އިމިގްރޭޝަންގެ ކޯލް ސެންޓަރުގެ ޚިދުމަތް ދޭން ފަށައިފި
މިޚިދުމަތް އިފްތިތާހުކޮށްދެއްވީ މިނިސްޓަރ އޮފް ޑިފެންސް މާރިޔާ އަހުމަދު ދީދީ
އިފްތިތާހު ކުރުމުގެ ރަސްމިއްޔާތުގެ ތެރެއިން
މޯލްޑިވްސް އިމިގްރޭޝަންގެ ކޯލް ސެންޓަރުގެ ޚިދުމަތް ދޭން ފަށައިފިއެވެ.
ބުދަ ދުވަހު މި ޚިދުމަތް އިފްތިތާހުކޮށްދެއްވީ މިނިސްޓަރ އޮފް ޑިފެންސް އަލްއުސްތާޒާ މާރިޔާ އަހުމަދު ދީދީއެވެ.
މި ރަސްމިއްޔާތު ޝަރަފުވެރިކޮށްދެއްވާ މިނިސްޓަރ މާރިޔާ ވިދާޅުވީ މި ކޯލްސެންޓަރުގެ ޚިދުމަތްވެގެންދާނީ ރައްޔިތުންނަށް ފޯރުކޮށްދެވޭ މުހިއްމު ޚިދުމަތަކަށް ކަމަށެވެ. އަދި ރާއްޖޭގެ ރައްޔިތުންށް ހަމަހަމަކަމާއި އެކު ޚިދުމަތް ލިބޭނެ ގޮތެއް ހޯދައިދިނުމަކީ މި ސަރުކާރުގެ އަމާޒުކަމަށް ވެސް މިނިސްޓަރ ވިދާޅުވިއެވެ.
އިފްތިތާހު ކުރުމުގެ ރަސްމިއްޔާތުގައި ވާހަކަދައްކަވަމުން ކޮންޓްރޯލަރ ޖެނެރަލް މުހައްމަދު ހުސައިން ވިދާޅުވީ ރައްޔިތުންނަށް ބޭނުންވާ މައުލޫމާތު އެކަށީގެންވާ ގޮތުގައި ނުލިބޭ ކަމުގެ ޝަކުވާ އަބަދުވެސް ލިބޭ ކަމަށާއި ނަމަވެސް މި ކޯލްސެންޓަރުގެ ސަބަބުން ރައްޔިތުންގެ އުދާސްތަކަށް ތަސައްލީއެއް ލިބިގެންދާނެ ކަމަށެވެ. އިތުރަށް ވާހަކަދައްކަވަމުން އޭނާ ވިދާޅުވީ އިމިގްރޭޝަންގެ މަޤުޞަދަކީ ރައްޔިތުންނާއި ގުޅިގެން ޒަމާނީ ވަސީލަތްތަކުގެ ބޭނުންކޮށްގެން، ރައްޔިތުންނަށް ލުއިފަސޭހަ ޚިދުމަތްތަކެއް ފޯރުކޮށްދިނުން ކަމަށެވެ.
އިމިގްރޭޝަން އިން ބުނީ މި ކޯލް ސެންޓަރު މެދުވެރިކޮށް، އިމިގްރޭޝަނުން ދެމުންދާ ޚިދުމަތްތަކާއި ގުޅޭ ގޮތުން މަޢުލޫމާތު ފޯރުކޮށްދެވޭނެ ކަމަށެވެ. އެގޮތުން އިމިގްރޭޝަންގެ ކޯލް ސެންޓަރުގެ ނަމްބަރަކީ 1434 އެވެ.
