ޒުވާން ޓީމުގެ ފަރާތުން އުންމީދީ މެޗެއް!

އިނގިރޭސި ލީގު ކަޕްގައި ޒުވާން ޓީމާއެކު ނިކުތް ލިވަރޕޫލްގެ ފަރާތުން އުންމީދީ ކުޅުމެއް ފެނިގެންދިޔައިރު، އެސްޓަން ވިލާއިން ލިވަރޕޫލް ބަލިކޮށްފިއެވެ.

ލިވަރޕޫލްގެ ސީނިއަރ ޓީމަށް ބުދަ ދުވަހު ފީފާ ކްލަބް ވޯލްޑްކަޕުގެ މެޗެއް ކުޅެން ޖެހިފައިވުމުން އަންގާރަ ދުވަހު އޮތް ލީގު ކަޕުގެ މެޗަށް ލިވަރޕޫލުން ނިކުތީ އެ ކްލަބުގެ 23 އަހަރުން ދަށުގެ ޒުވާން ޓީމާއި އެކުގައެވެ. ލިވަރޕޫލްގެ 23 އަހަރުން ދަށުގެ ޓީމުގެ އެވްރެޖް އުމުރަކީ 18- 21 އަހަރާއި ދެމެދެވެ.

މި މެޗު އެސްޓަން ވިލާ އިން ކާމިޔާބުކުރީ 5-0 ގެ ނަތީޖާ އަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، އެސްޓަން ވިލާ އިން ގެންދިޔައީ ލިވަރޕޫލްގެ ގޯލަށް ނުރައްކާ ކުރަމުންނެވެ. އެގޮތުން މެޗުގެ 14 ވަނަ މިނެޓުގައި އެސްޓަން ވިލާއިން ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ ހަރީހޭން އެވެ. މި ލަނޑާ އެކު އެސްޓަން ވިލާ އިން ވަނީ އެ ޓީމުގެ އެޓޭކްތައް އިތުރަށް ވަރުގަދަ ކޮށްފައެވެ. އެގޮތުން މެޗުގެ 17 ވަނަ މިނެޓުގައި ލިވަރޕޫލްގެ މޯގަން ބޮއީސް އަތުން ވަނީ ބައިކޮޅަށް ލަނޑެއް ވަދެފައެވެ.

މި ލަނޑާ އެކު ލިވަރޕޫލުން އެޓީމުގެ ކުޅުން ރަނގަޅު ކޮށްފައިވެއެވެ. އެގޮތުން ލިވަރޕޫލްގެ ޒުވާން ކުޅުންތެރިން ވަނީ އެސްޓަން ވިލާގެ ގޯލަށް ނުރައްކާ ކޮށްފައެވެ. ނަމަވެސް މެޗުގެ 37 ވަނަ މިނެޓުގައި އެސްޓަން ވިލާއިން ވަނީ އިތުރު ލަނޑެއް ޖަހާ ނަތީޖާ 3-0 ކަށް ބަދަލުކޮށްލައިފައެވެ. މި ލަނޑު އެޓީމަށް ކާމިޔާބު ކޮށްދިނީ ޖޮނަތަންއެވެ. އޭނާ ވަނީ މެޗުގެ ފުރަތަމަ ހާފު ނިމުމުގެ ކުރިން އިތުރު ލަނޑެއް ޖަހާ ފަރަގު ބޮޑު ކޮށްފައެވެ.

ލިވަރޕޫލްގެ ޒުވާން ކުޅުންތެރިން ދެ ވަނަ ހާފަށް ނިކުތީ ޑިފެންސިވް ގޭމަކަށް ވިސްނައިގެންނެވެ. އެގޮތުން ލިވަރޕޫލުގެ ޑިފެންޑަރުން ވަނީ އެސްޓަން ވިލާގެ ކުޅުންތެރިން ފޮނުވާލި ގިނަ ހަމަލާތަކެއް ދިފާއު ކޮށްފައެވެ. ނަމަވެސް މެޗުގެ އެންމެ ފަހު މިނެޓުގައި އެސްޓަން އިން ވަނީ އިތުރު ލަނޑެއް ޖަހާ ނަތީޖާ 5-0 ކަށް ބަދަލުކޮށްލައިފައެވެ.

މި ނަތީޖާއާ އެކު ލިވަރޕޫލުން ވަނީ މި މުބާރާތުން ކަޓާފައެވެ.