އެމްއެމްޕީއާރްސީ ހިޔާނާތުގެ ފައިސާ ލިބުނުކަމުގެ ތުހުމަތުގައި ގާޒީ ބާރީ ސަސްޕެންޑްކޮށްފި
12 ޑިސެމްބަރު 2019 | ބުރާސްފަތި 09:04ގާޒީ ބާރީގެ މައްޗަށް ޖިޏާއީ ތަޙުޤީޤެއް ހިންގޭ ވަރަށް މައުލޫމާތު ލިބިފައިވޭ
ގާޒީ ބާރީ އާއި ކުރީގެ އުއްތަމަ ފަނޑިޔާރު އަބްދުﷲ ސައީދު
އެމްއެމްޕީއާރްސީ ފައިސާއިން މަންފާ ހޯދި މައްސަލަ ފުލުހުން ބަލަމުންދާތީ ޖުވެނައިލް ކޯޓުގެ ގާޒީ އަލްއުސްތާޛު އަބްދުލް ބާރީ ޔޫސުފް ސަސްޕެންޑް ކޮށްފިއެވެ.
އެކަމާ ގުޅޭގޮތުން ބުރާސްފަތި ދުވަހު ޖުޑީޝަލް ސަރވިސް ކޮމިޝަނުން ބުނީ، އެމްއެމްޕީއާރްސީ މެދުވެރިކޮށް ހިޔާނަތްތެރިވި ފައިސާއިން މާލީ މަންފާ ހޯދިކަމަށް ބުނާ ފަނޑިޔާރުންގެ ތެރެއިން ގާޒީ ބާރީގެ މައްޗަށް ޖިޏާއީ ތަޙުޤީޤެއް ހިންގޭ ވަރަށް މައުލޫމާތު ލިބިފައިވާތީ އެ މައްސަލަ ތަޙުޤީޤު ކުރަމުންދާކަމަށް ފުލުހުން އެ ކޮމިޝަނަށް އަންގާފައިވާ ކަމަށެވެ.
އަދި ތަޙުޤީޤު ކުރިއަށްދާތީ ގާޒީ ބާރީގެ ސުލޫކީ މައްސަލަ ކޮމިޝަނުން ބެލުމަށް ޖޭއެސްސީގެ ޤާނޫނުގެ 25 ވަނަ މާއްދާގެ ޏ ގެ ދަށުން ގާޒީ ފަނޑިޔާރުގެ މަޤާމުން ވަގުތީ ގޮތުން ދުރު ކުރުމަށް ކޮމިޝަނުން ނިންމާފައިވާ ކަމަށެވެ.
ޖުވެނައިލް ކޯޓުގެ ފަނޑިޔާރެއްގެ ގޮތުގައި ހަމަޖެއްސެވުމުގެ ކުރިން ގާޒީ ބާރީ ވަނީ ކްރިމިނަލް ކޯޓުގެ އިސްގާޒީ ކަންވެސް ކުރައްވާފައެވެ. އެގޮތުން އޭރު ގާޒީ ބާރީ ޖުވެނައިލް ކޯޓަށް ބަދަލުކުރީ ސުޕްރީމް ކޯޓުގެ ހުށަހެޅުމަކަށެވެ.
އެމްއެމްޕީއާރްސީގެ ފައިސާއިން މަންފާ ހޯދި ކަމުގެ ތުހުމަތު ގާޒީ ބާރީގެ އިތުރުންވެސް ބައެއް ފަނޑިޔާރުންނަށް ކުރެވެއެވެ. އެގޮތުން އެމްއެމްޕީއާރްސީ ހިޔާނާތުގެ ފައިސާ 6 ފަނޑިޔާރަކަށް ލިބިފައިވާކަމަށް ދައުލަތުގެ އިދާރާތައް ގުޅިގެން އޮކްޓޯބަރު މަހު ބޭއްވި ނޫސްވެރިންގެ ބައްދަލުވުމެއްގައި މައުލޫމާތު ދީފައިވެއެވެ.
