ބަޖެޓު ހެޔޮގޮތުގައި ބޭނުންކުރުމަށް ކައުންސިލްތަކަށް ރައީސް ނަޝީދުގެ އިލްތިމާޒް
ބަޖެޓު ރާވާއިރު މިނިސްޓްރީން ދީފައިވާ ކޯޑުތަކުން ބޭރުނުވާނޭހެން ރޭވުމަށް އިލްތިމާޒް ކުރެއްވި
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ކޮންމެ ރަށަކަށް ފިނޭންސް މިނިސްޓްރީއިން އެކުލަވާލި ބަޖެޓު ކޯޑުތަކުން ބޭރުނުވެ، އަންނަ އަހަރު ރަށްރަށުގެ ބަޖެޓު އެކުލަވާލުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިލްތިމާޒްކުރައްވައިފިއެވެ.
ހޯމަ ދުވަހު އޮތް "ވިއަވަތި ރާއްޖެ" ކައުންސިލަރުންގެ ބައްދަލުވުމުގައި ވާހަކަދައްކަވަމުން ރައީސް ނަޝީދު ވިދާޅުވީ ފިނޭންސް މިނިސްޓަރ އިބްރާހިމް އަމީރު ވަނީ ކޮންމެ ރަށެއްގެ ބަޖެޓު ވަކިން އެކުލަވާލައްވާފައި ކަމަށެވެ. އަދި އެއީ މިނިސްޓްރީއިން ކޮށްދެއްވީ ވަރަށް ބުރަ އަދި ބޮޑު މަސައްކަތެއްކަން ފާހަގަކުރައްވާ ނަޝީދު ވަނީ މިނިސްޓަރަށް ޝުކުރާއި މަރުހަބާ ދަންނަވާފައެވެ.
ނަޝީދު ވިދާޅުވީ ކައުންސިލްތަކުން އެ ރަށުގެ ބަޖެޓު ރާވާއިރު މިނިސްޓްރީން ދީފައިވާ ކޯޑުތަކުންބޭރު ނުވާނޭހެން ރޭވުމަށެވެ. އަދި ކޯޑުތަކުގެ ތެރޭގައި އަދަދެއް ޖަހައިގެން، އެ އަދަދުތަކުގެ ތެރޭގައި ހުރި ކަންކަމަށް ޕްރޮގްރާމެއް ހެއްދެވުމަށް ކައުންސިލްތަކަށް އެމަނިކުފާނު އިލްތިމާސް ކުރެއްވިއެވެ.
ކްރޮސްރޯޑް މޯލްޑިވްސްގައި ބާއްވާ "ވިއަވަތި ރާއްޖެ"ގެ ނަމުގައި ހުރިހާ ކައުންސިލްތަކުން ބައިވެރިވާ މަހާސިންތާގައި 200 އަށް ވުރެ ގިނަ ކައުންސިލަރުން ބައިވެރިވެފައިވެއެވެ. ރަށު ކައުންސިލްތަކާއި އަތޮޅު ކައުންސިލަތަކުގެ ރައީސުންގެ އިތުރުން ސިޓީ ކައުންސިލްތަކުގެ މޭޔަރުން ވަނީ މި މަހާސިންތާގައި ބައިވެރިވެފައެވެ.
