"އަހަރެންގެ ދޮންދަރި ކޮންމެސް ގޮތަކުން މި ފޮޓޮއިން ބޭރުކޮށްދީ" : ދޮންމަންމަ
18 ޑިސެމްބަރު 2019 | ބުދަ 11:43ދޮންދަރި ނުހުންނާނެހެން ފޮޓޯތައް "އެޑިޓްކޮށްދިނުމަށް" އޭނާ އެދުނު
އަންހެން މީހާ ނަގާފައިވާ ފެމިލީ ފޮޓޯ
މަންމައަކު ދޮންދަރިއަކާމެދު ކަންތައްކުރި ގޮތުން މުޅި މީސް މީޑިއާގައި އޭނާއަށް ފާޑުކިއުން އަމާޒުވެއްޖެއެވެ.
އިނިރޭސިވިލާތުގައި ހިނގި މި ހާދިސާގައި އަންހެން މީހާ ވަނީ އޭނާގެ އާއިލާގެ ފޮޓޯތަކެއް މީސް މީޑިއާގައި ހިއްސާކޮށް، އޭނާގެ ދޮންދަރި ނުހުންނާނެހެން އެ ފޮޓޯތައް "އެޑިޓްކޮށްދިނުމަށް" އެދިފައެވެ. އެގޮތުން އޭނާ ފޭސްބުކްގައި ހިއްސާކޮށްފައި ވަނީ އޭނާއާއި ކުޑަ 3 ފިރިހެން ކުދިންނާއި އެކު ނަގާފައިވާ ފޮޓޯތަކެކެވެ.
އެ ފޮޓޯތަކުން ފެންނަ ގޮތުގައި އޭނާގެ ކުޑަ ދެ ފިރިހެންކުދިން ލޯތްބާއެކު އުރާލައިގެން ހުންނައިރު، ތަންކޮޅެއް ދުރުގައި އޭނާގެ ދޮންދަރި އިށީނދެލައިގެން އިނދެއެވެ. ބާލާބެލުމަށް އޭނާގެ އުމުރުން ވާނީ ގާތްގަނޑަކަށް 5 ވަރަކަށް އަހަރެވެ.
އެ ފޮޓޯ މީސް މީޑިއާއަށް ލުމަށްފަހު އަންހެންމީހާ ޖަހާފައިވަނީ އޭނާގެ ދޮންދަރި ފޮޓޮއިން ބޭރު ކުރެވޭނެ ގޮތެއް އޮތްތޯއާއި، އާއިލާގެ ހުރިހާ މެންބަރުން ތިބި ފޮޓޮއިންވެސް ދޮންދަރި ބޭރުކޮށްލަން ބޭނުންވާ ކަމަށެވެ.
އެހިސާބުން އޭނާއަށް އާންމުންގެ ފަރާތުން ވަރަށް ގިނަ ފާޑުކިއުން އަމާޒުވެފައިވާއިރު، ފަހުން އޭނާ ވަނީ ފޮޓޯގެ "ކެޕްޝަން" ބަދަލުކޮށް، އޭނާގެ ދޮންދަރި ދެކެ އޭނާވެސް ލޯބިވާ ކަމަށާއި، ނަމަވެސް އަމިއްލަ ދެ ދަރިންނާއެކު އެ ދުވަހު ފޮޓޮއެއް ނުނެގުމުން އެހެން ބުނެވުނީ ކަމަށް ބުނެފައެވެ.
އެ ފޮޓޯތައް މީސް މީޑިއާގައި ވައިރަލްވުމާއެކު ގިނަ ބަޔަކު ދަނީ އެ ކުޑަކުއްޖާއަށް ހަމްދަރުދީވެ މެސެޖުތައް ބަންޑުންކުރަމުންނެވެ.
