު މި މެޗު ފެށިގެން ރެއާލުން ވަނީ މޮޅު އެޓޭކިންގ ގޭމެއް ކުޅެފައެވެ. އެގޮތުން މެޗުގެ ފުރަތަމަ 20 މިނެޓުގެ ތެރޭގައި ރެއާލުން ވަނީ ބާސެލޯނާގެ ގޯލަށް 4 ހަމަލާ ފޮނުވައިލައިފައެވެ. ފުރަތަމަ ހާފުގައި ބާސެލޯނާއަށް ލަނޑު ޖަހަން ހުސް ފުރުސަތުތަކެއް ލިބި ވަނީ ބޭކާރުވެފައެވެ. މެސީ ހުސްކޮށް ހުރެ ފޮނުވާލި ބޯޅަ ރެއަލް މެޑްރިޑްގެ ކެޕްޓަން ޑިފެންޑަރ ސާޖިއޯ ރާމޮސް ވަނީ ގޯލު ރޮނގު މަތިން ދިފާއު ކޮށްފައެވެ. މި ހާފުގައި ރެއާލް މެޑްރިޑްގެ ގެރެތް ބޭލް އަދި މިޑްފިލްޑަރ ވަލްވާޑޭ ވަނީ ނުރައްކާތެރި ދެ ހަމަލާ ބާސެލޯނާގެ ގޯލަށް ފޮނުވައިލައިފައެވެ. ބޭލް ފޮނުވާލި ބޯޅަ ބާސާގެ ކީޕަރު ދިފާއު ކުރިއިރު ވަލްވާޑޭ ފޮނުވާލި ހަމަލާ ގޯލާ އަމާޒެއް ނުވެއެވެ.

މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި ބާސާގެ ލުއިސް ސުއަރޭޒް އަށް ވަނީ ލަނޑު ޖަހަން ރަނުގެ ފުރުސަތުތަކެއް ލިބި ބޭކާރުވެފައެވެ. މި ހާފުގައި ރެއާލްގެ ފޯވާޑް ގެރެތް ބޭލް ލަނޑެއް ޖެހި ނަމަވެސް ވީއޭއާރް ބެލުމަށްފަހު ރެފްރީ ނިންމީ އޭނާ ލަނޑު ޖެހީ އޮފްސައިޑްގައި ހުރެގެން ކަމަށެވެ.

މި ނަތީޖާ އާއި އެކު ދެ ޓީމަށް ވެސް 36 ޕޮއިންޓް ލިބިފައިވާއިރު ތާވަލުގެ އެއްވަނައިގައި ބާސެލޯނާ އޮތީ ގޯލުގެ ތަފާތުންނެވެ. ތިންވަނައިގައި އޮތް ސެވިއްޔާ އަށް ލިބިފައިވަނީ 31 ޕޮއިންޓެވެ.

މި ސީޒަނުގެ ފުރަތަމަ ކްލެސިކޯ ފޭސްބުކް ލައިވް މެދުވެރިކޮށް ބެލި މީހުންގެ އަދަދު ހަތަރު ލައްކައަށް ވުރެ ގިނައެވެ. އެންމެ ފަހުގެ ކްލެސިކޯ ތިން ލައްކަ އަށް ވުރެ ގިނަ މީހުން ވަނީ ފޭސްބުކް މެދުވެރި ކޮށް ބަލައިފައެވެ.