ގަތަރާއެކު އޮތް ވިޔަފާރީގެ އެއްވެސް ގުޅުމަކަށް ބަދަލެއް ގެނައުމަށް ނުނިންމަން: މުއާޒު
ގުޅުން ކަނޑާލީ ގަތަރާއި ރާއްޖޭގެ ގުޅުން ވަރުގަދަކުރަން މަޝްވަރާކުރިތާ 13 ގަޑިއިރު ފަހުން
ގަތަރު
ގަތަރާއެކު އޮންނަ ގުޅުން ކަނޑާލި ނަމަވެސް، ވިޔަފާރީގެ އެއްވެސް ގުޅުމަކަށް އެއްވެސް ބަދަލެއް ގެނައުމަށް ނިންމާފައެއް ނުވާނެ ކަމަށް ރައީސް އޮފީހުގެ ތަރުޖަމާނު އިބްރާހިމް މުއާޒު އަލީ ވިދާޅުވެއްޖެ އެވެ.
މުއާޒު މިހެން ވިދާޅުވިއިރު، ގަތަރާއެކު ރާއްޖޭން ގުޅުން ކަނޑާލާފައި މި ވަނީ ދެ ގައުމުގެ ގުޅުން ރަނގަޅު ކުރުމަށް މަޝްވަރާ ކުރެވުނުތާ 13 ގަޑިއިރު ފަހުންނެވެ. ސައުދީ އަރަބިއްޔާގެ ފަހަތުން އަރަބި ހަ ގައުމެއް ގަތަރާ ގުޅުން ކަނޑާލާފައިވާއިރު، އަރަބި ދުނިޔޭގައި ނުހިމެނޭ ގައުމަކަށް ގަތަރާ ގުޅުން ކަނޑާލާފައި ވަނީ ރާއްޖޭން އެކަންޏެވެ.
ރާއްޖޭން ގަތަރާ ގުޅުން ކަނޑާލިއިރު، މި އަހަރު ރާއްޖޭގެ އިންވެސްޓްމެންޓް ފޯރަމް ބޭއްވުމަށް ހަމަޖައްސާފައި ވަނީ ވެސް ގަތަރުގަ އެވެ.
ގަތަރާއެކު އޮތް ވިޔަފާރީގެ ގުޅުމަށް ބަދަލެއް ގެނައުމަށް ދިވެހި ސަރުކާރުން ނުނިންމިޔަސް، ސިޔާސީ ގުޅުން ކަނޑާލުމުން ވިޔަފާރި އާއި އިގްތިސޯދީ ގޮތުން ވެސް ރާއްޖެ އަށް ގެއްލުންތަކެއް ވާނެ ކަމަށް އިދިކޮޅު އެމްޑީޕީން ވަނީ ބުނެފަ އެވެ. މިއީ ދިވެހިރައްޔިތުންނަށް ގެއްލުން ދިނުމަށް ސަރުކާރުން ނިންމި ނިންމުމެއް ކަމަށް ވެސް އެ ޕާޓީން ބުނެ އެވެ.
