މަސްވެރިންގެ ދުވަހާއި ގުޅިގެން ގިނަ ހަރަކާތްތަކެއް ބާއްވަނީ
5 ޑިސެމްބަރު 2019 | ބުރާސްފަތި 18:08ދޮށީގެ މަސްވެރިކަމުގެ މަސް ދަތުރު މިމަހުގެ 06 އަދި 07 ގައި އޮންނާނެ
2018 ވަނަ އަހަރުގެ މަސްވެރިންގެ ދުވަސް ފާހަގަކުރުމަށް ބޭއްވި ހަރަކާތްތަކުގެ ތެރެއިން
މަސްވެރިންގެ ދުވަހާ ގުޅިގެން ގިނަ ހަރަކާތްތަކެއް ބާއްވަން ނިންމައިފިއެވެ.
މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއިން ބުނީ މަސްވެރިންގެ ދުވަހުގެ އިޙްތިފާލުތައް ޑިސެމްބަރު 06 އިން 10 އަށް ހުޅުމާލޭގައި ފާހަގަކުރުމަށް ހަމަޖެހިފައިވާ ކަމަށާއި، ރާއްޖޭގެ ހުރިހާ އަތޮޅުތަކުން މަސްވެރިންނާއި މަސްވެރިކަމުގެ ސިނާއަތުގެ ގިނަ އަދަދެއްގެ ކުންފުނިތަކާއި އަމިއްލަ ފަރާތްތަކުގެ ބައިވެރިވާނެ ކަމަށެވެ. އެގޮތުން ޒުވާނުންނަށް އަމާޒުކޮށްގެން ބާއްވާ ދޮށީގެ މަސްވެރިކަމުގެ މަސް ދަތުރު މިމަހުގެ 06 އަދި 07 ވަނަ ދުވަހު އޮންނާނެ ކަމަށެވެ.
ފިޝަރީޒް މިނިސްޓްރީން ބުނީ މިއީ މަސްވެރިކަމުގައި، ޚާއްސަކޮށް ދޮށީގެ މަސްވެރިކަމުގައި ޒުވާނުންގެ ބައިވެރިވުން އިތުރުކުރުމަށާއި ދޮށީގެ މަސްވެރިކަމަށް ޒުވާނުން އަހުލުވެރިކޮށް ޒުވާން މަސްވެރިންތަކެއް އުފެއްދުމުގެ ބޭނުމުގައި ބޭންކް އޮފް މޯލްޑިވްސްއާއި ގުޅިގެން ބާއްވާ ދޮށީގެ މަސްވެރިކަމުގެ މަސް ދަތުރެއެއް ކަމަށާއި، މިދަތުރުގައި 02 ދޯންޏަކަށް ބަހާލެވިގެން ޖުމްލަ 30 ޒުވާނުން މަހަށް ފުރުމަށްވަނީ ހަމަޖެހިފައިވާ ކަމަށެވެ. އަދި މިމަސްދަތުރުގައި އެންވެރިކަންކުރާ ގޮތާއި މާކަނޑުގައި ދޮށީގެ މަސްވެރިކަން ކުރާނެ ގޮތް އަމަލީ ގޮތުން ތަޖުރިބާކުރުމުގެ ފުރުސަތު ލިބޭނެ ކަމަށެވެ.
ފިޝަރީޒް މިނިސްޓްރީން ބުނީ މިމަހުގެ 06 އަދި 08 ގައި ފިޝަރީޒް އެކްސްޕޯ އޮންނާނެ ކަމަށާއި، މިއީ މަސްވެރިކަމުގެ ދާއިރާގެ އެކިއެކި ވަޞީލަތްތަކާއި މަސްވެރިކަމުގައި ބޭނުންކުރާ އާލާތްތައް އަދި އެސިނާއަތްތަކުގެ އުފެއްދުންތަކާއި އެސިނާއަތްތަކާއިބެހޭ މައުލޫމާތުތައް ފުޅާ ދާއިރާއެއްގައި އެއް ފުރާޅެއްގެ ދަށުން ފޯރުކޮށްދިނުމުގެ މަގުސަދުގައި ބާއްވާ އެކްސްޕޯއެއް ކަމަށެވެ. މިނިސްޓްރީން ބުނީ މިއެކްސްޕޯގައި މަސްވެރިކަމާއި ގުޅުންހުރި ތަކެތި އިޝްތިހާރުކުރުމާއި ވިޔަފާރި އުސޫލުން ވިއްކުމަށް ބައިވެރިންނަށް ފުރުސަތު ލިބޭނެ ކަމަށާއި، މަހުގެ އުފެއްދުން އުފައްދާ ފަރާތްތަކަށް އެފަރާތްތަކުގެ އުފެއްދުން މާކެޓްކުރުމުގެ ފުރުސަތު ލިބޭނެ ކަމަށެވެ.
