ގާސިމުގެ މަރާ ގުޅޭގޮތުން އަޅުގަނޑާ ގުޅުވައިގެން ދެކެވޭ ވާހަކަތަކުގައި ހަގީގަތެއް ނެތް: މެންބަރު ޝަހީމް

މި ޑިސެމްބަރު މަހު ހަތަރު ވަނަ ދުވަހުގެ ރޭ ހުޅުމާލޭގައި ޓެކްސީއެއްގެ ތެރޭގައި ހަމަލާދީ މަރާލާފައިވާ، އދ. މާމިގިލި ކަނީރުމާގެ ޤާސިމް ޙަސަންގެ މަރާއި ގުޅުވައިގެން، ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު ޢަބްދުﷲ ޝަހީމް އަބްދުލް ޙަކީމާމެދު ދެކެވޭ ވާހަކަތައް އޭނާ ދޮގުކޮށްފި އެވެ.

މެންބަރު ޝަހީމް ނެރުއްވާފައިވާ ބަޔާނެއްގައި ވިދާޅުވެފައިވަނީ، ޤާސިމުގެ މަރާ އޭނާއާ ގުޅުވައި އެކި މީޑިއާތަކުގައި ކަނޑައެޅިގެން ދޮގު ވާހަކަތައް ފަތުރަމުންދާ ކަމަށެވެ. އަދި ޤާސިމަކީ އޭނާ ދަންނަ މީހެއް ނޫން ކަމަށާއި، ޤާސިމާ ބައްދަލުވެ، ނުވަތަ އެނޫންވެސް ގޮތަކަށް ވާހަކަ ދެކިވިފައިވާ މީހެއް ނޫން ކަމަށް ޝަހީމް ވިދާޅުވެފައި ވެއެވެ.

އެހެންކަމުން ޤާސިމުގެ މަރާއި ޝަހީމާ ގުޅުމެއް އޮތް ކަމަށް ސޯޝަލް މީޑިއާގައި ބަޔަކު މީހުން ފަތުރަމުންދާ ވާހަކަތަކަކީ އެއްވެސް މިންވަރެއްގެ ޙަޤީޤަތެއްގެ މައްޗަށް ފަތުރަމުންދާ ވާހަކަތަކެއް ނޫން ކަމަށް ޝަހީމުގެ ބަޔާނުގައި ވިދާޅުވެފައި ވެއެވެ. އަދި މިފަދަ ވާހަކަތައް ފަތުރަމުންގެންދާ ބައެއް ފަރާތްތަކަކީ މީގެ ކުރިންވެސް މިފަދަ ދޮގު އެހެން ވާހަކަތަކެއް އޭނާއާ ބެހޭ ގޮތުން ފަތުރަމުން ގެންދިޔަ ފަރާތްތަކެއްކަމަށް ޝަހީމުގެ ބަޔާނުގައި ވިދާޅުވެފައި ވެއެވެ.

ޝަހީމް ވިދާޅުވީ މިފަދަ ނުރައްކާތެރި އަދި ބިރުވެރި ޢަމަލުތަކާ ގުޅޭގޮތުން އެފަދަ ދޮގު ވާހަކަތައް ފެތުރުމުގެ ނަތީޖާއަކަށްވާނީ މުޖުތަމަޢުގެ ތެރޭގައި އެއްބައެއްގެ މައްޗަށް އަނެއް ބަޔަކު ނަފުރަތުވެ، ފިތުނަވެރިކަން އިތުރުވުން ކަމަށެވެ. އަދި ބަދަލުހިފުމުގެ ރޫޙު އާލާވުމުގެ ސަބަބުން މިފަދަ ނުރައްކާތެރި ޢަމަލުތައް ތަކުރާރުވުމުގެ ފުރުޞަތު އިތުރުވެގެންދިޔުމަކީ އެކަށީގެންވާ ކަމެއްކަމަށްވެސް ޝަހީމުގެ ބަޔާނުގައި ވިދާޅުވެފައި ވެއެވެ.

އެހެންކަމުން އެފަދަ ދޮގު ވާހަކަތައް ފަތުރަމުންދާ ފަރާތްތަކުގެ ކިބައިން އެދެނީ ދޮގު ވާހަކަތައް ފަތުރާ، ރައްޔިތުންގެ މެދުގައި އޮތް އަމާން އޮމާން ދިރުއުޅުން ނަގާލުމަށް މަސައްކަތް ނުކުރުމަށް މެމްބަރު ޝަހީމްވަނީ އެފަރާތްތަކަށް ގޮވާލައްވާފަ އެވެ.

ގާސިމް އަނިޔާވެރިގޮތަކަށް މަރާލާފައިވާތީ، އޭނާގެ ފުރާނައަށް ހެޔޮ ރަޙްމަތް ލައްވައި، ޢާއިލާއަށް ކެތްތެރިކަން ދެއްވުމަށް އެދި ދުޢާ ކުރާ ކަމަށް ޝަހީމުގެ ބަޔާނުގައި ވެއެވެ. އަދި ޤާސިމުގެ މަރުގެ މައްސަލާގައި ވަށައިގެންވާ އެންމެހާ ކަންކަން ތަހުޤީޤުކޮށް، އެކަން ކުރިބަޔަކު އިންސާފުގެ ކުރިމައްޗަށް ގެނައުމަށްވެސް ޝަހީމުގެ ބަޔާނުގައި ގޮވާލައްވާފައި ވެއެވެ.