ޕްރިޔަންކާގެ ކުރިޔަށް އޮތް ފިލްމު ''ވައިޓް ޓައިގަރ''ގެ ޝޫޓިން ނިންމާލައިފި

ނެޓްފްލިކްސް އަށް ޕްރިޔަންކާ ޗޯޕްރާ ކުޅެދޭ ފިލްމު ''ދަ ވައިޓް ޓައިގަރ'' ގެ ޝޫޓިންގެ މަސައްކަތް ނިންމާލައިފިއެެވެ.

އިންޑިޔާ ދަރިފަސްކޮޅުގެ އޮސްޓްރޭލިޔާގެ އަރުވިންދް އަޑިގާ ލިޔެފައިވާ ވާހަކަ ފޮތުގެ މައްޗަށް ބިނާކޮށް ހަދާ މި ފިލްމުގައި ޕްރިޔާންކާއާ އެކު ހަރަކާތްތެރިވަނީ ރަޖްކުމާރު ރާއޯ އެވެ. ފިލްމުގެ ޝޫޓިންތައް އިންޑިއާގެ ވެރިރަށް ދިއްލީގައި ނެގުމަށް ފަހު ޕްރިޔަންކާ ވަނީ އެ ފިލްމުގެ މަންޒަރުތައް އެއްކޮށްނަގައި ނިމިފައިވާ ކަމަށް އިންސްޓަގްރާމް މެދުވެރިކޮށް ބުނެފައެވެ.

ފިލްމުގެ ކާސްޓުންނާއި ކްރޫންނަށް ޝުކުރު އަދާކުރަމުން ޕްރިޔަންކާ ބުނީ، އޭނާ އަށް މަސައްކަތް ކުރެވުނީ އެންމެ ރަނގަޅު ޓީމާއެކު ކަމަށެވެ. އަދި އޭނަ ހުރީ ފިލްމު ރިލީޒްކުރާ ދުވަހަކަށް ކެތްމަދުވެފައި ކަމަށެވެ.

ނޮވެންބަރ މަހު ފެށި މި ފިލްމުގެ ޝޫޓިން ދިއްލީގައި ނެގުމަށް ފަހު ބާކި ހުރި މަންޒަރުތައް ޝޫޓްކޮށްފައިވަނީ މުމްބާއީގައެވެ. މުކުލް ޑިއޯރާ ޕްރޮޑިއުސްކުރާ މި ފިލްމުގައި ފިލްމީ ދާއިރާއަށް މުޅިން އަލަށް ތަޢާރަފުވެގެންދާ އަދާރަޝް ގޯރަވް ފެނިގެންދާނެއެވެ. ފިލްމުގައި ފެނިގެންދާނީ އަވަށެއްގައި ސައި ވިއްކަން އުޅުނު މީހަކު ސަހަރަށް ގޮސްގެން ކާމިޔާބު ވިޔަފާރިވެރިއަކަށް ވެގެންދާގޮތުގެ ވާހަކައެވެ.