އަމާޒަކީ ވިޔަފާރީގެ ވަސީލަތްތައް ހޯދައިދީ ރަށްތައް ތަރައްގީ ކުރުން: ރައީސް ސޯލިހު
16 ޑިސެމްބަރު 2019 | ހޯމަ 08:50ލާމަރުކަޒީ ނިޒާމު ފުރިހަމަ ކުރާނަން
ރައީސް ސޯލިހު ވާހަކަފުޅު ދައްކަވަނީ
މިސަރުކާރުން ޚާއްސަ ސަމާލުކަމެއްދީގެން މަސައްކަތް ކުރަނީ އަތޮޅު ތެރޭގެ ރަށްތަކަށް ވިޔަފާރީގެ ވަސީލަތްތައް ހޯދަދީ އެރަށްތައް ތަރައްގީ ކުރުމަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
"ވިޔަވަތި ރާއްޖޭ"ގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ރަށްރަށުގެ އިގްތިސާދާ މާލޭގެ އިގްތިސާދަށް ބަލާއިރު، ތަފާތު ވަރަށް ބޮޑު ކަމަށާއި، ތަފާތު ބޮޑުވެގެން ދިޔައީ ވެސް ސަރުކާރުތަކުން މަސައްކަތް ކުރި ގޮތުން ކަމަށެވެ.
ރައީސް ސޯލިހު ވިދާޅުވީ މިހާރު މަސައްކަތް ކުރަމުންދަނީ އޭރުގެ ސިޔާސަތުތައް ބަދަލުކޮށް، ލާމަރުކަޒީ ނިޒާމު ފުރިހަމަކޮށް، ރަށްރަށަށް ފުދުންތެރިކަން ބަދަލުކުރަން ކަމަށެވެ. އަދި ވިޔަފާރީގެ ވަސީލަތްތައް ހޯދައިދީ ރަށްތައް ތަރައްގީ ކުރުމަށް މަސައްކަތްތައް ކުރަމުން ގެންދާކަން އެމަނިކުފާނު ފާހަގަކުރެއްވިއެވެ.
ރައީސް ސޯލިހު ވިދާޅުވީ ރާއްޖޭގެ އެވޭލާ ޒަމާނުގައި މާލޭގައި މަގުތަކުގައި ގެންގުޅޭ ގެރި ބަކަރިން ޓެކްސް ނެގި ކަމަށާއި، އެޓެކްސް ނަގަމުންދިޔައީ މަގުތައް ސާފުކޮށް ރަނގަޅަށް ބެލެހެއްޓުމަށް ކަމަށެވެ. އަދި ރަށްރަށުގައި ރާވެރިކަން ކުރާ މީހުންނާއި، ދަނޑުވެރިކަން ކުރާ މިހުންނާއި، މަސްވެރިން ކުރާ އޮޑިދޯނި ފަހަރުން ޓެކްސް ނެގި ކަމަށެވެ.
އެހެންކަމުން އެރަށްތަކުގެ އުމްރާނީ ތަރައްގީއަށް ބޮޑެތި ބަދަލުތަކެއް އައި ކަމަށެވެ. ނަމަވެސް މިއުސޫލުތައް ބަދަލުވެގެން ދިއުމާއެކު ތަރައްގީ ވެސް ހުއްޓިގެން ދިޔަކަން ރައީސް ފާހަގަކުރެއްވިއެވެ.
