ހުސް ކުއްލި މައްސަލަ!

2019 ވަނަ އަހަރުގެ ތިން ވަނަ ދައުރުގައި އެންމެ ގިނަ ކުއްލި މައްސަލަ ހުށަހަޅުއްވާ، 19 ވަނަ ރައްޔިތުންގެ މަޖިލީހުގެ ދެ ދައުރުގައި އެންމެ ގިނައިން ކުއްލި މައްސަލަ ހުށަހެޅުއްވި މެމްބަރަށް ކާށިދޫ ދާއިރާގެ މެންބަރު ޢަބްދުﷲ ޖާބިރު ވެވަޑައިގެންފިއެވެ.

2019 ވަނަ އަހަރުގެ ތިން ވަނަ ދައުރުގައި މަޖިލީހުގެ މެންބަރުންވަނީ ޖުމްލަ 6 ކުއްލި މައްސަލައެއް ހުށަހަޅުއްވާފައެވެ. މެންބަރުން ކުއްލި މައްސަލަ ހުށަހަޅުއްވަނީ ރައްޔިތުންގެ މަޖިލީހުގެ ޤަވާއިދުގެ 170 ވަނަ މާއްދާގެ ދަށުން ލިބިދޭ އިޚުތިޔާރެއްގެ ދަށުންނެވެ.

މެންބަރު ޖާބިރު ވަނީ މިދައުރުގައި 2 ކުއްލި މައްސަލައެއް ހުށަހަޅުއްވާފައެވެ.

އެއީ 18 ނޮވެމްބަރު 2019 ވަނަ ދުވަހު ޑައިވިން ކުރުމުގެ ތެރޭގައި ޑީކޯވި ހުވަދު އަތޮޅުގެ ދެ މަސްވެރިއަކަށް ލިބެންޖެހޭ ފަރުވާ ތިނަދޫ ރީޖަނަލް ހޮސްޕިޓަލުން ލިބެން ނެތުމުގެ ސަބަބުން މާލެ ގެންނަން ޖެހުނު ޙާދިސާއާއި ގުޅިގެން ހުށަހެޅުއްވި ކުއްލި މައްސަލައަކާއި ރައީސް ޔާމީނުގެ ސަރުކާރުގައި ފާސްކުރި "ޞުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ޤާނޫނަށް އިޞްލާޙުގެނައުމުގެ ޤާނޫނު" އުވާލުމަށް ހުށަހެޅި ކުއްލި މައްސަލައެކެވެ.

2019 ވަނަ އަހަރުގެ ދައުރުން ބޭރުގައި ބޭއްވި ޚާއްޞަ ޖަލްސާގައިވެސް ކުއްލި މައްސަލައެއް މެންބަރު ޖާބިރު ހުށަހަޅުއްވާފައިވެއެވެ. މެންބަރު ޖާބިރު ހުށަހެޅުއްވި ކުއްލި މައްސަލައަކީ ސެޕްޓެންބަރު މަހުގެ 20 ވަނަ ދުވަހު ހ. ތިލަފުށިގޭގައި ހުރި ގުދަނެއްގައި ރޯވެ، ހިނގި އަލިފާނުގެ ޙާދިސާއާއި ގުޅިގެން ހުށަހެޅުއްވި ކުއްލި މައްސަލައެކެވެ.

2019 ވަނަ އަހަރުގެ ދެވަނަ ދައުރުގައި މެންބަރުން ޖުމްލަ 10 ކުއްލި މައްސަލައެއް ހުށަހަޅުއްވާފައިވެއެވެ. މެންބަރު ޖާބިރު ވަނީ އެ ދައުރުގައިވެސް 2 ކުއްލި މައްސަލަ ހުށަހަޅުއްވާފައެވެ. އެއީ ކޮންސްޓްރަކްޝަން ސައިޓުތަކުގެ ޙާލަތު ގޯސްވެ، ޢާންމުންގެ ގިނަ ބަޔަކަށް ގެއްލުންވެ، އަދި ބައެއް ޙާދިސާތަކުގައި ފުރާނަ ގެއްލިފައިވާތީ އެ ސައިޓުތަކުގެ ސަލާމަތާއި ރައްކާތެރިކަމަށްޓަކައި އަޅަންޖެހޭ ފިޔަވަޅުތައް ވަގުތުން ވަގުތައް އެޅުމަށް ގޮވާލާ ހުށަހެޅުއްވި ކުއްލި މައްސަލައަކާއި، ބޯކޮށް ވާރޭވެހި ރާއްޖޭގެ ރަށްތަކަށް ބޮޑެތި ގެއްލުން ލިބިުމާއި ގުޅިގެން ގެއްލުންވީ ފަރާތްތަކާއި ލިބުނު ގެއްލުންތަކުގެ ތަފްސީލުތައް ހޯދައި އެކަންކަން ހައްލު ކޮށްދިނުމަށް ދައުލަތަށް ބާރުއެޅުމުގެ ގޮތުން ހުށަހެޅުއްވި ކުއްލި މައްސަލައެވެ.

19 ވަނަ ރައްޔިތުންގެ މަޖިލީހުގެ ދެ ދައުރުގައްޔާއި އަދި ދައުރުން ބޭރުގައި ބޭއްވި ޚާއްޞަ ޖަލްސާގައި ހުށަހެޅުއްވި 5 ކުއްލި މައްސަލައާއެކު މެންބަރު ޖާބިރު ވެވަޑައިގަންނަވަނީ އެންމެ ގިނައިން 19 ވަނަ ރައްޔިތުންގެ މަޖިލީހުގައި ކުއްލި މައްސަލަ ހުށަހެޅުއްވި މެންބަރަށެވެ.