މިއެކްސްޕޯ އޮންނާނީ ހުޅުމާލޭ ހުރަވީ ސްކޫލް ހޯލުގައެވެ. މިއެކްސްޕޯ ހުޅުވުމުގެ ރަސްމިއްޔާތު އޮންނާނީ 06 ޑިސެމްބަރ ވަނަ ދުވަހު ހަވީރު 16:15 ގައެވެ. މިއެކްސްޕޯގައި މަސްވެރިކަމުގެ ސިނާއަތުގައި އެކިގޮތްގޮތުން ހަރަކާތްތެރިވާ ޖުމްލަ 14 ފަރާތަކުން ބައިވެރިވާ ކަމަށް ފިޝަރީޒް މިނިސްޓްރީން މައުލޫމާތުދެއެވެ.
މީގެ އިތުރުން ފިޝަރީޒް މިނިސްޓްރީން ބުނީ މަސްވެރިންގެ ފޯރަމް މިމަހުގެ 08 އަކުން 09 އަކަށް އޮންނާނެ ކަމަށެވެ.
މަސްވެރިންގެ ފޯރަމަކީ މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް މިސިނާއަތާއި ގުޅުންހުރި އެކިއެކި މައުލޫމާތު ފޯރުކޮށްދީ، މަސްވެރިކަމާއި ގުޅުންހުރި ސިޔާސަތުތައް ބައްޓަންކުރާނެ ގޮތާއިބެހޭ ގޮތުން މައުލޫމާތު ބަދަލުކުރުމާއި، މިސިނާއަތު ތަރައްގީކޮށް ކުރިއެރުވުމާއި ގުޅޭ ގޮތުން މަޝްވަރާކުރުމުގެ މަގުސަދުގައި ބާއްބާ ފޯރަމެކެވެ. މިފޯރަމުގައި މަސްވެރިކަމުގެ ސިނާޢަތުގައި ހަރަކާތްތަކުގެ އިތުރުން، ރާއްޖޭގެ ހުރިހާ އަތޮޅަކުން މަސްވެރިންނާއި، ކެޔޮޅުން އަދި އޮޑިވެރިން ހިމެނޭ ގޮތަށް ޖުމްލަ 50 ފަރާތެއް ބައިވެރިވާ ކަމަށް މިނިސްޓްރީން މައުލޫމާތުދެއެވެ.
ފިޝަރީޒް މިނިސްޓްރީން ބުނީ މަސް ކެނޑުމުގެ މުބާރާތް އަދި އެންސިސް ފިޝަރީޒް ޕްރައިވެޓް ލިމިޓެޑުން ހުޅުމާލޭގައި ގާއިމް ކޮށްފައިވާ ދަޅުމަސް ބަނދުކުރާ ފެކްޓްރީ އާއި ފިޝަރީޒް ހާރބާރގައި އަލަށް ގާއިމް ކޮށްފައިވާ 95 ޓަނުގެ އައިސް ޕްލާންޓު ހުޅުވުން މިމަހުގެ 09 ވަނަ ދުވަހު އޮންނާނެ ކަމަށެވެ.
ދެޖިންސަށް ހުޅުވާލައިގެން ބާއްވާ މިމިމުބާރާތް އޮންނާނީ މިމަހުގެ 09 ވަނަ ދުވަހު ހަވީރު 17:00 ގައި ހުޅުމާލޭގައި އެންސިސްއިން ގާއިމުކޮށްފައިވާ ދަޅުމަސް ބަންދުކުރާ ފެކްޓްރީގައި ކަމަށާއި، މިމުބާރާތުގެ އަންހެން އަދި ފިރިހެން ބައިންވެސް 1 ވަނަ، 2 ވަނަ، އަދި 3 ވަނަ ހޮވާނެ ކަމަށް މިނިސްޓްރީން މައުލޫމާތުދެއެވެ.
