ރާއްޖެ އާއި ޔޫއޭއީއާ ދެމެދު ވިޔަފާރީގެ އެއްބަސްވުމެއްގައި ސޮއިކުރުމުގެ މައްސަލަ ކޮމެޓީއަށް!
5 ޖޫން 2017 | ހޯމަ 10:40މިއީ މަޖިލީހުން ރުހުން ހޯދަންޖެހޭ ކަމަކަށްވާތީ މަޖިލީހަށް ފޮނުވި މައްސަލައެއް
ޔޫއޭއީގެ ސަފީރު ޑރ. ހުސައިން ނިޔާޒުއަށް ސަފީރުކަމުގެ ފަތްކޮޅު ދެއްވަނީ: ރާއްޖެ އާއި ޔޫއޭއީ އިން ވަނީ ވިޔަފާރީގެ އެއްބަސްވުމެއްގައި ސޮއިކުރުމަށް ނިންމާފަ
ދިވެހިރައްޖޭ އާއި ޔުނައިޓެޑް އެރެބް އެމިރޭޓްސް (ޔޫއޭއީ)އާ ދެމެދު ވިޔަފާރީގެ އެއްބަސްވުމެއްގައި ސޮއި ކުރުމަށް ސަރުކާރުން ނިންމާފައިވާތީ އެމައްސަލަ ދިރާސާކުރުމަށް ރައްޔިތުންގެ މަޖިލީހުގެ ގައުމީ ސަލާމަތުގެ ކޮމެޓީއަށް ފޮނުވައިފި އެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި މަޖިލީހުގެ ރައީސްގެ މޭޒުން ހުށަހަޅާ ކަންކަމުގެ ތެރެއިން، ބޭރު ގައުމުތަކާއި ބައިނަލްއަގުވާމީ ޖަމްއިއްޔާތަކާ އެކު ދިވެހިރާއްޖެއިންވާ މުއާހަދާތަކާ އެއްބަސްވުންތަކުގެ ތެރެއިން ރައްޔިތުން އެއްވެސް އިލްތިޒާމެއް އުފުލަންޖެހޭ ބާވަތުގެ މުއާހަދާތަކާއި އެނޫން ވެސް އެއްބަސްވުންތަކުގައި ސޮއިކުރުމުގައި، ރައްޔިތުންގެ މަޖިލީހުގެ ރުހުން ބޭނުން ވާނެ ކަމަށް ގާނޫނުއަސާސީގެ 115 ވަނަ މާއްދާގެ (ފ) ގެ (2) ވަނަ ނަންބަރުގައި ބަޔާންކޮށްފައި ވާތީ، "އެގްރީމަންޓް ބިޓްވީން ދަ ގަވަރމެންޓް އޮފް ދަ ޔުނައިޓެޑް އެރެބް އެމިރޭޓްސް އެންޑް ދަ ގަވަރމެންޓް އޮފް ދަ ރިޕަބްލިކް އޮފް މޯލްޑިވްސް އޮން ދަ ޕްރޮމޯޝަން އެންޑް ރެސިޕްރޯކަލް ޕްރޮޓެކްޝަން އޮފް އިންވެސްޓްމަންޓްސް" ގައި ދިވެހި ސަރުކާރުގެ ފަރާތުން ސޮއިކުރުމުގެ މައްސަލަ ދިރާސާ ކުރައްވައި ގޮތެއް ނިންމެވުމަށް އެ މައްސަލައާ ގުޅޭ ދާއިމީ ކޮމިޓީއަށް ފޮނުވުމުގެ މައްސަލައިގައި ރިޔާސަތުން ވަނީ އެމައްސަލަ ދިރާސާ ކުރުމަށް ގައުމީ ސަލާމަތުގެ ކޮމެޓީއަށް ފޮނުވާފަ އެވެ.
ޖަލްސާގެ ރިޔާސަތުގައި އިންނެވީ މަޖިލީހުގެ ރައީސް އަބްދުﷲ މަސީހު ވަނީ، މަޖިލީހުގެ ރައީސްގެ މޭޒުން ހުށަހަޅާ ކަންކަމުގެ އެޖެންޑާގެ ދަށުން ހުށަހެޅި ހަތަރުކަމެއް ހުށަހަޅާ ކަމާގުޅޭ ކޮމެޓީތަކަށް އެމައްސަލަ ފޮނުވާ ކަމަށް އިއުލާނު ކުރުމަށް، ހޯމަ ދުވަހުގެ ޖަލްސާގައި ކުރާނެ އިތުރުކަމެއް ނެތުމުން ޖަލްސާ ނިންމާލާފަ އެވެ.
