އަޅުގަނޑު ޖޭއެސްސީން ވަކިވުމަކީ މިވަގުތަށް ލިބޭނެ އެންމެ ބޮޑު "ބޮނޑި" - ރައީސް ނަޝީދު
7 ޑިސެމްބަރު 2019 | ހޮނިހިރު 06:53ރައްޔިތުން އެދިވަޑައިގަންނަވާ ގޮތަށް މިކަން ކޮށް ނިންމާދޭނެ ކަމަށް ރައީސް ނަޝީދު ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ޖުޑީޝަލް ސަރވިސް ކޮމިޝަން(ޖޭއެސްސީ) އިން މިވަގުތު ވަކިވުމަކީ ލިބޭނެ އެންމެ ބޮޑު "ބޮނޑި" ގެ ގޮތުގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ސިފަކުރައްވައިފި އެވެ.
ހޮނިހިރު ދުވަހުގެ ޖަލްސާގައި ސުޕްރީމް ކޯޓުގެ ފަނޑިޔާރު ކަމުގެ މަޤާމަށް އަލްއުސްތާޒު ޙުސްނުއްސުޢޫދު ޢައްޔަނުކުރުމާއި ގުޅޭގޮތުން ރައީސުލްޖުމްހޫރިއްޔާ ފޮނުއްވާފައިވާ މައްސަލަ ޖުޑީޝަރީން ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ބަހުސްކުރައްވަމުން މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފު ވިދާޅުވީ ޖުޑީޝަރީ އިޞްލާޙުކުުރުމަށް މިވަގުތަށް ކުރެވޭނެ އެންމެ ރަނގަޅު ކަންތަކަކީ ޖޭއެސްސީން ރައްޔިތުންގެ މަޖިލީހުގެ ރައީސް، ރައީސް ނަޝީދު ދުރަށް ވަޑައިގަތުން ކަމަށެވެ. ސަބަބެެއްކަމަށް އާދަމް ޝަރީފު ވިދާޅުވީ ރައީސް ނަޝީދަކީ ސިޔާސީ ބޭފުޅަކަށްވާތީ ކަމަށާއި، މިދެބައި އެއްކޮށްގެން މަސައްކަތް ކުރުމަކީ ރަނގަޅު ކަމެއްކަމަށް ދެކެވަޑައިނުގަންނާތީ ކަމަށެވެ.
އާދަމް ޝަރީފުގެ މިވާހަކައަށް ރައްދުދެއްވަމުން ރައީސް ނަޝީދު ވަނީ އެމަޤާމުގައި ހުންނަވައިގެން ރައްޔިތުން ބޭނުންވާ ގޮތަށް ޖުޑީޝަރީ އިޞްލާޙުކުރުމުގެ ކަންކަން ކުރައްވާނެ ކަމަށް ވިދާޅުވެފަ އެވެ.
ސުޕްރީމް ކޯޓަށް އަލްއުސްތާޛު ހުސްނުއްސުޢޫދު ޢައްޔަނުކުރުމާމެދު އާދަމް ޝަރީފު ވިދާޅުވީ ހުސްނުއްސުޢޫދަކީ ސިޔާސީ ބޭފުޅެއްކަމަށާއި އެހެންކަމުން ސުޕްރީމް ކޯޓުގެ ފަނޑިޔާރު ކަމަށް އެފަދަ ބޭފުޅަކު ޢައްޔަނުކުރާތީ އެކަމާއި ކަންބޮޑުވެ ވަޑައިގަންނަވާކަމަށެވެ. ސިޔާސީ މަޤާމަކަށް ހުސްނުއްސުއޫދު ރަނގަޅުކަމަށާއި، ނަމަވެސް ސުޕްރީމް ކޯޓުގެ ފަނޑިޔާރަކަމަށް ޢައްޔަނުކުރުމަށް ފެނިވަޑައިނުގަންނަވާކަމަށް އާދަމް ޝަރީފު ވިދާޅުވި އެވެ.
މީގެއިތުރުން އާދަމް ޝަރީފް ވިދާޅުވީ ރައީސް ނަޝީދު ފިޔަވައި ދެން ރާއްޖޭގައި ހުރި ސިޔާސީ އެންމެ ވަރުގަދަ ބޭފުޅެކީ ހުސްނުއްސުޢޫދު ކަމަށެވެ.
އާދަމް ޝަރީފް ވިދާޅުވީ ސުޕްރީމް ކޯޓުގެ ފަނޑިޔާރުކަން ކުރަންވާނީ ސިޔާސީ ކަންކަމުގައި ޙަރަކާތްތެރި ނުވާ ބޭފުޅެއް ކަމަށެވެ.