ފިޝަރީޒް މިނިސްޓްރީން ބުނީ ހުޅުމާލޭގައި އެންސިސްއިން ގާއިމުކޮށްފައިވާ މިފެކްޓްރީ ހުޅުވުމުން 400 ވަޒީފާ އިތުރުވެގެން ދާނެކަމަށެވެ. އަދި އެންސިސްއިން އަލަށް ގާއިމް ކޮށްފައިވާ 95 ޓަނުގެ އައިސް ޕްލާންޓުވެސް ހުޅުވުމަށް ވަނީ ހަމަޖެހިފައިވާ ކަމަށާއި، މިއައިސްޕްލާންޓް ގާއިމްކުރުމުން މާލޭ ސަރަހައްދުން މަސްވެރިންނަށް ބޭނުންވާ އައިސް ހޯދުމުގައި ގިނަ ފަސޭހަތަކެއް ވެގެންދާނެ ކަމަށެވެ.
މަސްވެރިންގެ ދުވަހު ފަތިސް ނަމާދަށްފަހު ކުރާ ޚާއްސަ ދުއާއެއް ކުރާކަން ފާހަގަކުރައްވައި މިނިސްޓްރީން ބުނީ މިމަހުގެ 10 ވަނަ ދުވަހު މިޚާއްސަ ދުއާ ރާއްޖޭގެ މީހުން ދިރިއުޅޭ ހުރިހާ ރަށެއްގައި ކުރާގޮތަށް ވަނީ ހަމަޖެހިފައިވާ މާލޭގައި މިދުއާ ކުރުމަށް ހަމަޖެހިފައިވަނީ އިސްލާމީ މަރުކަޒު އަދި ހުޅުމާލޭ މަސްޖިދް ޙަމަދު ބިން ޚަލީފާ އައްޘާނީގައި ކަމަށެވެ.
ފިޝަރީޒް މިނިސްޓްރީން ބުނީ މަސްވެރިންގެ ދުވަހުގެ މުނާސަބަތުގައި ފާހަގަކުރާ ރަސްމީ ހަފްލާ ބޭއްވުމަށް ހަމަޖެހިފައިވަނީ ހުޅުމާލޭގެ ސެންޓްރަލް ފާކް ސަރަހައްދުގައި 10 ޑިސެމްބަރު 2019 ވަނަ ދުވަހުގެރޭ 20:10 ގައި ކަމަށެވެ. މިނިސްޓްރީން ބުނީ މިޙަފްލާގައި މަސްވެރިކަމުގެ ސިނާޢަތަށް ކޮށްދެއްވާފައިވާ ޚިދުމަތްތަކުގެ އަގުވަޒަންކޮށް ޝަރަފްވެރި އިނާމުތަކެއް ދިނުމަށްވަނީ ހަމަޖެހިފައެވެ. އަދި މީގެ އިތުރުން، 2018 ވަނަ އަހަރުގެ މަސްވެރިކަމުގައި ޙަރަކާތްތެރިވި ކުންފުނިތަކުގެ އަދި ދޯނިފަހަރުގެ ތެރެއިން އެންމެ ރަނގަޅަށް މަސައްކަތްކޮށްފައިވާ ފަރާތްތަކުގެ އަގުވަޒަންކުރެވޭނެ ކަމަށެވެ.
މިއަހަރުގެ މަސްވެރިންގެ ދުވަހުގެ ޕްލެޓިނަމް ސްޕޮންސަރުންނަކީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަދި އެންސިސް ފިޝަރީޒް ޕްރައިވެޓް ލިމިޓެޑެވެ. ގޯލްޑް ސްޕޮންސަރުންނަކީ އުރީދޫ މޯލްޑިވެސް، ބޭންކް އޮފް މޯލްޑިވްސް އަދި ހޮރައިޒަން ފިޝަރީޒް ޕްރައިވެޓް ލިމިޓެޑެވެ. ސިލްވަރ ސްޕޮންސަރަކަށް ހަމަޖެހިފައިވަނީ ސީގަލް ގްރޫޕް ޕްރައިވެޓް ލިމިޓެޑެވެ.
